Сыл аайы ахсынньыга Ротшильдтар, Рокфеллердар салайар, аан дойду масоннара мустубут Бильдербергскэй кулууптара “The Economist» сурунаал таһыгар быйыл аан дойдуга туох сабыытыйалар буолалларын таайтарар ребус-хартыыналарын таһаарар. Быйыл Парижтааҕы Олимпиада аһыллыытыгар аан дойдуну туох күүтэрин көрдөрөр конспирология кистэлэҥнэрин үөһэ ааттаммыт “аан дойду көстүбэт бырабыыталыстыбата” таайтарбыт курдук.
Гейдэр глобальнай оргиялара
Парижка Олимпиада аһыллыыта аан дойду итэҕэллэрин барытын хаарыйбыт, төрүт уонна глобалистар өрө тутар сыаннастарын сэриилэһиннэрэр улахан айдааннаах буолла. Олимпиада төрүттэниэҕиттэн эдэр саас, күүс-уох, дьулуур, кыайыы өрөгөйүн бэлиэтэ этэ. Ким да иҥэн-тоҥон Франция быйылгы Олимпиадатын аһыллыыта гейдэр, атыннык эттэххэ, ЛГБТ-лар (Арассыыйаҕа бобуулаах) Европаҕа бас баттах барбыт “халлаан күөх бырааһынньыктарын” чыпчаала буолан, устуоруйаҕа хаалыа диэн санаабатаҕа буолуо. Олимпиада күөрт ыт күлүүтүгэр, эриэн ыт элэгэр барбыта чахчы. Онно холоотоххо, били, Европа былыргы “ведьмалара, колдуньялара” ииригирэр Вальпургий түүннэрэ гейдэри айхаллаабатынан, дьиҥнээх “традиционнай сыаннас” буоллаҕа. Киһи сонньуйуох...
Олимпиада аһыллыы-тыыгар гейдэр саамай улаханнык Леонардо да Винчи “Тайная вечеря” диэн Христос 12 апостолын кытта бүтэһик аһыыр хартыынатын пародиялаан, христианнар итэҕэллэрин үрдүгэр, сымнатан эттэххэ, силлээтилэр-хаахтаатылар, сиргэ-буорга тэбистилэр. Киристиэс оннугар эмис гей дьахтар олордо. Астарыгар диэн халлаан күөх кырааскалаах сыгынньах киһини бодунуоска ууран биэрдилэр. Гейдэр “Тайная вечерянан” эрэ бүппэтилэр, сибэтиэй Троицаны пародиялаан, үс буолан, Париж бибилэтиэкэтигэр бөлөҕүнэн сиэкистии тиийбиттэрин арыллыы церемониятыгар кыбытан, тэлэбиидэнньэҕэ көрдөрбүттэр.
Эмиэрикэ аатырар миллиардера Илон Маск Олимпиада арыллыытын “аан дойду эстиитин вибрацията уонна христианствоны сиргэ-буорга тэпсии” диэбит. Конспирологтар, ити аата, цивилизациялар, итэҕэллэр сэриилэрэ иһэрин түүйдүлэр дуо? Эбэтэр Африка, Азия олус элбэх миграннара кэлэн, Европаны баһылаан эрэллэрин утары “сибэтиэй сэриигэ” үрүҥ дьону өрө туруораары фашистыы илдьит кыбылла сылдьара дуу? Ити чорботон бэлиэтиир, “үрүҥ Европа күнэ киирбит” диэх курдук кыһытардыы, Олимпиада уоттаах факелын үрүҥ олимпийскай чөмпүйүөн икки хара спортсмеҥҥа, Франция гражданнарыгар, Олимпиада уотун уматарга биэрбитэ да көрдөрөр курдук.
Атын итэҕэл дьоно өһүргэннилэр
Тоҕо эрэ ити ииригириини Ватикантан да, Киристиэс таҥара итэҕэйээччилэрин атын салайааччылара да утары саҥарбатылар, ууну омурдубут курдук, “толерантнай” буолан олордулар. Евросойуус салалтата, биир да судаарыстыба салалталара ордоотоон, ыһыытаан буойар, утарар саҥалара эмиэ иһиллибэтэҕэ дьикти. Эрэпэтииссийэ бөҕөтө буоллаҕа дии, өссө анал сулууспалар кэтээтэхтэрэ. Көннөрү европеецтар “Киристиэс оннугар Магомеды гей оҥорон олордубуттара буоллар, мусульманнар бырастыы гыныа суох этилэр” диэн дэлэҕэ этиэхтэрэ дуо? Билигин Европаҕа олус күүскэ исламизация бара турар. Христианство Европа төрүттэммит тирэҕэ да буоллар, кырдьан-бохтон утарылаһар тииһэ-уоһа суох, күнэ киирэн эрэр диэн сэнээн, Коран оннугар Биибилийэҕэ суруллубуту ыллылар дуу?
Гейдэр “тайнай вечерялара” атын итэҕэл дьонун эмиэ өһүргэппит, кыыһырдыбыт. Ислам итэҕэлигэр Киристиэс Иса бороруок диэн ааттанарынан, Иран Франция посолун ыҥыран, Иса бороруогу эмис дьахтар оҥорбуттарыттан өһүргэммиттэрин биллэрбиттэр. Ислам атын дойдулара “Европа киинигэр үрүҥ дьон бэйэлэрэ христианствоны кэһэттилэр” диэн үөрэн эбитэ дуу, саҥарбатылар.
Азия дойдуларыттан кытайдар: “Иуда оннугар азиатка кыыһы олордон, биһиги итэҕэлбитин улаханнык күлүү-элэк гыммыккыт”, – диэбиттэр.
Олимпиаданы тэрийээччилэр эрдэттэн этиһэргэ бэлэмнэммиттэр, саба түһүүлэргэ ““Тайная вечеря” пародиялаан, уопсастыба толерантнай буолбутун айхаллаары гыммыппыт, дьон холкутук ылыммытын көрөн, сыалбытын сиппиппит” диэн, өссө кыһытан биэрбиттэр.
Эмиэрикэ Олимпиаданан сылтаан хараҥа оонньуулара
Кэлиҥҥинэн “аан дойдуну салайар масоннар уонна сионистар кистэлэҥ кииннэрэ” уйаламмыт Эмиэрикэтиттэн Олимпиадаҕа киһи аймах болҕомтото хатанарынан, бэйэлэрин “хараҥа дьыалаларын” сонуннарын тарҕатыыга туттар буолбуттар диэтэххэ, элбэх киһи соһуйуо. Ол эрээри Арассыыйаны утары арҕаалар дьайыылара Олимпиадалары кытта дьиктитик хатыһар.
2008 с. атырдьах ыйын 8 күнүгэр туох буолбутай? Киһи барыта “Пекин Олимпиадата уонна Грузия Арассыыйалыын сэриитэ буолбута” диэ. Ити күн АХШ ускайдаан, Грузия Соҕуруу Осетияҕа саба түспүтэ. Арассыыйа сэриилэрин киллэрэн, биэс күнүнэн Саакашвили хотторбута. Ити ССРС урукку дойдутун Эмиэрикэ сэбилээн, Арассыыйаны сэриилэтэн тургутан көрүүтүн бастакы холонуута этэ. Ол иннинэ эмиэрикэлэр ССРС утары Афганистан моджахедтарын күүстээх сэрии сэбинэн сэбилээн хоппут уопуттаахтара. Олимпиада ыытыллар кэмин кинилэр мээнэҕэ талбатах курдуктар. Путин премьердээн олорон, ити күн Пекин Олимпиадатын аһыллыытыгар кыттаары, Сочи Олимпиадатыгар уопут ылаары Кытайга тиийбитэ. Эмиэрикэ Арассыыйа Путин суоҕар уонна “Кытай Олимпиадатын буортулаамаары” аҕыйах хонукка ылбат-биэрбэт олорон биэрэн, Саакашвили Соҕуруу Осетиятын түргэнник сэриилээн төннөрүө диэн былааннаабыт буолуон сөп. Ол сатамматаҕа.
АХШ Арассыыйаны утары Грузияны уонна Украинаны эрдэттэн утары туруора сатыы сылдьыбыт эбит. 2008 с. саас ити урукку икки ССРС сойууһунай өрөспүүбүлүкэлэрин НАТО-ҕа ыллара сатаабыт. Франция уонна Германия утаран, Грузияны, Украинаны НАТО-ҕа ылбатахтар. Ити кэмҥэ “Украинаны кытта сэрии буолуо” диэн, биһиги түһээн да баттаппат этибит.
Эмиэрикэ НАТО-ҕа ыла сатаабыт дойдуларын утарбыт Европатааҕы сойууһунньуктарын Арассыыйаны утары туруораары, Грузиянан Соҕуруу Осетияны сэриилэппит диэххэ сөп. Улахан Арассыыйа кыракый Грузияны атаҕастыыр дэтээри.
Онтон 2014 с. Сочи кыһыҥҥы Олимпиадатын көрсө, 2013 с. сэтинньитигэр Украинаҕа Майдааны саҕалатар. Олимпиада оонньуулара 2014 с. олунньу 7–23 күннэригэр бараллар. Олунньу 22 күнүгэр Майдаан буолан, бэрэсидьиэннэрэ В.Янукович куттанан куотар, Украинаҕа былаас националистар илиилэригэр киирэр. Украина ити саамай тыҥааһыннаах кэмнэригэр Арассыыйа салалтата Олимпиада дьыалатыттан ордубакка, илиитэ-атаҕа тиийбэккэ, Украинаны быыһыыр суһал дьаһалы ылбатах буолуон сөп. Кэлин Кырыымы ылыы, Донбасс сэриитэ – атын устуоруйа.
Онтон 2022 с. саҕаланыыта арҕаалар Арассыыйа Украинаны НАТО-ҕа ылбаппыт диэн суругунан мэктиэ көрдөөбүтүн толорботохторо. Сөп түбэһии эбитэ дуу, арҕаалар “Олимпиаданан оонньуур албастарын” бэйэлэригэр төттөрү эргитэн дуу, Арассыыйа, Кытайга Пекиҥҥэ ыытыллыбыт Олимпиада оонньуулара түмүктэнэллэрин кэтэһэн баран, олунньу 24 күнүгэр Анал байыаннай эпэрээссийэни саҕалаабыта.
Бэстилиэнэй тыһыынча илдьитэ
Париж Олимпиадатын арыллыытыгар хараҥа күүстэр былыыр-былыр баһа быһыллыбыт Мария-Антуанетта королеваны ыллыы сылдьар төбөтүн туттарбытынан таһааран тугу түүйбүттэрэ буолла? Голливуд аан дойду инники сценарийдарын көрдөрөр дииллэрин тутустахха, зомбилар тустарынан киинэлэрэ аан дойду кэнэҕэс дьон үөрэ буолуо диэн түүйэр дуо? Онто да суох эр киһитэ, дьахтара суох гейдэр саҥа сыаннастарын өрө туппут Европа нэһилиэнньэтэ эстэр туруктаах. Арай миграннар солбуйан, Европаны ислам сирэ оҥорон “быыһыахтарын” сөп ини.
Христианнар сибэтиэй суруйууларыгар ахтыллар ыарыы, өлүү, хаос сүрэ, бэлиэтэ буолар Апокалипсис – бэстилиэнэй тыһыынча илдьитэ дэнэр тимир дьардьама аттаах киһитин Олимпиада арыллыытыгар сүүрдэн, глобалистар Аан дойду үһүс сэриитэ саҕаланаары турар диэн сибикини уобарастаан биллэрдилэр дуу?
Эмиэрикэҕэ “Джорджия скрижаллара” (тааска сибэтиэй суруктар) диэн ааттанар кыраньыыт пааматынньыкка глобалист масоннар, сионистар 8 омук тылынан кэлэр көлүөнэлэргэ илдьиттэрэ баар. Онно Сир саарыгар айылҕаны кытта сөпкө дьүөрэлэһэн 500 мөл. эрэ киһи олорор кыахтаах диэн кэс тыллара сурулла сылдьар.
Биһиэхэ “Эмиэрикэҕэ Трамп бэрэсидьиэн буоллаҕына, сэрии тохтуо” диэн эрэнээччи элбэх. Оттон Трамп “Арассыыйаҕа сэриилэргин таһаарбатаххына, Украинаҕа өссө күүстээх улахан сэрии сэбин биэриэм” диэн куттаан тохтотор былааннаах дииллэр. Биһиэннэрэ куттаналлара биллибэт. Аны туран, НАТО салайааччылара 2028 с. Арассыыйаны утары сэрии буолуоҕа диэн дьоннорун үөрэтэллэр, бэлэмнииллэр.
Оттон олох атын дьиҥнээх иэдээни, Апокалипсиһы аҕалар кыахтаах сэриини Израиль салалтата былаанныы сылдьар эбит. Кинилэр билиҥҥи кэми “Кыһыл муораттан Хара муораҕа диэри, Украина Одесса уобалаһын хаба тэнийэр улуу Израилы тэрийэргэ тоҕоостоох кэм үөскээтэ” диэн ааҕаллар эбит.
Ядернай сэрии Аан Илиҥҥэ саҕаланыа дуо?
Олимпиада иннинэ бэрт дьиктитик Израиль премьер-миниистирэ Б.Нетаньяху Эмиэрикэҕэ “Байдены, Трампы көрсө” диэн сылтаҕыран баран кэлбит. Ити сырыытын Израиль сорох эспиэрэ “Эмиэрикэҕэ масоннар, сионистар кистэлэҥ бырабыыталыстыбаларын кытта көрсө, кинилэртэн Палестина сэриитин Ливаҥҥа, онтон салгыы аан дойдуга Армагеддон сэриитин күөртүөн сөптөөх улуу Израилы тэрийэр былаанын олоххо киллэрэригэр көҥүл ылан, харчынан, сэрии сэбинэн көмөлөһүннэриэх буолан кэллэ” дииллэр. Нетаньяху Эмиэрикэҕэ Аан Илиҥҥэ Израилы кытта НАТО курдук сойууһу тэрийиэххэ диэбитин сөбүлэспиттэрэ, ити көҥүлү ылбытын бигэргэтэр.
Париж Олимпиадата Апокалипсис айдааннаах арыллыытын сарсыныгар, Хезболла Ливантан Израиль Голанскай үрдэллэргэ баар Марджаль-Шамс диэн дэриэбинэтин ытыалаан, стадиоҥҥа путбуоллуу сылдьар 12 эдэр киһи өлөр, 30-тан тахса киһи бааһырар.
Нетаньяху АХШ-тан кэлбитин кэннэ, бырабыыталыстыбалара түүннэри мунньахтаан, Нетаньяхуга уонна оборуона миниистирэ Голаҥҥа “сөптөөх харданы оҥоруҥ, ол аата Ливаны сэриилиэххитин да сөп” диэн диэн көҥүл биэрэр.
Өлүү болдьохтоох, ити кэмҥэ Турция бэрэсидьиэнэ Эрдоган “палестиналары өлөртүүрүн тохтоппотоҕуна, Турция сэриилэрин Ливияҕа, Карабахха курдук Израильга киллэриэҕэ” диэн суоһурҕанна. Эгэ эрэ дуо, сылтах көрдүүр израиллар “оччоҕо эн Саддам Хуссейн кэбин кэтиэҥ” диэн кыһыталлар. Онуоха “Израиль Палестинаҕа геноцидын иһин фашистар курдук эппиэттиэ, Нетаньяху Гитлер курдук дьылҕаланыа” диир. Ити этиһии төһө дириҥиирэ биллибэт. Ол эрээри Израиль бу от ыйын 30 күнүгэр Хезболла Голаннары ытыалаабыт хамандыырын өлөрөөрү, Бейруту аракыатанан ытар. Билигин Хезболла, өлбүт хамандыырын иэстэһэн, Израилы ытыалыахтаах. Онто да суох 12 эдэр дьону өлөрөн, Хезболла сэрии элбэрээгин төлө тарта диэн ааҕаллар. Израиль, сэриилэрин Ливаҥҥа киллэрдэҕинэ, улахан сэрии төлө тардыллыан сөп.
Биһиги оччоҕо араап дойдулара, Иран, Турция уо.д.а. ислам итэҕэллээхтэр бары саба түһэн, Жириновскай эппитин курдук, Израилы суох гыныахтара диэн албыннанабыт. Иһэ истээх дьыала, Израиль 90 ядернай буомбалаах, олор истэригэр куораттары эһэр кыахтаах мегатонна күүстээхтэр бааллар. Ону таһынан ССРС-тан барбыт дьэбириэй учуонайдар бактериологическай, химическэй сэрии сэбин төһөнү оҥорон биэрбиттэрин ким да билбэт. Израиль ити сэрии сэптэрин туттары бобор конвенцияларга илии баттаабатах. Оттон аттынааҕы дойдуларыгар, оннооҕор Ираҥҥа, Турцияҕа итинник идэмэрдээх сэрии сэптэрэ суохтар. Онон Израиль Апокалипсис да оҥорор кыахтаах курдук.
Аан дойду алдьатыылааҕынан ааттанар атырдьах ыйыгар киирдэ, көрөн иһиэхпит.
Владимир Степанов.
