Улуу Кыайыы 80 сылынан “Снежный Десант РСО. Десант Победы” Бүтүн Арассыыйатааҕы патриотическай акция чэрчитинэн, Саха сирин устудьуоннарын этэрээттэрэ улуустарга тахсан үтүө дьыаланы оҥордулар. Ол курдук, сиэрбис хайысхатын «Боотур» уонна «Сулус» этэрээттэрэ холбоһон «Куорсун» уонна «Хорсун» хаар десант этэрээттэрэ буолан үлэлээн кэллилэр.
Кулун тутар 14-16 күннэригэр «Көт, дабай, үрдүккэ талас!» девизтээх «Куорсун» этэрээтэ 29 байыас буолан Уус Алдан улууһун Иккис Лөгөй нэһилиэгэр, оттон кулун тутар 28-30 күннэригэр «Өрүү күҥҥэ чугастар!» девизтээх «Хорсун» этэрээтэ 37 байыас буолан Хаҥалас улууһун Тиит-Эбэ нэһилиэгэр сырыттылар.
Бу күннэр усталарыгар устудьуоннар нэһилиэк олохтоохторугар, аҕам саастаахтарга, Аҕа дойду улуу сэриитин бэтэрээннэригэр, анал байыаннай дьайыы кыттыылааҕын дьиэ кэргэнигэр күүс-көмө буоллулар: хаар түһэрдилэр, күртүлэр, муус тастылар, мас хайыттылар, саһаан туруордулар, мемориаллары, пааматынньыктары ыраастаатылар. Маны таһынан, оскуола үрдүкү кылааһын үөрэнээччилэригэр устудьуоннар этээрэттэрин туһунан сиһилии кэпсээтилэр, идэни таларга көмөлөһөр үлэни, Кыайыы 80 сылыгар аналлаах квиз-оонньууну ыыттылар, успуорт чааһыгар волейбол, баскетбол оонньууларын тэрийдилэр. Этэрээттэр байыастара эҕэрдэ кэнсиэргэ күүскэ бэлэмнэнэн Тулуна уонна Тиит-Эбэ олохтоохторун ыллаан-туойан, үҥкүүлээн, араас оонньуулары ыытан үөртүлэр-көтүттүлэр.
Устудьуоннар ый кэриҥэ бииргэ буолан, «эн-мин» дэсиһэн, сарын-сарыҥҥа даҕайсан, дьон иһирэх тылын, махталын ылан, үтүө дьыаланы оҥорон олуһун астынан кэллилэр. «Бу кэм устата биһиги көннөрү этэрээт буолбатыбыт, биһиги биир дьиэ кэргэн курдук буоллубут! Үлэни таптааҥ! Үлэ киһини киэргэтэр!» – диэн истиҥ санааларын үллэстэллэр.
