Алдаҥҥа «Газпром – оҕолорго» бырагыраама чэрчитинэн 4 тыһ. кв. миэтирэ иэннээх, хатыыскалаах физкультура-успуорт комплекса тутуллан үлэҕэ киирдэ. Комплекс хатыыскатыгар фигурнай хаҥкы уонна хоккей дьарыктара буолуохтара, куорат олохтоохторо уонна ыалдьыттара хаҥкылыы кэлиэхтэрэ.
Комплекс үөрүүлээх аһыллыытыгар Ил Дархан Айсен Николаев успуорт инбэнтээрэ атыылаһарга сэртипикээт туттарда. «Алдан успуорт кыһыҥҥы көрүҥнэрин сайыннарыыга өрүү инники үөҥҥэ сылдьыбыта. Холобура, 1966 сыллаахха манна САССР хоккейга бастакы чөмпүйэнээтэ ыытыллыбыта. Бу эбийиэк «Газпром» көмөтүнэн тутулунна. Маннык комплекстар сотору Нерюнгри оройуонун Чульман бөһүөлэгэр уонна Дьокуускай Марха бөһүөлэгэр аһыллыахтара. Онон, бу саҥа чөмпүйүөннэри иитэн таһаарыыга улахан өҥөлөөх буолуо», - диэн аҕа баһылык санаатын үллэһиннэ. Айсен Сергеевич «Газпром» социальнай көҕүлээһиннэри өйүүр пуондатын кэллэктиибигэр, бэдирээччиттэргэ - «Межрегионгаз Технологии» уонна «Геолайн Технологии» хампаанньаларга махтал суруктары туттарда.
Алдан оройуонун баһылыга Александр Шестопалов үүнэр көлүөнэ оройуоҥҥа оҕо хоккейын уонна инфраструктуратын сайыннарыыны иилээбит-саҕалаабыт спортсмен-энтузиаст Андрей Герасимов үтүө дьыалатын салҕыырыгар эрэнэрин эттэ. Тэрээһин умнуллубат түгэнинэн Ил Дархан Айсен Николаев, Алдан к. «Металлург» хоккейга хамаандатын хапытаана Сергей Климас уонна Аллараа Кураанах «Полюс» хамаандатын хапытаана Александр Амиров бастакы шайбаны оонньотуулара буолла.
Сонун төрдө: CӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, СИА
