Киир

Киир

Атырдьах ыйыгар Турцияҕа нуучча дуобатыгар улахан турнирдар утуу-субуу ыытылыннылар.

Дуобат ити көрүҥэ “дуобат-64” диэн аатынан эмиэ биллэр. Ол аата дуобатчыттар 64 харахтаах дуоскаҕа оонньууллар. Турция Аванос диэн куоратыгар бастаан (атырдьах ыйын 10-19 күннэригэр) дьахталларга уонна эр дьоҥҥо Европа чөмпүйэнээтэ ыытыллыбыта.

Дуобатчыттар бастаан “классическай” бырагыраамаҕа күөн көрсүбүттэрэ. Күрэхтэһии финальнай чааһыгар Сандаара Апросимова уонна Альбина Большакова аҕыс бастыҥ дуобатчыт иһигэр киирэн – гроссмейстердары, аан дойду чөмпүйүөннэрин кытта оонньообуттара. Манна 9-с кылаас үөрэнээччитэ Сандаара Апросимова утарылаһааччыларын барыларын кыайан бастакы миэстэҕэ тахсыбыта. Инньэ гынан Сандаара Апросимова – 64 харахтаах дуобакка Европа чөмпүйүөнэ!

Дуобатчыттарбыт сити0иилэрэ 2

Түргэн бырагыраамаҕа Астрахань кыыһа Жанна Бупеева бастаабыта. Кини нуучча дуобатыгар аан дойду икки төгүллээх чөмпүйүөнэ (2013, 2017). Бу бырагыраамаҕа Сандаара Апросимова иккис, оттон Наталья Шестакова үһүс миэстэҕэ тахсыбыттара. Эр дьоммутуттан классическай уонна түргэн бырагыраамаларга биир да дуобатчыппыт бириистээх миэстэҕэ тиксибэтэҕэ.

Аан дойду хас да төгүллээх чөмпүйүөнэ, гроссмейстер Гаврил Колесов “чаҕылҕан” бырагыраамаҕа Европа чөмпүйүөнүнэн буолбута. Быһаарыылаах баартыйаҕа Гаврил Колесов – нуучча дуобатыгар аан дойду икки төгүллээх чөмпүйүөнэ, гроссмейтер Александр Белошеевы кыайбыта.

Ити кэнниттэн эр дьоҥҥо уонна дьахталларга хамаанданан бастыыр иһин аан дойду чөмпүйэнээтэ ыытыллыбыта (атырдьах ыйын 19-22 күннэригэр). Эмиэ 64 харахтаах дуоскаҕа оонньонор нуучча дуобатыгар.

Саха сирин дуобатчыттара ити күрэхтэһиигэ “Арассыыйа – Уһук Илин” диэн ааттаах хамаанданан кытыннылар. Хамаанда састааба маннык этэ: Андрей Федотов, Николай Стручков, Николай Гуляев, Тунаара Федорова, Сайыына Попова, Сандаара Апросимова уонна Алена Большакова.

“Рапид” диэн ааттаах бырагыраамаҕа кыргыттарбыт, успуорт маастардара Тунаара Федорова уонна Сайыына Попова чаҕылхайдык оонньоон бастакы миэстэҕэ тахсыбыттара. Иккис миэстэҕэ – Украина хамаандата (гроссмейстердар Елена Короткая, Юлия Макаренкова). Оттон үһүскэ – “Арассыыйа-Урал” хамаанда (гроссмейстердар Жанна Бупеева, Кристина Ватолина).

Оттон эр дьон хамаандата “рапид” бырагыраамаҕа иккис, “чаҕылҕан” бырагыраамаҕа үһүс миэстэлэргэ тахсыбыттара.

Федор РАХЛЕЕВ

Тарҕат:

Санааҕын суруй

Бүтэһик сонуннар