Киир

Киир

Ахсынньы 19 күнүгэр, Санкт-Петербург куоракка, олимпиада чөмпүйүөҥкэтэ Наталья Воробьева бирииһигэр, көҥүл тустууга күрэхтэһии буолла. Манна Саха сириттэн аҕыс саастаах кыысчаан Варя Явловская кыттыыны ылла.

Кырачаан спортсменка 30 киилэҕэ диэри ыйааһыннаах кыргыттар ортолоругар кыайыылааҕынан таҕыста. Утарсааччыларын барыларын тушаҕа кыайда.

Ыспыраапка: туша — партерга тустуук балаһыанньата, маныаха, тустааччы утарсааччытын икки сөкүүндэттэн өр туттаҕына, киниэхэ тута кыайыы биллэриллэр. Кимэн киирээччи утарсааччытын көбүөргэ икки лаппаакыларын хам баттыахтаах уонна оппонеҥҥа хотторуу буолбутун биллэриэхтэригэр диэри маннык тутуохтаах.

Тустукиска 2

Варя Явловская ахсынньы 11 күнүгэр 8 сааһын туолбут. Кини Нам улууһун Бөтүҥ нэһилиэгэр иккис кылааска үөрэнэр, үөрэҕэр үчүгэй, уруһуйдуурун сөбүлүүр. Варя көҥүл тустууну олус сөбүлүүр, иллэҥ бириэмэ көһүннэр эрээри, успуорт саалатыгар дьарыктанар. Кыысчаан бииргэ төрөөбүт Влад диэн убайдаах, кини эмиэ тустуунан дьарыктанар, балтытыгар үтүө холобур буолар. Варя тириэньэрэ – Бөтүҥ орто оскуолатын физкультураҕа учуутала.

Салгыы, Варяны ахсынньы 25 күнүгэр, Благовещенскай куоракка күрэхтэһии күүтэр. Онно кини кыргыттары эрэ кытта буолбакка, уолаттардыын эмиэ киирсиэхтээх.

Тарҕат:

Санааҕын суруй