Быйылгы Сылгыһыт күнүн чэрчитинэн бэрт сэргэх уонна ураты тэрээһин буолар буолбут.
Саха сылгытын сүүрдүү кулун тутар 24 күнүгэр Нам улууһун Таастаах нэһилиэгин Өргөлөөҕөр саҕаланан баран, Бартыһаан нэһилиэгин “Үчүгэй Алаас” ипподромугар түмүктэнэр. Ол эбэтэр, сылгылар 60 км сүүрэллэр!
Сүүрдүүгэ 5-тэриттэн үөһэ саастаах, приленскэй уонна мэгэдьэк боруодалаах көлүүр аттар кытталлар. Маныаха кыттааччы ат арҕаһын үрдүгэ – 147 см, уҥуоҕун (костистость) ииндэксэтэ 14 %-тан аҕыйаҕа суох буолуохтааҕа ирдэнэр.
Сүүрдүү иннинэ сылгылар икки түһүмэхтээх талыыны ааһаллар (экстерьерин сыанабыла, кээмэйдэрин устуу). Бастакы, быһа барыллаан талыыны, миэстэтигэр баар “Сахаагроплем” исписэлиистэрэ кулун тутар 15 к. диэри ыыталлар. Ол талыыга киирсэр гына, ТХУлар сүүрдүүгэ кыттар сайаапкаларын кулун тутар 1 күнүгэр диэри “Сахаагроплемҥа” ыытыахтарын наада. Иккис, сүрүн талыыны Судьуйалар кэллиэгийэлэрэ Таастахха бэйэтигэр кулун тутар 22 күнүгэр сарсыарда 10 ч – 19 ч диэри уонна сарсыныгар 10 ч – 13 ч диэри ыытыахтара.
Сылгылар кытталларын туһунан официальнай, анал халыыпка толоруллубут сайаапкалары “Сахаагроплем” тэрилтэ кулун тутар 16 күнүгэр киэһэ 17 ч диэри тутар.
Сайаапкаҕа киирсэр: сылгы аата, дьүһүнэ, сааһа, сүүрдээччи АААА, төрөөбүт сыла, үлэлиир хаһаайыстыбата, камзолун өҥө, страховкаламмыт тэрилтэтин аата, хамаанда салайааччытын илии баттааһына, бэчээтэ. Ону таһынан кыттар сылгы аайы 1000 солк. усунуос төлөнөр. Судьуйа кэллиэгийэтин эбэтэр бэтэринээр сулууспатын быһаарыытынан, сүүрдүү иннинэ сылгы кыттыбат түбэлтэтигэр ити төлөбүр төннөрүллэр.
Сүүрүүгэ кыттар сылгы хайаан да 1 эбэтэр 4 №-дээх бэтэринээр ыспыраапкалааҕа ирдэнэр.
Сылгыһыт 18-ын туолбут буолуохтаах.
Сылгылар итинник уһуҥҥа булгуччу атара сиэлиинэн, туос бөтөрөҥүнэн эрэ айанныахтаахтар диэн ирдэбил турбат, сиэлэн, дьоруолатан, хааман да ылаллара көҥүл. Айаннарын хас 5 км аайы сылгыһыттар бэлиэ хаалларан иһиэхтэрэ. Хас 20-с км аайы тохтоон, сынньанан, сылгыларын туругун көрөн-үөрэтэн ааһыахтаахтара этиллэр.
Хонтуруоллуур сиргэ сүүрүктэри бэтэринээр быраас көрөр. Сылгы эчэйиилээх, доҕолоҥнуур дуу түгэнигэр, эбэтэр сылгы олус илистибит буоллаҕына, сүүрдээччи сылгытын туруга сэрэхэдитэриттэн тохтуурга сананнаҕына, судьуйа кыттыыттан тохтотор бырааптаах.
Сүүрдүүгэ киирии жеребьевката кулун тутар 23 күнүгэр күнүс 15 ч Өргүөлээххэ ыытыллар. Кыттааччыларга нүөмэр бэриллэр. Биэтэккэ инники кэлбит сылгы кыайар.
Кыайыылаахха – “Беларусь” тыраахтар, 2-с миэстэлээххэ – “Синтай”, оттон үһүскэ – “Буран” туттарыллыа!
