Бүгүн «Кыым» хаһыаты бэйэтигэр ылбыт «Ситим-Медиа» ХЭТ салалтата Өрөспүүбүлүкэтээҕи типография салалтатын кытта көрсөн кэллэ. Кэпсэтии түмүгэр генеральнай дириэктэр Владимир Сыромятников хамаандата хаһыат бэчээттэнэр сыанатын чэпчэтэр кыах баарын ыйда. Хомойуох иһин, өрөспүүбүлүкэ үрдүнэн улахан аймалҕан, дьиксинии тахсыбытын кэннэ биирдэ. Ол эрээри...
Иэстээх тэрилтэ быһыытынан үөрэ түһүөхтээх этибит даҕаны, биир курус санаа хам тутта: сүүрбэ сылы быһа бэчээттэнэн кэлбит типографиябыт итинник «киһилии» сыананы төһө эмэ олохтуур кыахтаах эрээри, тоҕо кэнники үс сылга наар үрдэтэр аакка сырытта, иэскэ киллэрэргэ дьулуста, тоҕо эрдэттэн итинник суолу тутуспата? Үс ыйдаах иэһи үс сыллаах иэс курдук үлүннэрэн тигээйи уйатын тоҕо тарта?
Салайааччы Владимир Сыромятников сыананы үрдэтэр биир сүрүн төрүөтүнэн тираж аччааһынын ыйар. Ол эбэтэр, хаһыаппыт сурутааччытын ахсаана төһөнөн аҕыйыыр да, бэчээттэнэн тахсар сыаната үрдүүр. Ол да иһин, аҕыйах ахсааннаах сорох хаһыаттар манна бэчээттэммэттэр. Холобура, «Эхо столицы» олохтоох типография сыанатын уйуммакка, Благовещенскайга бэчээттэнэ барарга күһэллибит.
Дьиҥэр, типография, өрөспүүбүлүкэ бэчээтин биир баар-суох киэн туттар тэрилтэтэ, «флагмана» дэнэрин быһыытынан «Кыым» хаһыат суолтатын өйдөөн туран, «киһилии» сыанатын тута сылдьыбыта буоллар, судаарыстыбаннай бэлиитикэни оҥорсор, сахалыы бэчээти, саха тылын өйүүр үрдүк мииссийэтин чахчы толоруох этэ буоллаҕа. Ону баара, өрөспүүбүлүкэ туһугар үлэлиир соҕотох типографиябыт «Кыым» хаһыаты, балтараа сыл иһигэр сыанатын 74 % кэриҥэ үрдэтэн иэскэ киллэрэн, суукка биэрэн сирэйинэн сиргэ-буорга анньаары турунна. Бу түгэн былыргы тойоттор кулуттарын-чаҕардарын улахан иэскэ киллэрэн баран суут-сокуон илиитигэр биэрэллэрин санатар. Манна сөп түбэһэн, типография салалтата күнүс 11.00 чааска быспыт чэпчэтиилээх сыанатын киэһэ 16.00 чааска кэлэн эмиэ уларытан 30 % үрдэтэрин туһунан иһитиннэрдэ.
Биллэн турар, бүтүн өрөспүүбүлүкэ бэчээтин бас билэн олорор, сыананы талбытынан үрдэтэр, дьылҕабытын быһаарар монополист-тэрилтэҕэ аҕыйах киһилээх эрэдээксийэбит утарылаһар кыаҕа кыра. Ол да буоллар, хаһыат үлэһиттэрэ, аҕыйах күн иһигэр Сахабыт сирин бары муннуктарыттан үтүмэн өйөбүлү ылан сүргэлэрэ көтөҕүллэн, салгыы тахсара-тахсыбата биллибэт саҥа нүөмэрдэрин бэлэмнээн түбүгүрэ сылдьаллар. Үйэттэн ордук норуот хас биирдии кыһалҕатын быһаарсан кэлбит хаһыат «ойуурдааҕын» биллэ. Бэл диэтэр, Үөһээ Дьааҥылар барахсаттар көмө харчы хомуйаары тылланаллар. Хаҥалас I-кы Малдьаҕардара «Кыым» хаһыат сурутуутун элбэтэргэ ыҥырыы таһаардылар. Онон, саха тыллаах улуустарбытыгар, өйөөбүт дьоммутугар, ааҕаччыларбытыгар дириҥ махталбытын биллэрэбит.
Үөһэ этиллибитин курдук, бэчээт сыаната тиражтан быһаччы тутулуктаах. Билиҥҥи 12 000 тиражпыт төһө да Уһук Илиҥҥэ, өрөспүүбүлүкэҕэ баһыйарын иһин, типографияҕа удамыр сыананан бэчээттэнэргэ 15-17 тыһ. тиийиэхтээх эбит. Ол иһин, 500 тыһ. кэриҥэ ахсааннаах сахабыт дьоно, төрөөбүт тылбыт өрөгөйдүүр олунньу ыйыгар «Кыымҥа» биир киһи курдук күргүөмүнэн сурутарга дьулуһуҥ, хаһыат дьылҕатын быһаарсыҥ!
Сурутуу туһунан бу нүөмэрдэринэн билсиҥ: 8 (4112) 42-21-08, 8 (968) 150-67-15, 8 (924) 367-01-56.
Норуот аатыттан «Кыым» хаһыаты өйөөн социальнай ситимнэринэн сурук ыыппыт дьон:
- Галина Попова-Санаайа, билим хандьыдаата, уопсастыбанньык
- Павел Ксенофонтов-Ойуур Байбал, СТНГ сүрүн инженерэ, VI Ыҥырыылаах Ил Түмэн дьокутаата
- Александр Федоров, Ирбэт тоҥу үөрэтэр институт дириэктэрин солбуйааччыта, билим дуоктара
- Наталья Михалева-Сайа, СӨ норуодунай суруйааччыта
- Айталина Васильева, Хаҥалас улууһун I-Малдьаҕар нэһилиэгин баһылыга
- Ульяна Винокурова, билим дуоктара, бэрэпиэссэр
- Иван Шамаев, РЛИ дириэктэрэ, билим дуоктара
- Юрий Жегусов, социолог
- Олег Колесов-Талбан, "Саха" НКИХ ТВ дириэктэрэ
- Жанна Барашкова, “Сайдыы” саха тылын учууталларын түмсүүтэ
- Иван Пономарев, уопсастыбаннай кэрэспэдьиэн
- Иван Ушницкай, СӨ култууратын үтүөлээх үлэһитэ, Күлүмнүүр бириэмийэтин лауреата, САССР ҮС 1, 2 ыҥырыытын дьокутаата, Михаил Николаев көмөлөһөөччүтэ
- Саргылаана Ноева, “Ааҕар Саха сирэ” түмсүү
- Сандаара Кулаковская, “Күөрэгэй түмсүү”
- Марина Платонова-Хомпорууна, «Кистэлэҥ күүс» сурунаал, уопсастыбанньык
- Варвара Окорокова, билим дуоктара, бэрэпиэссэр
- Владислав Коротов, суруналыыс, уопсастыбанньык
- Григорий Саввинов, Прикладной экология институтун дириэктэрэ, билим дуоктара
- Вилюяна Никитина, «Ийэ тыл»түмсүү
- Юлия Андросова, "Сайдыы" оҕону сайыннарар киин
- Евдокия Поликарпова, билим дуоктара, бэрэпиэссэр
- Гаврил Торотоев, ХИФУ ХИНТуоКИ дириэктэрэ, билим хандьыдаата
- Василий Гоголев-Уйулҕан, СӨ үөрэҕириитин уонна култууратын туйгуна, Учууталлар учууталлара, СӨ Суруйааччыларын сойууһун чилиэнэ, прозаик
- Матрена Попова, "Айылгы" түмсүү, билим хандьыдаата
- Алексей Егоров, СӨ норуодунай артыыһа
- Маргарита, Василий Винокуровтар, билим хандьыдааттара, хотугу улуустар бочуоттаах олохтоохторо
- Анна Шишигина, “Амма Эбэбитин харыстыыбыт” хамсааһын
- Александр Александров-Сахса Тар, уопсастыбаннай кэрэспэдьиэн, СӨ Суруйааччыларын сойууһун чилиэнэ, Ньурба улууһа
- Дмитрий Пономарев-Дьолуолаах, СӨ Суруйааччыларын сойууһун чилиэнэ
- Юлия Николаева, көрбүөччү, эмчит
- Василий Винокуров, СӨ тыатын хаһаайыстыбатын үтүөлээх үлэһитэ, билим хандьыдаата, Эбээн-Бытантай, Өймөкөөн, Анаабыр улуустарын Бочуоттаах олохтооҕо, “Гражданскай килбиэн” бэлиэ кавалера
- Ааҕааччылар: Муоматтан 77 саастаах Василий Слепцов, Нам Хамаҕаттатыттан 70 саастаах Варвара Аргунова, Дьокуускайтан 66 саастаах Исидор Захаров, үлэ бэтэрээнэ И.В. Чемчоева уонна да атыттар
Бэйэ кэр.
Сэҥээриилэр
Ол эрээри, хаһыаты таһаарбакка, ааҕааччыларга барбат гыныы - сиэри барытын кэһии! Типография салалтатыгар "Кыым" өттүттэн утарар ирдэбил (встречный иск) суукка түһэриллиэхтээх. Бу биир хаһыаты уодьуганнааһын эрэ буолбатах, сахалыы бэчээккэ бүттүүнүгэр охсуу! Ааты-суолу хараардыы, сахалыы суруналыыстыка дьоһунун түһэрии!
,, Кыым ,, эрэ хаалла. Сорохторго ,,Кыым,,
хаһыат тахсыбата күн тахсыбатын кэриэтэ
буолара буолуо диэн этиэххэ сөп.