Нэһилиэк таһымыгар уокуруктары тэрийэр баҕалаахтартан ыйытабын: «Алаастарынан арахсан, хантан элбэх үбү-харчыны булуохпут дии саныыгытый?»
Сирбитин сокуонунан улуус дьаһалтата быһаарар. Бүлүү улуустарыгар “АЛРОСА” АК дивиденэ улууска кэлэр. Саха сирин 409 нэһилиэктэригэр барыларыгар үөрэх, билии-көрүү, салайар үлэҕэ дьоҕур, уопут, таһым өттүнэн билиҥҥи үлэлии олорор улуустар баһылыктарыгар тэҥнэһэр кыахтаах таһымнаах, бэлэмнээх салайар каадырдар бааллара буолуо дуо?
Өрөспүүбүлүкэ 34 улууһун, 409 нэһилиэгин баһылыктара ахсааннарынан эрэ араастаспаттар, үлэлиир таһымнара эмиэ атын-атын буолуо дии саныыбын.
Сопхуос отделениетын управляющайыгар үлэһиттэрэ күн аайы үлэлэрин кэпсэтэ киирэллэрин таһынан, нэһилиэк дьоно-сэргэтэ отторун-мастарын, о.д.а. кыһалҕаларын быһаартараары аанын саппаттар этэ. Күннэтэ т/х оҥорон таһаарар үлэтин дьаһайар, быһаарар, дьон-сэргэ олоҕор кыттыһар отделениелар управляющайдара билии-көрүү, үлэлиир таһым өттүнэн дьону кытта үлэҕэ эриллэн сайдаллара. Кинилэртэн сопхуос дириэктэрдэрэ, райком сэкирэтээрдэрэ, райсовет бэрэссэдээтэллэрэ, т/х миниистирдэрэ, өрөспүүбүлүкэ бырабыыталыстыбатын бэрэссэдээтэллэрин солбуйааччы да буола үүнэллэрэ.
Оттон билиҥҥи биһиги нэһилиэктэрбит баһылыктарын ортолоругар кыһалҕаларын быһаартара кэлэр дьонтон кэбиниэттэрин ааннара сабыллыбат салайааччылар бааллара буолуо дуо ?
Урут отделение управляющайдара биир күн үлэлэрин миэстэтигэр суох буоллахтарына, элбэх боппуруос быһаарыллыбат этэ. Бүгүн нэһилиэктэр бүддьүөттэрэ уустуктардаах кэмигэр 409 нэһилиэк баһылыктара 100 % күн аайы кэбиниэттэригэр олороллор диир уустук буолуо. Атын сиргэ олорон, уунан үлэлиир нэһилиэктэр баһылыктара суох буолбатахтар.
Маннык салайыы төһө көдьүүстээх буолуо дии саныыгыт? Билиҥҥи үйэҕэ ким хайдах үлэлиирэ, дьаһанара көҥүлэ диэххэ сөп буолуо даҕаны, салайааччы миэстэтигэр күн аайы баар буолар боппуруоһа эмиэ элбэҕи толкуйдатар, саарбахтатар. Ол дьон саҥа уокуруктар тойотторо буоллахтарына, дьиссипилиинэлэрэ көнөн, миэстэлэригэр баар буолуохтара диир хайдаҕа буолла?
Баҕар, биһигини, урукку сопхуос отделениетын управляющайдарын урукку өйдөбүлгүтүнэн толкуйдуугут диэхтэрин сөп буолуо даҕаны, нэһилиэктэр бары эмискэ улууһу кытта тэҥнэһэн, күүскэ сайдыахтара диир уустук. Ол иһин, улуус таһымынан уокуруктар буоларбыт ордук дии саныыбын.
