Саха сириттэн кынат анньыммыт "Азия оҕолоро" норуоттар икки ардыларынааҕы спортивнай оонньуулар сэттис төгүлүн 2022 сыл сайыныгар Владивосток куоракка ыытыллыахтара. Бу туһунан оонньуулары тэрийэр тэрилтэ пресс-сулууспата иһитиннэрэр.
Онуоха туһааннаах сөбүлэҥи бэҕэһээ, алтынньы 13 күнүгэр, Приморье губернатора Олег Кожемяко уонна оонньуулар кэмитиэттэрин бэрэсидьиэнэ Владимир Максимов түһэристилэр. Инньэ гынан, сайыҥҥы оонньуулар аан бастакытын өрөспүүбүлүкэ тас өттүгэр ыытыллыахтара. Оонньуулары эһиил от ыйын 27 - атырдьах ыйын 8 күннэригэр ыытаары гыналлар. Губернатор Олег Кожемяко Владивосток оонньуулары үрдүк таһымнаахтык ыытарга бэлэмнээҕин эттэ. Кини кыраай бөдөҥ тэрээһиннэри тэрийиигэ балайда уопуттааҕын бэлиэтээтэ, онуоха Владивостокка туһааннаах инфраструктура номнуо баарын эттэ. Оонньууларга 17 булгуччулаах успуорт көрүҥэ киирэ сылдьар. Приморскай кыраай, оонньуулар хаһаайыттарын быһыытынан, эбии бадминтон уонна үҥкүү успуорда (брейкинг дисциплина), итиэннэ аһаҕас ууга харбааһын уонна греко-римскэ тустууну киллэрэргэ этии киллэрбит.
Инньэ гынан, Владивостокка 19 успуорт көрүҥэр мэтээл кэмпилиэгэ оонньонуоҕа: бадминтон, баскетбол (баскетбол 3х3), күрэш тустуу, хапсаҕайдаһан тустуу, бокса, волейбол (пляж волейбола), дзюдо, чэпчэки атлетика, мас-рестлинг, остуол тенниһэ, харбааһын (ол иһигэр аһаҕас ууга), пулевой ытыы, самбо, спортивнай тустуу (көҥүл, греко-римскэй), оҕунан ытыы, үҥкүү успуорда (брейкинг), тхэквондо, мини-футбол (футзал), художественнай гимнастика.
Спортсменнары уонна триэньэрдэри "Океан" оҕо лааҕырыгар олохтуохтара, онно "Спортсменнар дэриэбинэлэрэ" тэриллиэҕэ, оттон тириэньэрдэри, судьуйалары уонна волонтердары Уһук Илиннээҕи федеральнай университет кампустарыгар олохтуохтара.
Дьиҥэ, "Азия оҕолорор" сэттис сайыҥҥы оонньуулар быйыл ыытыллыахтаахтар этэ, ол эрээри хамсыгынан сибээстээн 2022 сылга көспүтэ.
