Сэтинньи 25 күнүгэр, Олоҥхо күнүгэр, Ил Дархан Айсен Николаев саха матырыйаалынай уонна матырыйаалынайа суох төрүт култууратын эттэригэр-хааннарыгар иҥэринэ сылдьар 26 киһиэхэ анал истипиэндьийэлэри туттарда. Кинилэр сыл устата ый аайы 30-туу тыһыынча солкуобайдаах истипиэндьийэни ылар буолуохтара.
Ил Дархан эппитинэн, истипиэндьийэ олохтонуоҕуттан итинник бириэмийэни барыта 81 киһи ылбыт. Санаттахха, олоҥхоһуттарга уонна оһуокайдьыттарга аналлаах истипиэндьийэ 2022 с. олохтоммут буоллаҕына, норуот маастардарыгар былырыыҥҥыттан туттарар буолбуттара. Истипиэндьийэ көннөрү туттарыллыбат, ааттара ааттаммыт дьон бары куонкуруһу ааһаллар. Онно хас биирдии киһи олоҥхону, төрүт култуураны, уус дьыалатын сөргүтүүгэ, харыстааһыҥҥа, тарҕатыыга уонна ону ыччат дьоҥҥо тиэрдиигэ ураты кылааты киллэрбиттэрэ, өрөспүүбүлүкэ уопсастыбаннай олоҕор көхтөөхтүк кыттыбыттара – барыта учуоттанар.
Быйыл олоҥхоһуттартан маннык дьон стипендиат буоллулар: Владимир Данилов, Сусанна Лазарева, Любовь Платонова, Гаврил Спиридонов, Мария Стручкова уонна Людмила Цой.
Оһуокайдьыттар: Ирина Абрамова, Александра Артемьева, Лидия Афанасьева, Руф Гаврильев, Лариса Иванова, Мария Чокурова уонна Афанасий Попов.
Уустар: Леонид Говоров, Роман Готовцев, Василий Попов, Илларион Попов, Николай Попов уонна Семен Томскай.
Норуот маастардара: Николай Баишев, Александр Гоголев, Татьяна Карамзина, Афанасий Лопатин, Мария Петрова, Анна Семенова уонна Надежда Колодезникова.
Стипендиаттар ааттарыттан харда тылы оһуокайдьыт Александра Артемьева эттэ. Кини өрөспүүбүлүкэ салалтатыгар саха төрүт култууратын харыстыырга уонна тарҕатарга киэҥ хабааннаах үлэни ыыталларын иһин махтанан туран, үҥкүү тылын таһаарда уонна Ил Дархаҥҥа Амма туойуттан оҥоһуллубут чороону бэлэхтээтэ.
