Норвегияҕа Осло куоракка көҥүл тустууга аан дойду чөмпүйэнээтэ түмүктэннэ. 57 киилэҕэ диэри Белоруссия былааҕын көмүскүүр Уус Алдантан төрүттээх Арыйаан Тютрин спортивнай олоҕор бастакы улахан ситиһиилэннэ.
Аан дойду көбүөрүгэр Арыйаан Грузия, Монголия бөҕөстөрүн кыайа туппута. Финал чиэппэригэр Ирантан Алиреза Сарлагы 6-1 ахсаанынан кыайан иһэн, иккис эргииргэ хотторон хаалбыта. Салгыы Сарлак киирсиитин кэтээбиппит. Финал аҥаарыгар Иран бөҕөһө Турцияттан уопуттаах Сулейман Атлины кыл-мүччү кыайан, биһиги уолбутугар санааны көтөҕөр хапсыһыыларга суолун тэлбитэ. Арыйаан Эквадор бөҕөһүн 10-0 ахсаанынан эрэллээхтик кыайан, аччыгый финалга Сулейман Атли утары тахсыбыта. Турок Дьобуруопа икки төгүллээх кыайыылааҕа, аан дойду призёра. Ол эрээри Арыйааммыт хабыр хапсыһыыга бүтэһиккэ диэри үлэлээн, табыгастаахтык көмүскэнэн, кыайыылаах таҕыста. Туроктар бөҕөспүтүн “бүтэһик сөкүүндэлэргэ куота сырытта” диэн челлендж быраҕан көрбүттэрин судьуйалар видеоны көрөн баран, кыайыыны саха уолугар биэрдилэр. Көрсүһүү 3-1 ахсааҥҥа түмүктэннэ. Онон бу историческай мэтээли Арыйаан Тютрин саха норуотугар алта сыл буолан баран аҕалла. Саха сирин бөҕөстөрө аан дойду түһүлгэтиттэн бу 18-с мэтээллэрэ буолла (7 кыһыл көмүс, 2 үрүҥ көмүс, 9 боруонса). Манна даҕатан эттэххэ, бу сыл Арыйааҥҥа таһаарыылаах буолла. Иван Ярыгин уонна Александр Медведь норуоттар икки ардыларынааҕы турнирдарыгар кыайбыта.
Норвегияҕа аан дойду түһүлгэтигэр алта саха бөҕөһө тахсан туһунна. Белоруссия хамаандатыттан – Арыйаан Тютрин, Андрей Бекренёв, Ньургун Скрябин, Польшаттан – Эдуард Григорьев, Македонияттан – Владимир Егоров, Румынияттан Николай Охлопков кытыннылар. Хомойуох иһин, Арыйаантан ураты ким да миэстэлэспэтэ. Киһи сонньуйуох, 61 кг ыйааһыҥҥа үс уолбут бэйэ-бэйэлэригэр түбэһэн хаалбыттара. Аны Арыйаан боруонса иһин киирсэр күнүгэр (Саха сиригэр хапсыһыы түүн көстүбүтэ) ыалдьааччылар тустуу хаамыытын кэтииллэригэр социальнай ситимнэр арахсаннар, харгыстары үөскэппиттэрэ. Онон үөрүүлээх сонун интэриниэт ситимигэр сарсыҥҥытыгар биирдэ тахсыбыта.
