Тохсунньу 19 күнүттэн 23-р диэри, Уссурийск куоракка, остуол тенниһигэр биирдиилээн уонна хамаанданан Уһук Илин уокуругун чөмпүйэнээтэ буолан ааста. Ыытыллыбыт күрэхтэһиилэргэ Уһук Илин Магаданыттан, Сахалин уобалаһыттан, Хабаровскай, Приморскай уонна Забайкальскай кыраайдартан, Бурятия уонна Саха Өрөспүүбүлүкэтиттэн күүстээх хамаандалар кытыннылар. Бу туһунан sportyakutia.ru иһитиннэрэр.
Саха сирин хамаандата толору кыттан, хас даҕаны категорияҕа бириистээх миэстэҕэ тигистэ.
Дахталлар икки ардыларыгар биирдиилээн күрэххэ, өрөспүүбүлүкэ чөмпүйүөнэ, Арассыыйа успуордун маастарыгар хандьыдаата Ольга Тихонова үчүгэй көрдөрүүлээх буолла. Кини боруонса мэтээлин ылла.
Эр дьоҥҥо, пааранан разряд көрүҥэр Василий Румянцев уонна Ньургун Сабарайкин үрүҥ көмүскэ тигистилэр, кинилэр Михаил Ивановка уонна Михаил Бутылевка эрэ хоттордулар. Биир дойдулаахпыт Владислав Тимофеев Архангельскайтан сылдьар Павел Тарутинныын паараҕа үһүс миэстэ буолулар.
Хамаанданан күрэххэ, эр дьоҥҥо уонна дьахталларга саха сирин теннисистэрэ үһүс бочуоттаах миэстэҕэ тигистилэр.
Саха сирин эр дьонун хамаандатын кыттыылаахтара: Василий Румянцев, Ньургун Сабарайкин, Михаил Кылабысов, Константин Владимиров уонна Богдан Капитонов. Дьахтар хамаандатын кыттыылаахтара: Ольга Тихонова, Анита Ноговицына, Айыына Петрова, Арина Федорова уонна Надежда Аммосова.
Хамаанданан оонньуу түмүгэ:
Эр дьон:
1 м. Приморскай кыраай
2 м. Бурятия Өрөспүүбүлүкэтэ
3 м. Саха Өрөспүүбүлүкэтэ
3 м. Сахалин уобалаһа.
Дьахталлар:
1 м. Забайкальскай кыраай
2 м. Приморскай кыраай
3 м. Саха Өрөспүүбүлүкэтэ
3 м. Хабаровскай кыраай
