РФ Доруобуйа харыстабылыгар министиэристибэтэ оҥорбут саҥа бырайыагынан, быраастар ыалдьыбыт киһиэхэ “үлэлиир кыаҕа суох буолуу лииһин” суруйалларыгар, судургутук эттэххэ, больничнайы толороллоругар, кини сыл аҥаарын иһигэр хаста ыалдьан больничнайга сылдьыбытын учуоттуур буолуохтара.
Өскөтүн киһи түөртэн элбэхтик ыалдьан больничнай ыла сылдьыбыт буоллаҕына, кини дьыалатын анал быраас хамыыһыйата көрүөҕэ, оттон ол кэмҥэ 3 күннээх больничнайы биэриэхтэрэ. Ити уларыйыыга арай ыалдьа сытар чугас дьоннорун көрөөччүлэр, доруобуйаларын чөлүгэр түһэринээччилэр (реабилитация), социальнай суолталаах эмт-томп көмөтүн ылааччылар уонна ураты ыарыылахтар хапсыбаттар.
Саҥа уларыйыы быһыытынан, эмтиир быраас докумуоҥҥа киһи сыл аҥаарыгар хаста ыалдьыбытын дуу, суоҕун дуу булгуччу киллэрэр буолуоҕа. Хамыыһыйа ону ырытан-сыаналаан көрөн баран, быраас анаабыт эмтэниитэ-чинчийиитэ төһө көдьүүстээҕин-суоҕун быһаарыахтаах, ону тэҥэ, наада буоллаҕына, били 3 күҥҥэ арыллыбыт больничнайы уһатан биэриэхтээх.
Доруобуйа харыстабылын министиэристибэтэ этэринэн, итинник чинчийии түмүгэр киһи тоҕо, туохтан сылтаан сотору-сотору ыалдьара биллиэхтээх уонна туһааннаах миэрэлэр ылынылларыгар көмөлөһүөхтээх.
Бэлиэтээн эттэххэ, саҥа уларыйыылары анал бирикээһинэн бигэргэттэхтэринэ, быраабыла 2025 сыл балаҕан ыйын 1 күнүттэн үлэлээн барыахтаах.
Холобурдаатахха. Эн ахсынньыга ыалдьыбыккын. Ол гынан баран, ааспыт алта ый иһигэр – бэс ыйыттан сэтинньигэ диэри – түөрт төгүл эмиэ больничнайга сылдьыбыккын. Ол аата бэһискин ыарыйдаххына, 3 эрэ күн больничнайга барар кыахтанаҕын. Оттон ону уһатары-суоҕу анал хамыыһыйа быһаарар.
Өссө биирдэ санаттахха, ити – киһи бэйэтэ ыарыйдаҕына эрэ. Оттон оҕоҥ-урууҥ ыарыйдаҕына, ыалдьыбыт чугас аймахтаргын көрөр-ыарыылыыр буоллаххына, доруобуйаҕын реабилитациялатаргар уларыйыы туох да оруолу оонньообот, дьайбат.
Сэҥээриилэр