Саха сирин Ил Дархана Айсен Николаев уонна Арассыыйа Федерациятыгар Монголия посола Улзийсайхан Энхтувшин Илиҥҥи экономическай форум кэмигэр бииргэ үлэлээһини сайыннарыыга хайысхалары ырыттылар. Ол курдук, убатыллыбыт айылҕа гааһын таска таһаарыы уонна Монголияҕа чоҕу тиэрдии боппуруостарыгар тохтоотулар. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.
«Саха сирэ уонна Монголия актыыбыныйдык тэҥҥэ үлэлэһэр кыахтаахтар. Биһигини холбуур үгүс хайысха баар – култуурунай уонна историческай. Убатыллыбыт айылҕа гааһын тиэрдии кэскиллээх хайысханан буолар», - диэн Айсен Николаев этэр.
Агро-бырамыысаланнай комплекска саха хампаанньаларын бородууксуйаларын таска таһаарыахха сөп. Маны сэргэ, тирии уонна күндү түүлээх сырьетын таҥастыырга бииргэ үлэлэһии эмиэ инникилээх.
Айсен Николаев Монголия бэрэстэбиитэллэрин IV «Тирэхтээх сайдыы хотугу форумугар» («Северный форум по устойчивому развитию») кыттыыны ыларга ыҥырар.
Санатар буоллахха, Арассыыйа Федерациятыгар Саха Өрөспүүбүлүкэтэ Монголияны кытта тас эргиэнэ кэлиҥҥи 5 сыл иһигэр убатыллыбыт айылҕа гааһын таска таһаарыыта үтүө хамсааһыннары аҕалбыта. Ол курдук, 2021 сыллаахха убатыллыбыт айылҕа гааһын экспордун үлэтин кэриҥэ быһа холоон 985 тыһ. доллар буолбута.
