Киир

Киир

Ааспыт нэдиэлэҕэ Арассыыйа бэчээтин күнүгэр дойду үрдүнэн сырдатар-иһитиннэрэр идэлээхтэри эҕэрдэлээтилэр. Бэчээт күнүн урут хаһыат, сурунаал, кинигэ таһаарар үлэһиттэр эрэ бэлиэтиир буоллахтарына, аны киэҥ эйгэҕэ сырдатар-иһитиннэрэр үлэлээх дьон бары бэлиэтииллэр. Тоҕо диэтэххэ, интэриниэт ситимэ күүскэ сайдан, кинилэр бары биир информационнай хонууга үлэлиир буоллулар.

Онон, бу күн бэчээт, типография, араадьыйа, тэлэбиидэнньэ, пресс-сулууспа бары үлэһиттэрэ бииртэн биир биэриилэргэ, СӨ Бырабыыталыстыбатын, Ил Түмэнин, СӨ Инновацияҕа, сыыппара сайдыытыгар уонна инфокоммуникационнай технологияларга уонна да атын министиэристибэлэр, СӨ Суруналыыстарын сойууһун тэрээһиннэригэр кытыннылар, бастыҥ үлэлээхтэр наҕараада туттулар.  

Биһиги “Кыым” хаһыаппыт үлэһиттэрэ, өрүү да буоларын курдук, эмиэ бастыҥнар кэккэлэригэр киирдилэр. Ол курдук, былырыын «Көмүс бөрүө» хаһаайката буолбут суруналыыспыт Саргылаана Багынанова “Cыл бастыҥ түмүктээх үлэтэ” бириэмийэ лауреата буолла, оттон хаһыат биир бастыҥ көхтөөх суруналыыһа Оксана Жиркова Ил Түмэн Ыччат, физическэй култуура уонна успуорт сис кэмитиэтин бочуотунай грамотатынан наҕараадаланна. Сүрүн тумус туттар киһибит - “Ил Түмэн” бэчээт кыһатын салайааччыта, бар дьон дьокутаата, “Кыым” хаһыаты сөргүппүт Мария Христофорова “Cыл бастыҥ медиа-персоната” ааты ылла. Онон, Мария Николаевна тыл этиитигэр бэлиэтээбитин курдук, сылга биирдэ-иккитэ хайҕанар суруналыыстарга Бэчээт күнэ олус улахан суолталаах уонна үрдүк үөрүүлээх. Эбэн эттэххэ, маннык ситиһиилэр, бэчээт үлэһиттэригэр өрөспүүбүлүкэ өттүттэн өйөбүл баар буолан кэлэллэр.  

Биһиги Бэчээт күнүн тэрээһиннэрин быыһыгар СӨ Инновацияҕа, сыыппара сайдыытыгар уонна инфокоммуникационнай технологияларга миниистирин солбуйааччыта Георгий Андреевтан чааһынай таһаарыылары өйөөһүн туһунан ыйыталастыбыт. Онно кини маннык хоруйдаата:

- Билигин Арассыыйаны утары улахан информационнай сэрии бара турарын бары билэбит. Онон, киэҥ эйгэҕэ сырдатар-иһитиннэрэр үлэни күүһүрдүү, бу хайысханы салгыы сайыннарыы барыахтааҕа өйдөнөр. Бүгүҥҥү уустук быһыыга-майгыга үрдүк таһымнаах суруналыыстары бэлэмнээн таһаарыы, элбэтии – сүрүн сорукпут буолар. Ол быһыытынан, бэчээт кыһаларыгар өйөбүл салҕаныахтаах.

Бу, бастатан туран, өрөспүүбүлүкэбит бастакы уонна соҕотох улахан типографиятын өйөөһүнү кытта ситимнээх. Соторутааҕыта төрүт аатын төнүннэрбит Ю.М.Гагарин аатынан Өрөспүүбүлүкэтээҕи типографиябыт бастакы уонна соҕотох улахан кыһа буолар. Манна өрөспүүбүлүкэ  сүрүн таһаарыылара судаарыстыбаннайыттан, чааһынайыттан тутулуга суох бары бэчээттэнэллэр.

Уопсайынан, өрөспүүбүлүкэбит СМИ бары көрүҥүн өйүүр. Ол эбэтэр, судаарыстыбаннайдары кытары чааһынайдары эмиэ. Ол быһыытынан субсидия барыларыгар көрүллэр. Маны таһынан, чааһынай таһаарыыларга анаан, сыллата Грант олохтуубут. Быйыл үбүлээһин кээмэйэ былырыыҥҥыттан аҕыйыа суохтаах. Эһиги “Кыым” хаһыаккыт, сурунаалларгыт нэһилиэнньэҕэ улаханнык биһирэнэллэр. Ону өйдөөн туран, эһигини бары өттүнэн өйүүргэ кыһаллабыт.

Манна биири бэлиэтиэхпин баҕарабын: хаһыаты, сурунаалы дьиҥ суруналыыстыканы, дириҥ анаарыылаах суруйуулары сэҥээрэр, уһуну-киэҥи толкуйдуур дьон суруталлар. Онон, сурутааччыгыт ахсаана эһиги үлэһиттэргит үрдүк таһымнаахтарын, сөптөөх хайысханы тутуһалларын туоһулуур.

Георгий Андреев эппитин курдук, “Кыым” хаһыат сурутааччылааҕын тухары судаарыстыбаттан өйөбүллээх буолуоҕа. Билигин сурутааччытын ахсаана - 10 тыһ. тахса.  Дойду үрдүнэн кумааҕы таһаарыылар ахсааннара аҕыйыы турдаҕына, бу үчүгэй көрдөрүү. Хаһыат эрэдээксийэтэ тигинэччи үлэлии, хаһыат киһи мыыммат кээмэйинэн тахса турарыгар, СӨ Бырабыыталыстыбата, Ил Түмэн, СӨ Инновацияҕа, сыыппара сайдыытыгар уонна инфокоммуникационнай технологияларга миниистиэристибэтэ, Ю.А.Гагарин аатынан Өрөспүүбүлүкэтээҕи типография улахан өҥөлөөхтөр. Уонна, саамай сүрүнэ, биһиги ааҕааччыларбыт. Барыгытыгар эрэдээксийэ аатыттан барҕа махтал!

Матырыйаалы бэлэмнээтэ Күндэли.

Тарҕат:

Санааҕын суруй

Бүтэһик сонуннар