Нам улууһун киинигэр “Дыгын оонньууларыгар” сүүмэрдиир күрэстэһии иккис түмүктүүр түһүмэҕэ буолан ааста.
Алта путевка иһин 49 спортсмен күөн көрүстүлэр. Икки күннээх күрэстэһии түмүгүнэн Петр Старостин (Чурапчы), Артем Варданян (Нам), Леонид Филиппов (Амма), Алексей Иванов (Үөһээ Бүлүү) уонна Айсен Семенов (Өлөөн) бастыҥ буоллулар. Алтыс путевка хаһаайынынан 23 саастаах Томпо улууһуттан сылдьар Алексей Протодьяконов буолла.
2014 сыллаах “Дыгын оонньууларын” кыайыылааҕа Петр Старостин путевканы ыларыгар ким да саарбахтаабатаҕа. Кини сэттэ көрүҥтэн түөрдүгэр бастыҥ этэ. Ол курдук, тутум эргииргэ 61 эргийдэ, 400 м сүүрүүгэ 53,27 сөк көрдөрүүлээх, оҕунан ытыыга 38 очукуолаах уонна 115 кг ыйааһыннаах тааһы көтөҕүүгэ 153 м хааман барыларын кэннигэр хаалларда. Инньэ гынан, тус бэйэтин рекордун олохтоото. Атын да көрүҥнэргэ куһаҕана суох көрдөрүүлээх. Холобур, ыстаныыга (32,05 м) уонна хапсаҕайга бэһис буолла. Оттон мас тардыһыытыгар 13 миэстэни ылла. Онон, быйыл Петр Старостин “Дыгын оонньууларын” үс төгүллээх чөмпүйүөнүгэр Егор Филипповка күүстээх утарылаһааччы буолара саарбаҕа суох.
Иккис миэстэни ылбыт Артем Варданян бары көрүҥнэргэ бастыҥнар кэккэлэригэр сылдьыбыта. Тааһы көтөҕүүгэ эрэ ахсыс миэстэни ылла.
Леонид Филиппов 50 очукуолаах үһүс миэстэни ылла. Кини сүүмэрдиир бастакы түһүмэҕи көтүппүтэ уонна түмүктүүр түһүмэххэ баҕалаах путевканы ылла. Ол курдук, тутум эргииригэр 58 эргийэн иккис, 400 м сүүрүүгэ 54,34 сөк көрдөрдө, оттон ыстаныыга 32,22 м ырааҕы баран төрдүс буолла. Ытыыга – сэттис, хапсаҕайга – алтыс, тааһы көтөҕүүгэ 11-с буолла. Мас тардыһыытыгар 18 миэстэни ылла.
Төрдүс уонна бэһис миэстэлэри Алексей Иванов уонна Айсен Семенов ыллылар. Кинилэр “Боотур” успуорт кулуубуттан кытталлар. Алексей ыстаныыга 24 миэстэни ылла. Ол эрэн көрүҥ аайы көрдөрүүлэрин тупсаран, тааһы көтөҕүүгэ үһүс буолла. Инньэ гынан, сүүмэрдиир түһүмэҕи төрдүс миэстэлээх түмүктээтэ.
Айсен Семенов ааспыт сыллаахха бэһис миэстэҕэ тахсыбыта. Быйыл күүс өттүнэн биллэ эбиллибитэ тута көстөр. Ол курдук, быйыл 80 кг диэри ыйааһыннаахтарга мас тардыһыытыгар өрөспүүбүлүкэ чемпионатыгар бастаабыта уонна хапсаҕайга үһүс буолбута. Дыгын оонньууларыгар диэри сүүрүүтүн, ыстаныытын тупсардаҕына уонна түтүм эргииригэр үчүгэй көрдөрүүнү оҥордоҕуна күүстээх утарсааччы буолара саарбаҕа суох. Намҥа хапсаҕайга бастаабыта, оҕунан ытыыга иккис уонна мас тардыһыытыгар, тааһы көтөҕүүгэ төрдүс буолла.
Алексей Протодьяконов алтыс мэстэни ылан бүтэһик 12-с путевканы ылла. Кини саха национальнай успуордун көрүҥэр саҥа аат буолар. Томпо улууһуттан кыттар бастакы спорсмен. Кини сүүрүүгэ, ыстаныыга уонна мас тардыһыытыгар куһаҕана суох көрдөрүүлээх. Оҕунан ытыыга уонна тааһы көтөҕүүгэ уон иһигэр киирбитэ. Тутум эргииригэр 41 эргийэн 22-с миэстэ оттон хапсаҕайга 18-с буолла.
Быйылгы “Дыгын оонньууларын” кыттыылаахтара: Егор Филиппов (Хаҥалас), Дьулустан Ноговицын (Горнай), Айсен Ботуев (Үөһээ Бүлүү), Павел Друзьянов (Чурапчы), Иннокентий Колесов (Кэбээйи), Алексей Уваровский (Кэбээйи), Петр Старостин (Чурапчы), Артем Варданян (Нам), Леонид Филиппов (Амма), Алексей Иванов (Үөһээ Бүлүү), Айсен Семенов (Өлөөн), Алексей Протодьяконов (Томпо).
