Кулун тутар 11 күнүгэр 2023 сыл саамай ураты успуорт тэрээһинэ – Сахалин хайыһарга марафона буолуоҕа. Арассыыйа араас регионуттан хайыһардьыттар 30 уонна 50 килэмиэтири барыыга күрэхтэһиэхтэрэ. Тэрийээччилэр Саха сирин хайыһардьыттарын үрдүктүк сыаналыыллар.
Манна өтөрүнэн хаһан да турбатах улахан кээмэйдээх бириис пуондата - 2 мөлүйүөн солкуобай түҥэтиллиэҕэ. 50 килэмиэтиргэ кыайбыт хайыһардьыт 300 000 солк. тутуоҕа. Күрэхтэһиигэ сайаапканы ылыы https://skisakhmarathon.ru/ сайтка барыаҕа. Улахан дьон бөлөҕөр 18 үөһэ саастаахтары күүтэллэр. Маны таһынан, 3-6 саастаахтар 500 м, 7-10 саастаахтар 1 км, 11 үөһэ саастаахтар 5 км барыыга холонуохтарын сөп. Онон, дьиэ кэргэнинэн хайыһардыыр дьоҥҥо бэртээхэй кыах бэриллэр.
Марафоҥҥа кыттааччылар биир туочукаттан биир туочукаҕа сис хайаны туораан бараллар. Кинилэр 50 км тухары үөһэттэн Сахалин дьикти кэрэ айылҕатын – Охотскай муораны уонна хаарынан үллүктэммит хайалары кэрэхсээн ааһыахтара.
Тэрийээччилэр бэлэмнэнэргэ анаан 12 км-дээх хайыһар суолун хайыы сахха бэлэмнээбиттэр. Тохсунньу 31 күнүгэр диэри сайаапка ыыппыт быраастан көҥүллээх, страховкалаах дьоҥҥо барыларыгар кыттар нүөмэр биэриэхтэрэ. Марафон тэрийээччилэрэ - Сахалин уобалаһын салалтата, Успуорт бэлэмнэнии киинэ, Russialoppet.
Сонун төрдө: Марафон пресс-сулууспата
