“Кыымҥа” Горнайтан анал байыаннай дьайыыларга өстөөҕү утары дьоруойдуу киирсэ сылдьар Евгений И. туһунан суруйан турабыт. Кини туһунан бастаан алтынньыга суруйарбытыгар өстөөх 9 саамай кутталлаах “Дьэгэ-бааба” диэн дронун аптамаатынан күөрэтэн суулларбытын туһунан кэпсээбиппит.
Киниэхэ көмөлөһөн, тепловизор булан ыыппыппыт. Ол кэннэ кини өссө 5 “Дьэгэ-баабаны”, хас да “камикадзе” дроннары суулларан, элбэх буойун олоҕун быыһаата, кыайыыбыт күнүн чугаһата сылдьар.
Бу күннэргэ хорсун буойун, төрөөбүт дойдутугар “Үтүө харыйа” акцияҕа кыттан, Бэрдьигэстээх “Кырачаан ымыылар” диэн уһуйааныгар сылдьар элбэх оҕолоох ыаллар оҕолоругар сүрдээх үчүгэй саҥа дьыллааҕы бэлэхтэри биэрдэ. Бэлэхтэри уолун аатыттан ийэтэ Ирина Дмитриевна Исакова аҕалбытын, кырачааннарга Саҥа дьыллааҕы утренникка уһуйаан сэбиэдиссэйэ туттарда.
Амарах, үтүө санаалаах Ийэ дойдуну көмүскээччи Евгений И. фронтан ыыппыт бэлэҕин туппут кырачаан оҕолор сүрдээҕин үөрдүлэр-көттүлэр, киэн тутуннулар. Кинилэр бу ураты саҥа дьыллааҕы бэлэҕи олохторун биир дьикти түгэнин быһыытынан өйдүү сылдьыахтара.
Оттон хорсун буойуҥҥа өстөөхтөрү хотон, Кыайыы көтөллөнөн этэҥҥэ эргиллэригэр алгыспытын ыытыаҕыҥ.
Владимир Степанов.
