Киир

Киир

Үүнэр 2022 сылга Уус Алдан  улууһугар ыытыллыахтаах VIII-с Саха сирин норуоттарын спортивнай оонньууларга бэлэмнэнии тэтимнээхтик салҕанар. Санатар буоллахха, улуус дьаһалтатыгар Оонньуулары тэрээһиннээхтик ыытар туһугар анаан дирекция тэриллэн, салайааччынан улуус дьаһалтатын баһылыгын солбуйааччы Петр Сивцев анаммыта.

Ахсынньы 14 күнүгэр, бэҕэһээ, дирекция бөлөҕө Уус Алдан улууһун Өлтөх, Бэрт Ууһун, Хоро нэһилиэктэригэр үлэлээтэ. Бу туһунан улуус дьаһалтатын пресс-сулууспата @uusaldan.ru бу курдук иһитиннэрдэ:

– Өлтөх нэһилиэгэ улууска киирии аартыгар турар буолан, көрүү-истии, сибэкки олордуута, аартык суолларын ыраастааһыҥҥа элбэх үлэни былааннаан олороллор. Ону сэргэ, от ыйын 3 күнүттэн кыраныыссаҕа кэлбит ыалдьыттары айах тутан, алгыс этэн көрсүү эппиэттээх тэрээһинэ нэһилиэк дьонугар-сэргэтигэр сүктэриллэр.

Бэрт Ууһун нэһилиэгэ Майаҕатта Бэрт Хара төрөөбүт дойдута буоларынан, ыалдьыттар аатын ааттаан-суоллаан, ураты суолталаан кэлиэхтэрэ. Онон Кыыс Хаҥа алааска элбэх ыалдьыт сылдьыаҕа, Майаҕатта Бэрт Хара төрөөбүт сирин-уотун көрүөхтэрэ-истиэхтэрэ, ону сэргэ бэргэн ытааччылар "Спортинг" көрүҥэр күрэхтэһэр түһүлгэлэрэ буолуоҕа.

Тойон Мүрү туонатыгар киирии аартыгын ыраастааһын, киэргэтии Хоро нэһилиэгэр сүктэриллэр. Ону таһынан, Майаҕас бөһүөлэгэ алаас иһигэр турар буолан, оскуолаҕа, спортивнай саалаҕа элбэх ыалдьыты көрсөллөрө былааннанар.

Дирекция бөлөҕө бүгүн Суотту, Бороҕон нэһилиэктэригэр үлэлиир.

Итини таһынан, эмиэ бэҕэһээ улууспутугар Кэбээйи улууһун дэлэгээссийэтэ анаан-минээн эһиилги Оонньууларга бэлэмнэниини билсэ диэн ыалдьыттаата. Ол курдук, Кэбээйи улууһун баһылыгын солбуйааччы Тимофей Григорьев, улуус дьаһалтатын успуорка управлениетын салайааччы Савва Афанасьев уонна култуура управлениетын салайааччы Алексей Терехов састааптаах оробуочай бөлөх Оонньуулары көрсө тутулла турар эбийиэктэри көрдүлэр, күрэхтэһии кэмигэр Кэбээйи улууһун хамаандата түһэр сирин, онтон да атын тэрээһин боппуруостарын быһаарыстылар.

Бу туһунан кинилэр Инстаграмҥа @sport_kobyai страницаларыгар таһаардылар уонна Уус Алдан улууһун салалтатыгар, баһылык Алексей Федотовка махтаналларын, Уус Алдан сиригэр буолар Оонньуулары кэтэһэллэрин биллэрдилэр.
Уус Алдан 2

Сигэтэ: https://xn--80aahjj1a2au6hb.xn--p1ai/article/34499
Тарҕат:

Санааҕын суруй