Ахсынньы 17 күнүгэр Москубатааҕы Сойуустар дьиэлэрин Колоннай саалатыгар Арассыыйаҕа Дьиэ кэргэн сылыгар аналлаах тэрээһин ыытылынна. Манна дойду 85 эрэгийиэниттэн ураты дьиэ кэргэннэр РФ Госдууматын бэрэссэдээтэлин Вячеслав Володины кытта көрүстүлэр.
Манна Саха сириттэн Амма улууһун Эмис сэлиэнньэтиттэн удьуор элбэх оҕолоох Устиновтар кытыннылар. Ол курдук, Дьоруой Ийэ Туйаара Петровна уонна Сергей Анатольевич бииргэ олорбуттара 23 сыл буолбут. Кинилэр ити кэм устата, талбыт курдук, биэс кыыһы уонна биэс уолу төрөтөн улаатыннарбыттар. Дьиэ кэргэн көхтөөх олоҕу тутуһар, элбэхтик айанныыр, айар-тутар, араас тэрээһиҥҥэ уонна күрэскэ кыттар.
Кинилэр төрөппүттэригэр хайыы үйэ 16 сиэни бэлэхтээбиттэр. Аччыгый икки эрэ ыйдаах. Орто уоллара Герман Устинов Саха сирин көҥүл тустууга икки төгүллээх чөмпүйүөнэ, аан дойду таһымнаах успуорт маастара уонна Дмитрий Коркин турнирын 2017 с. кыһыл көмүс мэтээлин хаһаайына.
Устиновтар уратылара диэн удьуор элбэх оҕолоохторо буолар. Туйаара Петровна ийэтэ Татьяна Никифоровна Новикова уонна эбэтэ Новикова Елена Петровна эмиэ уонтан тахса оҕону төрөтөн улаатыннарбыт Дьоруой Ийэлэр буолаллар. Москубаҕа тэрээһин буолар күнүгэр эбэлэрэ уонна хос эбэлэрэ Татьяна Никифоровна 85 сааһын туолбут. Манна кини дьиэ кэргэн уһун дьоллоох олоҕун кистэлэҥэ үтүө сыһыаҥҥа, ытыктабылга, өйдөһүүгэ уонна тапталга буоларын бэлиэтээтэ.
Устиновтар бүгүн Дьокуускайга көтөн кэллилэр, кинилэри СӨ Үлэҕэ уонна социальнай сайдыыга миниистирин солбуйааччы Елена Теплякова салайааччылаах дэлэгээссийэ көрсөн эҕэрдэлээтэ. Уон оҕолоох Туйаара Петровна Устинова түөрт эрэ ийэҕэ бэриллибит Станислав Говорухин мэтээлин тутан олус долгуйбутун эттэ уонна Москубаҕа олус үчүгэйдик көрсөн арыаллыы сылдьыбыттарын иһин махтанна.
Сонун төрдө: СӨ Үлэҕэ уонна социальнай сайдыыга министиэристибэтэ
