Биир үтүө күн учууталбыт биһиэхэ, 5 «б» кылааска, Ийэ дойдубутун көмүскүү сылдьар саллааттарга сурук суруйтарбыта. Сотору буолаат, биир саллаат сурук туппут видеота бассаабынан тарҕаммыта, ону бары көрбүппүт. Өрөспүүбүлүкэ дьоно бары даҕаны көрбүт буолуохтаахтар.
Онно саллаат: «Хатыҥ Арыы орто оскуолатын 5 кылааһын үөрэнээччитэ Слепцова Маша суругун тутан олус уйадыйдым. Эн суругуҥ биһиэхэ күүспүтүгэр күүс эбэр, санаабытын бөҕөргөтөр. Хайаан даҕаны кэлэ сылдьыам, эһигини көрсүөм», –диэбитэ. Ону истэн, бары олус үөрбүппүт, долгуйбуппут.
Арай бэҕэһээ, ахсынньы уон аҕыс күнүгэр, учууталбыт Александра Ивановна английскай тылга уруога буола турдаҕына, дириэктэрбит Павел Николаевич киирэн кэлбитэ уонна: «Оҕолоор, биһиэхэ сурук туппут саллаат ыалдьыттыы кэллэ», – диэбитэ. Ол кэнниттэн Маша суругун туппут киһи киирбитэ, дорооболоспута уонна бэйэтин билиһиннэрбитэ. Кини аата Василий Афанасьев, позывнойа «Хаҥыл» диэн, уоппускатыгар кэлэ сылдьар. Нам улууһуттан төрүттээх, Намнааҕы гимназияны бүтэрбит эбит. Ийэтин өттүнэн Маймаҕаттан сыдьааннаах. Биһиги Машабыт эмиэ Маймаҕа кыыһа. Ити кэннэ саллаат кылгастык балаһыанньаны билиһиннэрдэ, биһиэхэ үөрэхпитигэр ситиһиини уонна саҥа дьылга баҕа санааларбыт туолалларыгар баҕарда. Василий Афанасьев Машаҕа чебурашка оонньуур бэлэхтээтэ. Маша туойунан оҥорбут харысхалын бэлэх уунна. Бары долгуйдубут, үөрдүбүт. Түмүккэ уопсай хаартыскаҕа түстүбүт.
Хорсун буойуҥҥа ситиһиилэри баҕарыахха, биир дойдулаахтарбыт, убайдарбыт этэҥҥэ эргиллэн кэлэллэрин эрэнэ күүтүөххэ.
