The Washington Post хаһыат суруйарынан, Украина бэрэсидьиэнэ Владимир Зеленскэй Арассыыйа олохтоохторо арҕааҥҥы дойдуларга баралларын-кэлэллэрин кыккыраччы бопторон кэбиһиэн баҕарар. Кини: “Арассыыйа Украинаҕа ыытар байыаннай эпэрээссийэтин утары бырачыастаан тас дойдуларга барбыт Арассыыйа олохтоохторун эмиэ дойдуларыгар төттөрү үүртэлээҥ. Кинилэр бары биирдэр. Син биир Арассыыйа былааһа ыытар бэлиитикэтин иһин эппиэтинэһи сүгүөхтээхтэр”, — диир үһү. Зеленскэй, таарыйа, арҕааҥҥы дойдулар Арассыыйаны утары биллэрбит сааҥсыйаларын “мөлтөхтөр, дьайбаттар” диэн кириитикэлиир.
Кини да ыйыыта-кэрдиитэ суох... От ыйын 25 күнүгэр Финляндия улахан бэлитиичэскэй баартыйалара Арассыыйа олохтоохторугар туристыыр виза биэриитин тохтотору туруорсубуттара. Эстония Тас дьыалаҕа миниистирэ Урмас Рейнсалу эмиэ Арассыыйа гражданнара Евросойууска барар визаларын тохтотору туруорсубута. Оннук сокуону Латвияҕа эмиэ ылыммыттара.
Оттон Евросойуус барытын үрдүнэн оннук дьаһал ылылла илик. Арассыыйа олохтоохторо Шенген визатын Болгария, Венгрия, Греция консульстволарыттан ылаллара быдан судургутун, туох да мачайа суоҕун суруйаллар.
