КПРФ киин кэмитиэтин бэрэссэдээтэлин бастакы солбуйааччыта, Госдума дьокутаата Юрий Афонин биһиги Лениммыт болуоссатын иккис аҥаарыгар Өрөспүүбүлүкэ болуоссата диэн саҥа ааты биэрии тула Арассыыйа таһымыгар айдаан таһаарда уонна утарааччыларга анаан куоластааһын тэрийдэ.
Кини, Владимир Путин этиитин туһанан, Саха сирин салалтата дьону икки аҥы хайытар, утарыта туруорар диэн буруйдуу сатыыр. Дьиҥэр, Афонины бэйэтин итинник буруйдуохха сөп курдук. Бүтүн Арассыыйа үрдүнэн айдааны тардан хайдыһыы таһаарарын иһин. Дьиҥэр, кинитэ да суох олохтоохтор бэйэбит быһаарсар буоллахпыт.
Афонин этэринэн, Ленин болуоссатын икки аҥы арааран туспа ааттыыртан буккуур бөҕөтө тахсар үһү. Бырастыы гыннын, бэйэбит кырачаан куораппытыгар баҕас болуоссат хайа өттө Ленин, хайа өттө Өрөспүүбүлүкэ киэнэ буоларын билэр инибит. Эбэтэр иннилэрин-кэннилэрин араарбат далай акаарылар олороллор дии саныыр дуу.
Өссө кини кэтэх санаатыгар, «өрөспүүбүлүкэ салалтата болуоссат аатын уларытан, куорат баһылыгын быыбарын тохтотуу боппуруоһуттан аралдьыта сатыыр» үһү. Оттон кини баартыйата быыбары тохтотууну адьас утарар үһү.
Оччотугар, итинник холуннарыан кэриэтэ, Ил Түмэҥҥэ баар хомуньуустарын кытта үчүгэйдик үлэлээтин ээ. Сылтах булан айдаан таһааран, бэйэтигэр уонна баартыйатыгар болҕомтону тардыынан, дьону икки аҥы хайытыынан дьарыктаммакка.
Онон, дьокутаат @afonin_yuriy Юрий Афонин, биһиги болуоссаппыт туһугар долгуйбакка тус эбээһинэстэргинэн дьарыктанаргар ыҥырабыт. Бэйэбит болуоссаппыт аатын бэйэбит быһаарыахпыт! Кыттыһыма!
Бэйэ кэр.
Сэҥээриилэр