Н.Е. Мординов-Амма Аччыгыйын аатынан Үөрэхтээһин холбоһуга диэн тэрилтэ 2018 сыллаахха Харбалаахтааҕы профессиональнай лиссиэй уонна орто оскуола холбоһоннор тэриллибитэ. Бу Саха сиригэр орто анал идэни биэрэр уонна уопсай үөрэхтээһин биир кэлимсэ буолан үлэлээһиннэрин бастакы хараҥаччыта буолар.
2019 сыллаахха оччотооҕу Үөрэх уонна наука министиэрстибэтин орто анал үөрэхтээһинигэр миниистир солбуйааччыта Нюргуна Соколова салалталаах үлэлиир бөлөх кэлэн, кэлэктииби кытта улахан сүбэ мунньах тэрийбитэ, холбоһук хайдах үлэлиэн сөптөөҕөр сүбэ-соргу биэрбитэ. Үс хайысханан арахсан, сайдыы хайдах барыан сөптөөҕүн анаарар бырайыактары толкуйдаан оҥорон, көмүскээһин тэриллибитэ. Онон сирдэтэн холбоһук үлэтин сүнньэ торумнаммыта.
Онтон хайыы үйэ 5 сыл ааһа оҕуста. Холбоһук лиссиэй өттүнээҕи салаатыгар баһаарынньык, электромонтер, хайаны байытар үлэ машиниһа, тыа хаһаайыстыбатын маастара, тимири ууһун идэлэригэр үөрэтэр. Манна киэҥ Сахабыт сирин араас улууһуттан 9 кылаас кэнниттэн сыллата баһаарынньык уонна хайаны байытар үлэ машиниһа идэлэргэ элбэх оҕо кэлэн үөрэнэн, идэ ылан бараллар.
Холбоһук дириэктэринэн былырыыҥҥыттан СӨ үөрэҕириитин туйгуна Анна Мосоркина үлэлиир. Кини кэскили көрөн, дириҥник ылсан үлэлии сылдьара барыбытын үөрдэр. Быйыл икки саҥа мастерскойу туруорсан ылла, ону таһынан, үөрэнэр куорпуска, остолобуойга улахан өрөмүөнү ыыттарда. Киниэхэ үөрэх-производство өттүгэр солбуйааччыта Ульяна Егорова, иитэр үлэни сүрүннээччи Надежда Большакова күүс-көмө, өйөбүл буолаллар
Былырыыҥҥы үөрэх дьылыгар улахан ситиһиилэртэн быһа тардан билиһиннэрдэххэ: 2 куурус устудьуона Оконешников Александр бүтүн Арассыыйатааҕы "Путь к успеху" НПК-ҕа кыттан 1 миэстэни ылбыта. Салайааччылара – РФ үөрэҕириитин бочуоттаах үлэһитэ Галина Сорова, маастар Алексей Ксенофонтов.
Өрөспүүбүлүкэтээҕи "Идэ маастарыстыбатын" күрэҕэр холбоһук хамаандата "Быыһыыр үлэлэр" күрэххэ 3 миэстэни ылан, кыайыы өрөгөйүн билбиттэрэ. Салайааччылара – маастардар Геннадий Тарасов, Игорь Васильев.
9 кылаас үөрэнээччитэ Сердцев Женя иккис сылын субуруччу өрөспүүбүлүкэтээҕи "Эдэр профессионаллар" күрэххэ иккис, маҥнайгы миэстэлэри ылбыта. Бу олус туһалаах массыына өрөмүөнүн күрэҕэр Женяны маастар Сергей Петров бэлэмнээн кытынннарар. Ону таһынан устудьуоннар араас күрэхтэргэ, ырыа, үҥкүү бэстибээллэригэр куруук көхтөөхтүк, ситиһиилээхтик кытталлар.
Оскуола үөрэнээччилэрэ 9 кылаас кэнниттэн салгыы лиссиэй бөлөхтөрүгэр көһөн үөрэнэн, аттестаты сэргэ идэ ылан бүтэрэр буоллулар.
Иитэр үлэ оскуоланы кытта сэргэ, тэҥҥэ барар. Оскуолабыт үөрэнээччилэрэ лиссиэй өттүгэр куруһуоктарга дьарыктанан, идэҕэ хайысха ылаллар. Устудьуоннар Харбалаахха баар таас чоҕу хостуур "Төлөн" ААО-ҕа быраактыкаларын бараллар, сорохтор үөрэхтэрин бүтэрэн үлэлии киирэллэр. РФ профессиональнай үөрэҕин туйгуннара, уһуйааччылар Галина Сорова, Антонина Попова, Виктория Григорьева, Виктор Протопопов эдэрдэргэ көмөлөрө, өйөбүллэрэ тугунан да кэмнэммэт.
Харбалаахтааҕы профессиональнай үөрэхтээһин холбоһуга нэһилиэк олоҕор куруук көхтөөхтүк кыттан, сүрүн хамсатар күүс буолар.
Бүгүн "Орто анал үөрэх" күнүнэн бары устудьуоннары, үлэһиттэри, учууталлары эҕэрдэлиибин! Сайдыыга олук уурар, орто анал идэни биэрэр олус туһалаах үлэҕит кэскилэ кэҥээтин, үүнэн-сайдан истин!
Валентина Кривошапкина, СӨ үтүөлээх учуутала. Таатта, Харбалаах.
