2011 с. саҕалаан сэтинньи 30 күнүгэр Сахабыт сиригэр Хомус күнэ бэлиэтэнэр. Онон, ити күнү даҕата уһуйааннартан, оскуолалартан саҕалаан өрөспүүбүлүкэ таһымнаах түһүлгэлэргэ тиийэ сахабыт хомуһугар анаммыт араас тэрээһин ыытыллар. Биллэн турар, бу кэрэ-бэлиэ күн биир ураты болҕомто биһиги үүнэр көлүөнэбитигэр – оҕолорбутугар – ууруллар. Ситим быстыбатын, утум салҕанарын туһугар.
Дьокуускай куорат 86-с №-дээх “Колокольчик” уһуйаанын “Күнчээн” сахалыы бөлөҕүн иитиллээччилэрэ, уһуйааччылара уонна төрөппүттэрэ ити үтүө тэрээһинтэн туора турбатыбыт. Оҕолорбутугар анаммыт хомус декадатын тэрийэн ыыттыбыт.
Ол курдук, оҕолор хомус түмэлигэр сылдьан хомус туһунан араас чахчыны иһиттилэр, аан дойду хомуһун арааһын көрөн сөхтүлэр, хомус тыыннаах тыаһын истэн үөрдүлэр-көттүлэр. Оҕолор ордук 106 см усталаах улахан уонна 8 мм кып-кыра хомуһу сэргээтилэр. Реворий Чемчоев-Чөмчөө Уус оҥорбут хомуһа куосумаска тахсыбытын истэн, хайдах онно “тиийэн хаалбытын” токкоолостулар, дьиктиргээтилэр даҕаны. Оттон иитээччилэр уонна төрөппүттэр түмэл пуондатыгар аан дойду араас муннугуттан хас эмэ тыһыынча хомус түмүллүбүтүн сөхтүбүт.
Ити сырыы түмүгүнэн, оҕолорбут төрөппүттэрин уонна иитээччилэрин кытта уһуйааннарыгар араас матырыйаалтан оҥоһуллубут хомус дьоҕус түмэлин оҥордулар. Онтубут нэдиэлэ устата туран, киэҥ сэҥээриини ылла. Оҕолор “хомус” диэн тылы уостан түһэрбэт буоллулар.
"Күнчээннэр" дьоҕус түмэллэрэ
Кэнэҕэһин даҕаны сахабыт хомуһа, Хомуспут күнэ туругура турдуннар! Ыччаппыт, оҕолорбут саха төрүт үгэһин, култууратын харыстыы улааттыннар!
Дьокуускай 86 №-дээх “Колокольчик” уһуйаанын иитээччилэрэ Р.И. Игнатьева, СӨ Үөрэҕириитин туйгуна, үрдүкү категориялаах настаабынньык-педагог, Е.С. Варламова, эдэр педагог.
