Төрөөбүт тыл уонна сурук-бичик күнүн дьоро тэрээһинигэр Ил Дархан бастыҥ үлэлээх тыл эйгэтин үлэһиттэригэр судаарыстыбаннай бириэмийэлэри туттарда.
Төрөөбүт тылы, литэрэтиирэни уонна култуураны тарҕатыыга-көҕүлээһиҥҥэ элбэх сыллаах таһаарыылаах үлэтин иһин Сэмэн Ноҕоруодап аатынан бириэмийэни ХИФУ РФ Хотугулуу-Илиҥҥи норуоттарын тылларын уонна култуураларын институтун саха тылыгар кафедратын сэбиэдиссэйэ Дария Чирковаҕа анаатылар.
Николай Спиридонов-Тэки Одулок аатынан бириэмийэни дьүкээгир тылын уонна култууратын тарҕатааччы-харыстааччы, норуот маастара Мария Куриловаҕа туттардылар.
Василий Лебедев аатынан бириэмийэни эбэҥки норуотун ытык кырдьаҕаһа, өрөспүүбүлүкэ үөрэҕириитин үтүөлээх үлэһитэ Анна Слепцова ылла.
Глафира Василевич аатынан бириэмийэни тыл билимин хандьыдаата, ГЧИ хотугу тылларга салаатын билимҥэ үлэһитэ Мария Дьяконоваҕа биэрдилэр.
Ил Дархан Айсен Николаев эҕэрдэ тылыгар быйыл Саха литэрэтиирэтэ төрүттэммитэ 125 сыла бэлиэтэнэр кэмигэр Төрөөбүт тыл уонна сурук-бичик күнэ ураты суолталаах буолбутун, элбэх омуктаах дойдуга Арассыыйа норуоттарын төрөөбүт тылларын сайыннарарга улахан болҕомто уурулларын анаан бэлиэтээтэ.
