Сунтаардааҕы лиссиэй-интэринээт 8-с кылааһын үөрэнээччитэ Давид Зорин СӨ экологияҕа миниистирин анал бириэмийэтин кыайыылааҕа буолла. Кинини министиэристибэҕэ ыҥыран үөрүүлээх быһыыга-майгыга салалтаҕа билиһиннэрдилэр уонна наҕараадалаатылар.
Бу бириэмийэни быйыл Дьиэ кэргэн уонна Оҕо саас сылларын иитинэн олохтообуттара. Күрэс ыам ыйын 20 күнүттэн 31 күнүгэр диэри буолбута. Барыта 38 сайаапка киирбититтэн финалга 15 кыттааччы ааспыта. Бэс ыйын 5-с Эколог күнүгэр миниистир Евгений Перфильев салайар хамыыһыйата бастыҥ үлэни быһаарбыта. Кыайыылааҕынан Давид Зорин оҥорбут «Изучение экологического состояния озера Тумусукан села Сунтар Сунтарского улуса методом биоиндикации» диэн үлэтэ буолбута. Наҕараадалааһын иннинэ миниистиркыайыылааҕы кытта атах тэпсэн олорон кэпсэппит.
Элбэх күрэс лауреата, экология пуорумнарын кыттыылааҕа Давид Зорин сайыҥҥы сынньалаҥ да кэмигэр билимҥэ дьарыктарын бырахпат эбит. Ол курдук, Дьокуускайга регионнар икки ардыларынааҕы чинчийэр оскуола лааҕырыгар сылдьыбыт. Норуоттар икки ардыларынааҕы Yakutia International Science Fair күрэс-кэмпириэнсийэ кыайыылааҕа буолбут. Бары өттүнэн билиилээх буолаары, литэрэтиирэни ааҕар эбит. Ону таһынан успуордунан дьарыктанар, дьиэ харамайдарын сөбүлээн иитэр. Инникитин Тайваньҥа Норуоттар икки ардыларынааҕы кэмпириэнсийэҕэ бырайыак бэлэмнээн эмиэ кыайар санаалаах.
Давид үөлэннээхтэригэр сүрэҕэлдьээбэккэ үөрэххэ-билиигэ тардыһалларыгар баҕарар. Кини төрөппүттэригэр, салайааччыларыгар уонна англия тылыгар, тулалыыр эйгэҕэ интэриэһи үөскэппит бастакы учууталыгар истиҥник махтанар.
Сонун төрдө: СӨ Экология, айылҕа уонна ойуур хаһаайыстыбатын туһаныы министиэристибэтэ
