Аҕыйах хонуктааҕыта "Айыы кыһата" оскуолаҕа поэт оҕолоро тэрийбит Семен Руфов оҕолорго анаан айбыт хоһооннорун "Чыычаахтарбар" кинигэтин биһирэмигэр сырыттым.
Куорат 2-с нүөмэрдээх оскуолатын учууталлара, үөрэнээччилэрэ (поэт кэргэнэ М.С. Арбыкина, кыыһа Евгения Семеновна өр кэм бу оскуолаҕа үлэлээбиттэр эбит), национальнай гимназия оҕолоро, тарбахха баттанар уһуйаан оҕолоро кэлэн хоһоон аахтылар.
Бэртээхэй тэрээһин эрээри хаарыаннаах киэҥ уораҕай кураанаҕын кэриэтэ. Сүдү киһибит Семен Руфовы ахтан-санаан ааһар анал тэрээһиҥҥэ куорат оскуолаларын, чуолаан, саха тылын учууталлара да, үөрэнээччилэрэ да суохтара киһини хомотор. Буолаары буолан, оҕолорго анаммыт кинигэ үөрүүлээх биһирэмигэр.
Семен Руфов биир дьиэ кэргэн ытык аҕата, эһэтэ эрэ буолбатах ээ. Бу Саха Сирин киэн туттуута, саха саҥатын араас омук сиригэр дорҕоонноохтук дуораппыт ытык киһибит. Бу курдук сүдү дьоммутугар сыһыаммытын уларыттахха эрэ сайдыахпыт. Норуоту киэн туттар дьоммут ааттаталлар, ытыктаталлар.
Саха тылын учууталлара бу курдук тэрээһиннэргэ күргүөмүнэн сылдьыахтаахтар, үөрэнээччилэрин угуйуохтаахтар. Бу маннык тэрээһиннэр үөрэтэр программаларыгар киириэхтээхтэр.
Тэрээһиҥҥэ кыттыбыт оҕолор долгуйан туран хоһоон аахтылар. Ардыгар тылларын умналлар, онуоха тастарыгар турар уһуйааччы көмөлөһөр кыаҕа суох - хоһоонун билбэт, телефонун хаһыста...ол тухары кэтэһэн олоруу...Ол курдук уһуйааччы күдээринэ бэлэмнэммит.
Бу тэрээһиҥҥэ суруйааччылартан эмиэ тарбахха баттанар киһи кэлбит. Суруйааччылар сойуустарын салайааччыларыттан Арчылан эрэ баар. Ону тэҥэ, дьокутаат М. Христофорова, М. Силина бааллар.
Олус киэҥ хабааннаах кинигэ выставката тэриллибит. Семен Руфов баай ис хоһоонноох айар-тутар олоҕо көрдөрүллүбүт. Оҕо сылдьан аахпыт кинигэлэрбин-доҕотторбун көрөн үөрдэхпиин! Арбита айымньыларын түмэн таһаарбыта - биир ураты кэрэхсэнэр түгэн.
Онон ийэ тыл сайдыытыгар туруулаһабыт диир буоллахха үгүспүт тус бэйэбит ис турукпутуттан, сыһыаммытыттан саҕалыырбыт тоҕоостоох.
Антонина Ускеева.
