Саха норуотун улуу уола диэн ааттанар, норуоппут кэлэр кэскилин түстээбит, бэйэтин олоҕун бүүс-бүтүннүү дойдутун туһугар анаабыт, булгуруйбат кытаанах санаалаах улуу убайбыт П.А. Слепцов-Ойуунускай барахсан сүдү аатыгар сүгүрүйэн туран, пааматынньык турар сирэ сыыһа дии саныыбын.
Норуотун инникигэ сирдээбит, үтүөҕэ-кэрэҕэ угуйбут, уоттаах сытыы тыллардаах улуу убайбыт пааматынньыга бэйэтин дойдутугар сир көстүбэккэ, Орджоникидзе болуоссатын быыкаайык муннугар сэрэммиттии кумуллан тураахтыыра киһини хомотор. Бу дуо, олохпут уйгута тупсарыгар өйүн-санаатын, олоҕун анаабыт норуоппут чаҕылхай уолугар сыһыаммыт? Хас көрдөҕүм аайы аһына, харыһыйа саныырбын суруйдум уонна маннык этиилээхпин:
– Серго Орджоникидзе үлэтэ Ойуунускай тапталлаах норуотун туһугар киллэрбит кылаатыгар ханан даҕаны тиийбэтэ биллэр, онон бу болуоссаты убайбыт аатынан ааттыыр сөп. Бу буолуо этэ, өрөспүүбүлүкэбит баар эбэтэр суох буолар ыарахан күннэригэр булгуруйбакка, кытаанахтык туруорсубут, улуу убайбытыгар улахан махталбыт уонна билиниибит!
Пааматынньыгы “Тамерлан” эрэстэрээн диэки, дьиэлэр быыстарыгар тахсар суолу туораабакка, күн тахсыытын көрсө турарын курдук, туруоруохха сөп.
Норуокка биллэринэн, улуу ойууннар, удаҕаннар 300 сылы быһа дьонноругар-сэргэлэригэр көмөлөһө сыталлар. Син эмиэ ол курдук, улуу убайбыт барахсан санаата кэлэн, тапталлаах норуотугар үйэттэн үйэҕэ күүс-көмө, өй-санаа буола туруо этэ.
Сэҥээриилэр