Муус устар 2-3 күннэригэр Дьокуускайга Бүтүн Арассыыйатааҕы ГТО (Готов к труду и обороне) физическэй култуура уонна успуорт бэстибээлэ ыытыллар. Манна үлэ кэллэктииптэрэ, судаарыстыбаннай уонна муниципальнай тэрилтэлэр үлэһиттэрэ кыттыахтара. Тэрээһин чөл олоҕу уонна маассабай успуорду көҕүлүүр соруктаах.
Быйылгы бэстибээл «Туймаада» стадиоҥҥа уонна «Чолбон» бассейыҥҥа буолуоҕа. Күрэхтэһии түмүгүнэн бу сыл ыам ыйын 15 – 20 күннэригэр Екатеринбург куоракка Бүтүн арассыыйатааҕы ГТО бэстибээлин түмүктүүр түһүмэҕэр Саха Өрөспүүбүлүкэтин аатын көмүскүү барар хамаанда сүүмэрдэниэҕэ.
ГТО нормативын толорбут дьоҥҥо СӨ физическэй култуураҕа уонна успуорка министиэристибэтин бирикээһинэн успуорт сорох эбийиэктэригэр сылдьыыга чэпчэтии көрүллэрин бэлиэтиир тоҕоостоох. Ол курдук: «Триумф», «Дохсун», Дворца спорта «Кыайыы 50 сыла» успуорт дыбарыаһыгар, «Чолбон» бассейыҥҥа, «Туймаада» стадиоҥҥа уо д.а. Чэпчэтии кээмэйэ кыһыл көмүс бэлиэлээхтэргэ 50%, үрүҥ көмүс бэлиэлээхтэргэ – 40%, боруонса бэлиэлээхтэргэ – 30% буолар.
Бүгүҥҥү, муус устар 1 күнүнээҕи туругунан, сүүмэрдиир күрэхтэһиилэргэ 60-тан тахса киһи кыттаары суруйтарбыт. Өрөспүүбүлүкэ олохтоохторо улуустарга баар ГТО 42 тургутар киинигэр тиийэн күүстэрин холонон көрүөхтэрин сөп. Оттон Дьокуускайга оннук тургутууну олохтоммут бэрээдэгинэн 1№-дээх ДЮСШ ыытыаҕа.
Киин куораттааҕы ГТО бэстибээлигэр 25-тэн 59-ка диэри саастаах эр дьон уонна дьахтар аймах кыттыахтара.Күрэхтэһии тосхолугар ГТО тургутуутун сүрүн көрүҥнэрэ: уһуҥҥа сүүрүү, турникка тардыныы, сиртэн анньыныы, электроннай саадахтан ытыы, харбааһын, имигэс буолууга хамсаныы, ис былчыҥын хачайдааһын уонна д.а. киирдилэр. Тургутуу уустуга кыттааччы сааһыттан тутулуктаах.
