Биһиги алтынньыга Улан-Удэҕэ олорор биир дойдулаахпыт, байыаннай чаастары кытта быстыбат ситими олохтоон, сулууспалыы сылдьар, муммут-тэммит саха ыччатыгар көмөлөһөр 65 саастаах Ильина Пелагея Прокопьевна суругун таһаарбыппыт. Онно кини уопсастыбаннай үлэтин билиһиннэрбитэ. Оттон бэҕэһээ кинини кытта билиһиннэрбит Валентина Лукачевская Пелагея Прокопьевнаттан өссө биир истиҥ ис хоһоонноох суругу ыытта:
“Үтүө күнүнэн, кэлэн иһэр Саҥа Дьылынан ытыктабыллаах “Кыым” үлэһиттэрэ!
Мин Кяхтаттан сулууспалаан бүтэн дьиэлэригэр баран иһэр оҕолор тустарынан суруйуохпун баҕардым. Кинилэр ааттара: Ушницкай Дмитрий (Сунтаар, Бүлүүчээн), Максимов Валерий (Нам, Хамаҕатта), Припузов Абек (Хаҥалас, Уулаах Аан).
Пятницаҕа Улан Удэттэн Дьокуускайга быһа риэйсэ көппөккө бу оҕолор оптуорунньукка көтөр буолбуттар. Онтон Дима ийэтэ мин төлөпүөнүм нүөмэрин биэрэн, миигин кытта билиһиннэрбитэ. Уолаттар биэс буолан центрга квартира куортамнаһан олороллор эбит. “Миэхэ кэлэ сылдьаҕыт дуо?” диэбиппэр үөрүүнэн сөбүлэһэн бүгүн үс уол кэлэн ыалдьыттаан, чэйдээн, кэпсэтэн-ипсэтэн уонна наһаа үөрдэн бардылар. Биир массыына мас атыылаһан ким хайытан биэрэрэ буолла диэн олордохпуна хата уолаттар хайытан уонна сааһылаан кэбистилэр.
Эһиги ситимҥит нөҥүө уолаттарга уонна кинилэр төрөппүттэригэр үчүгэй өйдөөх- санаалаах, амарах, аһыныгас майгылаах оҕолору иитэн таһаарбыттарыгар барҕа махталбын тиэрдэбин”.
Биһиги, “Кыымнар”, уолаттарга, аҕам саастаах киһиэхэ улахан көмөнү оҥорбуттарыгар эмиэ олус махтанабыт уонна дьиэлэригэр кэлэн, үөрэҕи-үлэни өрө тутан киирэн, эйэлээх олоҕу уһансалларыгар баҕарабыт! Оттон Пелагея Прокопьевнаҕа чэгиэн туругу, нус-хас олоҕу, үтүөкэн ыалдьыттары!
Бэйэ кэрр.