Росстат кэнники 11 сылы түмэн таһаарбыт көрдөрүүтүнэн, күүгэннээх утаҕы оҥорон таһаарыы 2024 сыл бастакы аҥаарыгар 451,4 тыһ. декалитрга тэҥнэспит. Бу былырыыҥҥыга тэҥнээтэххэ 7,3%-нан үрдүк. Ордук элбэх пиибэни бэс ыйыгар оҥорон таһаардылар. Ол эбэтэр, пиибэ сыанатынан да, дьоҥҥо тиийимтиэтинэн да хамаҕатык атыыланар утах буоллаҕа. Нууччалыы өс номоҕун курдук: "Дешево и сердито".
Онуоха, Дьокуускайга билигин даҕаны, өрөспүүбүлүкэ арыгыны утары үтүөкэн бэлиитикэтигэр бэриммэккэ, олорор дьиэлэр аттыларыгар үлэлии турар пиибэлиир бардар бааллар эбит. Ол курдук, Губин уулуссатын 35/1а нүөмэрдээх тутуутугар «Точка» диэн ааттаах «тэрилтэ» сарсыарда 10.00 чаастан түүн 24.00 чааска диэри биирдэ да өрөөбөккө, өссө субуотаҕа түүн 02.00 чааска диэри, эҥкилэ суох үлэлиир. Ону ааһан, арыгы атыыта бобуллан турар «Азия оҕолоро» оонньуу кэмигэр кытары үлэлээбит сурахтаах.
Аттынааҕы дьиэлэр олохтоохторо, былаһааккаларга оонньуур оҕолор күннэтэ ити «тэрилтэ» килийиэннэрин кытта "алтыһар" буоллахтара. 2 ГИС диэн сыһыарыы нөҥүө икки-үс киһи сэмэлии сатаабыттар даҕаны, «Точка» үлэһиттэриттэн уонна килийиэннэриттэн ураты ону ким ааҕыай?
Дьиҥэр, бу туочука сокуоннайа суохтук үлэлии турарын бары бэркэ билэллэр. Ол туһунан киин куорат дьаһалтатын административнай хамыыһыйатыттан ыйыта сырыттыбыт. Эмиэ билэн олороллор. Ол эрээри этэллэр: «Олохтоохтортон полицияҕа үҥсүү киирэ илигинэ биһиги тугу да гынар кыахпыт суох. Онон, үҥсүү суруйалларыгар сүбэлиибит. Арассыыйа борокуратууратыгар ыыттахтарына өссө үчүгэй. Ким баҕарар, оннооҕор ааһан иһэр киһи, үҥсүөн сөп», - диэн сүбэ эрэ биэрэллэр.
Олохтоохтор тоҕо үҥсүбэттэрин билбит суох, ол эрээри сэрэйиллэр. Оттон пиибэлиир бар сокуону кэһэн туран үлэлиирин илэ көрө сылдьар СӨ ИДьМ, СӨ Борокуратуурата, арыгылааһыны утары үлэ ыытар хамнастаах үлэһиттэр, уопсастыбанньыктар тоҕо тугу да гымматтар?
Бэйэ кэр.
