Өрөспүүбүлүкэ кэллиэксийэhиттэрин сийиэһэ сылын аайы ыытыллара үтүө үгэскэ кубулуйда. Быйылгы түһүлгэ бэс ыйын 4 күнүгэр Өксөкүлээх Өлөксөй аатынан култуура киинигэр ыытыллыаҕа.
Хас биирдии былыргы мал-сал - - олорон ааспыт олохпут кэрэһитэ. Тэрээһин чэрчитинэн дьаарбаҥка ыытыллыаҕа, араас хайысхаларынан быыстапкалар көрдөрүллүөхтэрэ. Сийиэс сүрүн быыстапката Үлэ сылыгар ананар. Бу тэрээһиҥҥэ баҕалаах дьон бары сылдьыахтарын сөп. Киирии - босхо.
Сыл аайы сийиэскэ Саха сирин араас муннуктарыттан 150-ча кэллиэксийэhит кыттыыны ылааччы. Быыстапкаҕа манньыаттар, кумааҕы харчылар, мааркалар, аккырыыккалар, кэмбиэрдэр, значоктор көрдөрүллүөхтэрэ. Сонун, сэдэх мунньуулаахтар да аҕыйаҕа суох буолуохтара.
- Маннык тэрээһиннэр Арассыыйа үгүс куораттарыгар ыытыллаллар, - диир "Саха сирин кэллиэксийэhиттэрэ" уопсастыбаннай тэрилтэ бэрэссэдээтэлэ Никифор Иванов. - Итинник тэрээһиннэргэ дьон бэйэ-бэйэтин кытта билсэр. Дьикти дьарыктаах дьон эспэнээттэрин атастаһаллар, бэйэ-бэйэлэриттэн элбэххэ үөрэнэллэр, мунньуу-хомуйуу сонун ньымаларын кытта билсэллэр. Быыстапка ыалдьыттара даҕаны элбэҕи билиэхтэрэ-көрүөхтэрэ. Кэллиэксийэhиттэр мунньууларын интэриэһиргээбит дьон бары ыйытыыларыгар үөрэ-көтө хоруйдуохтара, эспэнээттэр устуоруйаларын кэпсиэхтэрэ. Быыстапка ыалдьыттара даҕаны бэйэлэрин эспэнээттэрин атастаhыахтарын, атыылыахтарын эбэтэр атастаhыахтарын сөп. Мунньуу-хомуйуу бэрт элбэх хайысхалаах. Урукку улахан түһүлгэлэргэ ол хайысхалары ситэн да аахпатахпыт. Ити боппуруоска биһиэхэ көмө-ньыма буолар дьон баар буоллаҕына үөрүөхпүт эрэ.
Тэрийээччилэр этэллэринэн сийиэскэ соһуччу үөрүүлээх түгэннэр баар буолуохтара. Түһүлгэ ыҥырыылаах ыалдьыттардаах. Кэллиэксийэhиттэргэ соһуччу үөрүү буоларын курдук, тэрийээччилэр кинилэр ааттарын ааттаабаттар
Сийиэс сүрүн тэрийээччитэ - "Саха сирин кэллиэксийэhиттэрэ" уопсастыбаннай тэрилтэ. Кэнники сылларга кэллиэксийэhиттэргэ Өксөкүлээх Өлөксөй аатынан култуура киинэ улахан өйөбүл буолар. Тэрийээччилэр бу киин дириэктэрэ, кинилэр инициативаларын мэлдьи өйүүр Антонида Корякинаҕа улаханнык махтаналлар.
Дьаарбаҥкаҕа кыттыан баҕалаахтар 8(924)662-81-54 нүөмэргэ эрийэн билсиэххитин сөп.
Андрей ШИЛОВ
kyym.ru
