Киир

Киир

Номнуо бэһис сылын «САЮРИ» хампаанньа Дьокуускай куорат дьонун-сэргэтин  үрдүк таһымнаах сибиэһэй  оҕуруот аһынан күндүлүүр.

Сэтинньи 19 күнүгэр, РФ Уһук Илинин уонна Арктикатын сайдыытын миниистирэ Алексей Чекунов Уһук Хотугу сиргэ төгүрүк сыл тухары тиһигин быспакка үлэлиир агромкомплекс үлэтин-хамнаһын кытары билистэ.

Бу бырайыак «Якутия – Саюри» ТОР –  Саха  сирэ уонна Япония биир тэҥҥэ үлэлэһиилэрин чаҕылхай түмүгэ.  0,1 га иэнээх эспэримиэнниир былаһаакка 2016 с. тутуллубута. Айылҕаттан ыраас бородууксуйаны Саха сирин олохтоохторо биһирээтилэр. 2019 сылтан, 1,2 га иэннээх эбии комплекс тутуллан олоххо киирбитэ.

Бырайыак үһүс уочараттаах үлэтэ – үс түһүмэхтээх. Бастакы түһүмэххэ – былырыын, балаҕан ыйыгар 0,8 г иэннээх тэпилииссэ блоктара тутуллубуттара.

Күн ахсын, «САЮРИ» тэпилииссэлэриттэн 3-5 туонна сибиэһэй бородууксуйа хомуйаллар. Хампаанньа манан эрэ муҥурдаммат. Инникитин – түмүктүүр түһүмэх, бу дьыл ахсынньы ыйыгар 1,2 га иэннээх 6 эбии тэпилииссэ блоктара тутуллуохтаахтар.

Тэрилтэ толору кыаҕынан үлэлээтэҕинэ, оҕуруот аһын атыытын уонна тиэрдиитин географическай ыыра өссө кэҥиирэ күүтүллэр. Оҕуруот аһын таһынан, «САЮРИ»-лар эспэримиэн быһыытынан клубника баартыйатын  үүннэрэллэр.

Хампаанньа сүрүннүүр дириэктэрэ Сергей Балнайтис иһитиннэрэринэн: «Лабараторнай чинчийиилэр биһиги бородууксуйабыт үрдүк хаачыстыбылаахтарын туоһулууллар. Үүнээйилэргэ биһиги өрүү айылҕаттан ыраас уоҕурдуулары туттабыт. Дэлэҕэ, биһиги бородууксуйабытын куруук оҕо уһуйаанарыгар тиэрдиэхтэрэ дуо?».

Комплекс бүттүүн үлэлээтэҕинэ, Дьокуускай олохтоохторун оҕуруот аһыгар ирдэбиллэрин 25-30% тиийэ хааччыйыахтаах.

Бу иннинэ, Уһук Илиҥҥи эрэгийэҥҥэ РФ бэрэсидьиэнин бэрэстэбиитэлэ Юрий Трутнев бырабыытылыстыба мунньаҕар бэлиэтээбитинэн, «САЮРИ» хампаанньа сайдыытын туһунан боппуруоһу сиһилии көрүөхтэрэ.

 

Тарҕат:

Санааҕын суруй