Саха сирин дуобат оскуолатын иитиллээччитэ Александр Ефимов 100 харахтаах дуобакка аан дойду бэһис чөмпүйэнээтигэр доруобуйаларынан хааччахтаах спортсменнар ортолоругар кыайыылаах таҕыста. Кини Арассыыйа гроссмейстерын нуорматын толордо. Аан дойду дуобакка чөмпүйэнээтэ ыам ыйын 19-31 күннэригэр Турция Кемер куоратыгар ыытыллар.
Чөмпүйэнээккэ 7 дойдуттан араас категориянан инбэлиит ахсааныгар киирэр күүстээх дуобаччыттар кытталлар. Арассыыйа аатын көмүскүүр спортсменнар ортолоругар Петр Ушницкай тириэньэрдээх Александр Ефимов, Джулиана Андреева уонна Сайыына Юнчанова бааллар.
«Александры кытта дьарыктаммыппыт тоҕус сыл буолла. Былырыын Европа чөмпүйүөнэ буолбута уонна аан дойдуга иккис миэстэни ылбыта. Саша истибэт оҕолорго аналлаах өрөспүүбүлүкэтээҕи интэринээт-оскуоланы бүтэрбитэ. Билигин ХИФУ физическэй култуура институтугар үөрэнэр. Бэйэм 2015 с. аан дойду чөмпүйүөнэ уонна Арассыыйа инбэлиит-спортсменнарын ортолоругар бастакы гроссмейстер буолбутум. Оттон билигин үөрэнээччилэрим ситиһиилэриттэн үөрэбин», - диэн тириэньэр Петр Ушницкай кэпсээтэ.
Күрэхтэһии түмүгүнэн, Александр Ефимов - эр дьоҥҥо 1 миэстэни уонна түргэн дуобакка 2 миэстэни, Джулиана Андреева – дьахталларга 2 миэстэни, Сайыына Юнчанова – 24 диэри саастаах кыргыттарга 1 миэстэни ыллылар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: "Айар кут" холбоһук
Сэҥээриилэр
Also visit my web page XZT Mini Bug Zapper
Reviews: https://xztminibugzapper.com