Горнайтан Украинаҕа буола турар анал байыаннай операцияҕа 60 уолбут ыҥырыллан кыттыыны ыла сылдьаллар. Хам-түм да буоллар, кыргыһыы хонуутуттан чугас дьонноругар, доҕотторугар кэлэр буорах сыттаах суруктартан, иһитиннэриилэртэн биллэххэ, бары хорсуннук сэриилэһэллэр. Саха аатын түһэн биэрбэттэригэр эрэл улахан.
Арҕаа дойдулар уһун кэмҥэ бэлэмнээбит оҕуруктаах санааларын толорорго, дойдубутун бэйэлэрин холуонньаларыгар киллэрэр соруктаах Украинаҕа күөртээбит сэриилэринэн, Улуу Арассыыйаны суох оҥорорго туруммуттарын утары, кинилэр аҕа көлүөнэ албан ааттаах суолун тутуһан, бүгүҥҥү эйэлээх олохпутун, кэлэр кэскилбитин чиэстээхтик көмүскүүллэр.
Ол эрээри сорох ардыгар, интернет ситимигэр биһиги өрөспүүбүлүкэбитин, саха норуотун баһааҕырдар суруйуулар тахсалларын киһи хомойо, сүөргүлүү ааҕар.
Ол курдук, ааспыт сыл бүтүүтүгэр, Норуоттар сомоҕолоһууларын күнүгэр, Арассыыйа биллэр “блогера, суруналыыһа, суруйааччыта” дэнэр өйдөөҕүмсүйбүт киһи Андрей Тюняев СВО буола турар Донецкай, Луганскай сирдэригэр сылдьан баран, биир да саханы көрсүбэтэҕин суруйан туран, сахалар Арассыыйаны көмүскүүр санаалара суоҕунан, өссө эбэн национализмҥа буруйдаан, били хайа баҕарар ыарахан түгэҥҥэ бастакынан куотар “крысаларга” тэҥнээн, киэҥ айдааны тардыбыта. Ити хара балыыр этэ. Ону туохтан көрүөххэ сөбүй?
Горнайтан 60 эдэр уолбут, саастаах да дьоммут НАТО сэриитин сэбинэн-сэбиргэлинэн толору хааччыллыбыт Украина националистарын, атын дойду наймыласпыт урдустарын кытта кыргыһа сылдьар кэмнэригэр, була сатаан итинник хой баһын туойуу, дойду иһигэр көбүөхтээн кэлэр национализм түгэнин туоһута этэ. Төһө да кэлин ол урдус видеоролигын уһулбуттарын иһин, кыһыылаах дьыала. Төһөлөөх элбэх киһи ону көрө, ааҕа охсубута, сымыйатын билбэккэ итэҕэйбитэ буолуой?
Россия 146 171 015 нэһилиэнньэтиттэн 300 тыһыынча киһини мобилизациялыырга сорудахтаммытын бары билэбит. Горнай улууһун 12 104 олохтооҕуттан, ити Арассыыйа таһымыгар тэҥнээн көрдөххө (пропорциональнайдык), 25 киһи мобилизацияланыан сөптөөҕө. Анал операцияҕа 60 киһи барбытын таһааран суоттаатахха, бу сэриигэ кыттыы сорудаҕын (былаанын) Горнайдар 240 бырыһыан толорон олороллор. Бу өссө Дьокуускайтан, атын сирдэртэн ыҥырыллыбыт Горнайдары киллэрбэккэ туран. Уонна дьэ, хайдах кыттыбат аатырыахпытын сөбүй, атын да улуустарга оннук буолуо!!! Онон сахалары оннук-манык “түнэлэр” (Тюняевтар), үөдэннэр үөҕэр, баһааҕырдар бырааптара суох, сөптөөх харда бэриллэн иһиэхтээх, ол киэҥник сырдатыллыахтаах.
Бу сыыппараҕа олоҕуран, өссө аһара баран эттэххэ, аны балаһыанньа уустугурдаҕына буолуохтаах кэлиҥҥи мобилизация сорудаҕын, ыарахан усулуобуйалаах, аҕыйах нэһилиэнньэлээх, 50-60 кыраадыстаах тымныыны кытта охсуһан, сайын оттоон-мастаан эрэ тыыннаах хаалар туһугар туруулаһар уолаттардаах тыа сирин дьоно, Горнайдар, ону эмиэ урутаан аһара толорон олорор курдукпут дии...
Киин телевидение биэриитин көрөөччүлэр, сөпкө сөҕөн тураллар. Өрөспүүбүлүкэ дьоно бүттүүн турунан улуустар, куораттар аайыттан түмсүүлээхтик СВО-ҕа көмө оҥороллорунан, сэриилэһэ барбыттар сатабылларын, хорсуннарын, булугастарын-талыгастарын, кимиэхэ баҕарар доҕордуу сыһыаннаахтарын иһин, “Якуты – чудо оружие СВО” диэн ааттыылларын.
Манна сыһыаннаан, кыа хааннарын тоҕон, бэйэлэрин харыстамммакка кыргыһа сылдьар Саха сириттэн барбыт чулуу буойуттарбыт, хорсун быһыылара киэҥник иһиллибэт, ситэ сыаналаммат дуу диэхпин баҕарабын. Төһө да саха дьоно сэмэйдэрин, хайа да наҕараада туһугар сэриилэспэттэрин иһин, ураты хорсун быһыылара, хаарыаннаах уолаттарбыт оҕолорун, кэргэттэрин тулаайах хаалларан, тэҥэ суох кыргыһыыга олохторун толук уурбуттара, кэмигэр уонна сөптөөхтүк бэлиэтэнэ сылдьыан сөп этэ...
Интернет ситимигэр тахсыбыт иһитиннэриилэри көрдөххө, Бурятияттан 8 киһи анал байыаннай операцияҕа (СВО) хорсун быһыыны көрдөрөн, Арассыыйа дьоруойа буолбута. Тыва өрөспүүбүлүкэтин дьоно хайдахтаах курдук, Арассыыйа дьоруойун Мерген Донгагы бүттүүн үөрэн-көтөн көрсүбүттэрэй, чиэстээбиттэрэй?! Татаар норуотуттан 5 киһи Арассыыйа дьоруойа буолбутунан киэн тутталлар. Башкириялар эмиэ кинилэр курдук 5 дьоруойданнылар.
Чукоткаттан Арассыыйа дьоруойа буолбут, хорсуннук сэриилэһэн кыргыһыы хонуутугар охтубут Аймир Миягашевка биир дойдулаахтара өйдөбүнньүк туруордулар. Еврейскай Автономнай уобаластан Арассыыйа дьоруойа буолбут, өссө Эр санааланыы уордьанынан уонна “Хорсунун иһин” мэтээлинэн наҕараадаламмыт Андрей Ковтун аата киэҥник иһилиннэ. Чувашиялар үс дьоруойдарыттан икки Арассыыйа дьоруойун мэтириэтэ почта маркатыгар баар буолла. Калмыкияттан Мингиян Линжиев Арассыыйа дьоруойа буолуон иннинэ, Святой Георгий 4-с степеннээх уордьанынан наҕараадаламмыта. Чеченнэр дьоруойдарын туһунан киэҥник сырдатылынна о.д.а. элбэҕи ааттыы туруохха сөп.
Калмыкия биир хорсун саллаата, Мариупольга сырдык тыына быстыбыт Андрей Кунаковка Арассыыйа дьоруойун үрдүк аатын иҥэрэргэ Элиста куорат классическай гимназиятын кэлэктиибэ этии киллэриитин сэҥээрэн, туруорсан, 5000 тыһ. тахса киһи илии баттаабытын Калмыкия баһылыга Бату Хасиков өйөөн, үрдүкү тэрилтэлэргэ сурук ыыталаабыт. Атын сирдэргэ уопсастыбаннас, ыччаты патриотическай тыыҥҥа иитэр оскуола кытта итинник эмиэ үлэлииллэр, күүскэ туруорсаллар, буойуттарын хорсун быһыыларын билэллэр, кинилэри өйүүллэр, киэн тутталлар эбит.
Саха сириттэн, сөҕөн-махтайан “Чудо оружие СВО” дэммит сахалартан хорсуннук сэриилэспиттэр элбэхтэр, кыргыһыы хонуутугар да дьоруойдуу быһыыны көрдөрөн охтубут уолаттарбыт бааллар эрээри, бүгүҥҥүтэ Арассыыйа дьоруойа суох...
Бүгүн кими да харыстаабат кыргыһыы толоонуттан, буулдьа-буурҕа ардаҕын анныттан, тулаларыгар снаряд эстиититтэн тыыннаах эргиллибит “Боотур” этэрээт байыаһа, тэлэбидиэнньэҕэ эттэ дии: “Саха аатын түһэн биэрбэтибит, хорсуннук сэриилэстибит, снайпердарынан да чулууларбыт, сахалар ат үрдүгэр!!!” диэн.
Хаартыска: "Якутия: Все про СВО" телеграм-ханаалтан
Сэҥээриилэр