Эрэгийиээннээҕи биисинэс-омбудсменнар Арассыыйа субъектарыгар “хоруона хамсыга суох” сиринэн маҕаһыыннары, аптекалары, эргиэн кииннэрин уонна саататар сирдэри оҥорорго туруорсаллар. Кинилэр саныылларынан, итинник миэрэлэр нэһилиэнньэ вакцинаны ыла сүүрэригэр тиэрдиэхтэрэ үһү. Бу туһунан URA.ru суруйар.
“Өскөтүн бородуукта маҕаһыыннарын “хоруона хамсыга суох” зонатынан оҥордохпутуна, дьон бородуукта атыылаһа күн аайы сылдьарын учуоттаатахха, вакцинаны биэрии тэтимэ начаас улаатыаҕа, икки нэдиэлэ иһинэн дойду 60 бырыһыан олохтооҕо быһыыны туруортарыаҕа”, - диэн Башкирия урбаанньыттарын бырааптарын көмүскүүр боломуочуйалаах Флюр Асадуллин эппит. Маныаха кини былаастар биисинэс дьонтон вакцина сэртипикээтин, ПЦР анаалыһын уонна мэдэссиинэ тэйитиитин (медотвод) бэрэбиэркэлииллэрин иһин барыыр харчыларын кэмпэнсээссийэлиэхтээхтэр диэн бэлиэтээбит.
Флюр Асадуллин этиитин Камчаткатааҕы кэллиэгэтэ Станислав Борцов уонна Краснодар кыраайын омбудсмена Игорь Якимчик өйөөбүттэр. Кинилэр “хоруона хамсыга суох” зоналыранан бородуукта маҕаһыыннарын эрэ буолбакка, өрө баран уопсастыбаннай тырааныспардары, аптекалары, парикмахерскайдары уонна дьон сынньанар сирдэрин билинэргэ эппиттэр.
Оттон Саха сирин, Сахалин, Аллараа Новогород уонна Калининград уобаластарын омбудсменнара ити идеяны утарбыттар уонна “биисинэскэ төттөрүтүн улахан охсуулаах буолуоҕа” диэн сэрэппиттэр.
Москубаҕа соторутааҕыта “хамсыга суох” эрэсиими аптекаларга уонна бородуукта маҕаһыыннарыгар тарҕатары утарбыттара. Дойду тэбэр сүрэҕэр QR-куодунан киирии эрэстэрээннэргэ уонна кафеларга эрэ ыытыллар. Оттон төһө да антителаалардааҕыҥ туһунан ыспыраапкалаах буолларгын, эйигин аһыыр сирэргэ уонна маассабай тэрээһиннэргэ киллэрбэттэр. Маннык дьаһал биһиэхэ сарсыҥҥыттан олоххо киирэр.
Санатар буоллахха, булгуччулаах вакцинаны биэрии 21 эрэгийиэҥҥэ киирэн турар.
