Ил Дархан коронавирус тула балаһыанньаны бүгүн, сарсыарда 9:30 ч. иһитиннэрдэ.
-- Балаһыанньа дойдуга буола турарын курдук, биһиэхэ да уустугуран иһэр. Эбии саҥа 6 коронавирустаабыт киһи булулунна.Санкт Петербурдааҕы травматология балыыһатыгар хас да киһи ыалдьыбыт эбит. Тыһыынчанан киһи сутуллубут курдук, сүүһүнэн киһи номнуо бигэргэммит. Бу федеральнай балыыһа буолан, манна дойду бары эрэгийиэннэриттэн эмтэнэллэр. Ол иһигэр Саха сириттэн эмиэ ыарыһахтары ыыталыыбыт. Кулун тутарга ити балыыһаҕа биһигиттэн 10 киһи эмтэммит. Оттон Горнайга коронавирустаабыт дьон ити балыыһаттан кэлбиттэр. Бүлүүттэн эмиэ ити балыыһаҕа эмтэммит дьахтар эмиэ коронавирустаабыта билиннэ. Билигин ити травматология киинигэр эмтэммит дьону булаттаан, анаалыстарын ыллыбыт. Хас да улууһунан тарҕаммыт буолан, анаалыстары ылыы бытаан, онон нэдиэлэ устата чопчу түмүк биллиэҕэ. Алдаҥҥа эбии икки коронавирустаабыт киһи бигэргэннэ: Кисловодскайтан кэлбит дьахтар кэргэнэ уонна ырыынак хаһаайына. Ленскэйгэ Газпром вахтовай бөһүөлэгэр ыарыы булулунна. 3 киһиэхэ номнуо бигэргэннэ, өссө 3 киһи уорбаланар. Ленскэй олохтоохторо олохтоох балыыһаҕа, оттон сорохторо Ноябрьск куоракка Газпром сөмөлүөтүнэн көтүөхтэрэ. Билигин Дьокуускайга өссө биир киһи ыалдьыбыт курдук. Саха сиригэр “внебольничная пневмония” диэн элбэх, ити коронавирус диагноһынан буолар.
