Сунтаардааҕы технологическай колледж Арҕааҥҥы Саха сирин орто анал үөрэх кыһаларын бырамыысыланнай кластерыгар киирэр. Колледж 1968 сылтан тыа хаһаайыстыбатыгар, бырамыысаланнаска үгүс каадыры бэлэмниир.
Быйыл Арктика уонна Уһук Илин сайдыытын министиэристибэтэ биир кэлим бэрэсидьиэн субсидиятынан Уһук Илин эрэгийиэннэрин орто анал үөрэх кыһаларыгар 163 саҥа мастарыскыай тэриллэр.
СӨ Үөрэххэ уонна билимҥэ министиэристибэтин өйөбүлүнэн Сунтаардааҕы технологическай колледжка “Управление бульдозером”, “Управление экскаватором”, “Обслуживание грузовой техники” диэн мастарыскыайдар аһыллаллара былааннанар. Бу үлэ чэрчитинэн аныгы тиэхиньикэни, тэриллэри атыылаһыахтара. Саҥа мастарыскыайдарга үөрэтиини ыытыахтаах производственнай үөрэхтээһин маастардара идэлэрин таһымын үөрэнэн үрдэтэллэр. Ол курдук, Анатолий Тарасов Набережные Челны куоракка үөрэннэ. Сотору Айаал Васильев, Тимофей Заболоцкай Красноярскай куоракка үөрэнэ бараллар.
“Саҥа мастарыскыайдар аһыллан үлэҕэ киирэллэрин колледж устудьуоннара, кэлэктиибэ бары күүтэбит. Саҥа гараж-мастырыскыай дьиэтэ тутуллан саҕаламмыта. Тутуу матырыйаалларын сорҕото кэлиэхтээх. Материальнай-техническай базаны хаҥатар, саҥардар киэҥ хабааннаах үлэ ыытыллара олус үчүгэй. Түһэрсиллибит хантараак иитинэн, Челябинскайтан саҥа бульдозеры, Новосибирскайтан үөрэнэр тэриллэри аҕалбыттара. Дойдубут Бэрэсидьиэнэ Владимир Путин эдэр исписэлиистэри билиҥҥи үлэ ырыынагын ирдэбилигэр эппиэттиир гына хаачыстыбалаах үөрэтиигэ сүрүн болҕомтотун уурарын биһириибин. Маннык улахан өйөбүл орто анал үөрэх үлэтигэр бигэ тирэх буолар», – диэн колледж дириэктэрэ Гаврил Михайлов бэлиэтиир.
Сунтаардааҕы технологическай колледж үгүс выпускнига бырамыысыланнас, тыа хаһаайыстыбатын, энэргиэтикэ уонна да атын хайысхаларга таһаарыылаахтык үлэлииллэр.
Александра Павлова (Николаева).
