Ыам ыйын 14 күнүгэр Кальвицаҕа баар 5-с поликлиникаҕа харахпын көрдөрө тиийдим. Ол иннинэ бэнидиэнньик күн офтальмологияҕа 500-707 нүөмэргэ төлөпүөннээтим. «Ыам ыйын 20 кэнниттэн эрийээр, запись суох» диэтилэр. «Глаукомалаахпын уонна эмим бүттэ» диэбиппэр. «Харах бырааһа Маркова сэрэдэҕэ 1 - 5 ч. диэри көрөр, оччоҕо онно баран көрдөрүөҕүҥ» диэбитигэр, мин сөп буолан, «киниэхэ көрдөрбүтүм, карточкам онно баар» дии санаатым.
Тулагыттан Дьокуускайга диэри 25 км. Суол мааны. 40 - 45 мүнүүтэнэн тиийэҕин. Массыына булбаккабын таксилары ыйыталастым. Мишаня - 1500 солк. Связист - 1500.
Сыана да сыана. Хата, индрайвер массыыната 200 солк. ардаҕы аннынан айаннаан, Кальвица уулуссатыгар турар медцентырбын буллум. Эрдэ 11ч. саҕана тиийдим. Сиэн балтыбын ыҥырдым. Барахсаным, истээт да, «Ленагазтан» ардаҕы аннынан сатыы түһүнэн кэбиспит. Кэлэн коляска ылан, дьэ көрдөрөөрү, 1 ч. кэтэһии.
Сиэстэрэ тахсан 1 пациены ыҥырда. Онтон мин диэки хайыспытыгар «Понедельникка звоннаабыппар средаҕа Маркова 1 - 5ч. дылы көрөр диэбиттэригэр кэллим. Март ыйга сылдьыбытым, бу баччаҕа кэлээр диэбиккит» диибин. «Испииһэккэ суоххун да суоххун» дии турар. «Кимиэхэ звони гыммыккыный?» диир. Быһаара сатыыбын да, ылыммат. Компьютерга көрөр, түргэн үлүгэрдик тахсан баран хаалла.
Мин, хараҕым уута тахсыбытын билбэккэ, саҥата суох ытыы олордум. Медсестра ыйыталаһан кэллэ быһыылаах, кэлээт «сарсын 9 чааска бу 233 кабинекка кэлэҕин» диэн буолла. Мин көрдөһөөччү буоллум. «Күн аайы Тулагыттан кэлэрбин, 2 тайахтаах буоламмын ыарырҕатабын» диэтим. Онуоха, көрө олорор быраас миигин сэмэлээтэ. «Улаханнык саҥараҕын хаһыытыыр курдуккун, мин көрө олорор ыарыһахпын истибэппин» диэн эттэ. Ол нуучча дьахтара кыратык саҥаран быраас кутун туттаҕа буолуо. Саха дьахталлара саастаах өттүлэрэ сибигинэйэн саҥарбаппыт. Дорҕоонноохтук саҥарарга үөрэннэхпит дии.
Көрдөһө олорор ыарыһахха итинник сыһыаннаһалларыттан киһи эрэ хомойор. Хаҕыс сыһыан баар буолбут, дьоҥҥо эйэҕэс, сымнаҕас сыһыан суох буолбут курдук. Гиппократ андаҕарын биэрэн быраас буолаллара. Ол андаҕары тутуспат буолбуттар дуу, тугуй? Инньэ гынан сэмэлэнэммин, приемҥа тиксибэтэхпиттэн, көрдөһүүбүн ылымматахтарыттан кабинетыттан тахсан баран коляскабар олорон эрэ дэлби ытаатым.
Муниципальнай аптекаҕа хаһан босхо эмп баар буолуой? Син биир атыылаһан ылан таҕыстым. Ол уйадыйаммын, давлением эмин атыыласпатахпын. Онно эмиэ бырааска суруйтаран көрдөрөҕүн, ол кэннэ рецепт суруйтаран. Атын сиртэн аптекаттан ылаҕын.
Кыаммат дьоҥҥо эмиэ кыһалҕалаах. Балтым коляскабынан остановкаҕа диэри аҕалан, тэрилбитин илдьэн туттаран баран, аны такси сакаастаан 200 солк. «Апельсин» оптуобус тохтобулугар кэллибит. Хата, 1 аҥаар чаастаах 104-с автобус кэннибититтэн кэллэ. Такситтан тахсаат, онно дьөгдьөрүтэн киллэрэн, билиэппин төлөөн балтым хаалла.
Балтыбар Ольгаҕа улахыын-улахан, барҕа махтал!
Оптуобуска кэннибинэн айаннаан кэллим. Ардахтаах күн буолан сытыйбыт, инчэҕэй таҥастаах дьон элбэх эбит. Түннүгүнэн көрөргө самыырдаах инчэҕэй буолан, мөлтөхтүк көрөр киһиэхэ киһи эрэ чуолкайдык тохтобулу быһаарымыан сөп. Суоппар ханна кэлбиппитин этэр. Ол да буоллар, мин өйүм бааллан дуу, сылайаммын дуу, оскуола остановкатыгар түһэн хаалбыппын. Түһэрбэр эдэрдэр көмөлөспүттэрэ. Арай көрдөхпүнэ хайдах эрэ атын сир курдук атыҥырыы көрдүм.
Ону кытары хаһыы иһиллэр: «Галина Николаевна, ханна бардыҥ, сыыһа түстүҥ, эн остановкаҥ буолбатах!» диэтэ да, биир кыыс уонна дьээдьэ миигин хонноҕум анныттан ылан, төттөрү дьөгдьөрүтэн автобуска киллэрдилэр. Аан аттыгар дьон тирээбиллээх 1 остановка айаннаан кэллим. Дьоннорум эмиэ көмөлөһөн түһэрдилэр. Көрбүтүм, олохтоох агро-оскуола зоотехнига, сүрдээх үлэһит кыыс Светлана Андриановна Решетникова уонна Тулагылар күтүөттэрэ, Горнайтан төрүттээх, сэмэй бөҕө киһи, ыал аҕата, бэртээхэй үлэһит Семенов Валентин Николаевич эбит. Кинилэргэ көмөлөспүттэригэр сэмэй махталбын этэбин.
Ыскамыайкаҕа олордохпуна, биир кырасыабай эдэр дьахтар дорооболосто уонна этэр: «Галина Николаевна, билбэтим дии, эйигин» диэтэ. Ол эдэр чүөчэ - Лена Нектегяева. Кинини сорудахтаан, нөҥүө остановка аттыгар турар таксины ыҥыртараммын, төлөөммүн, дьиэбэр диэри бырахтарыам диэтим. Аны, таксист суох эбит, массыына кураанах. Нүөмэрин этэммин, «Связист» такси «Биһиэхэ инник массыына суох, биһиэнэ буолбатах» диэн буолла. Хайыахпыный, остановкаттан 100 м. сиргэ турар дьиэбэр таксиланабын.
Ардаҕы аннынан икки торуоскалаах, «кыаммат кыһалҕалаах киһиэхэ синэ биир»диэн баран, суол ортотугар турунан кэбистим уонна торуоскаларбын өрө уунан баран турабын. Куорат диэкиттэн массыыналар иһэллэр. Бастакы массыына тэйиччи соҕус тохтоон туран мөхтө, тугу эрэ үөҕүстэ быһыылаах. Иккис массыынанан саха уола чугаһаат. «Ити көстөн турар этээстээх дьиэҕэ быраҕан биэр эрэ баһаалыста диэбиппэр», 200 солк. көрдөөтө. Сиэппэр 150 баарын туттаран кэбистим. «Кимҥиний, ким оҕотоҕунуй?» диэбиппэр: «күтүөппүн, кэлиибин» диэн баран хоту диэки хайыһыннаран айанныы турда.
78 саастаах саха кырдьаҕаһа кыһалҕалаах сырыыбын, биир күннээҕи сыала-соруга толору сиппэтэҕин, дьон сыһыана уларыйбытын, такси сыаната үрдүгүттэн,
барыта харчынан кээмэйдэнэр буолбутуттан, медиктэр хаҕыс сыһыаннарыттан олус хомойоммун, бэркиһээн суруйан бичийдим.
СӨ Бочуоттаах бэтэрээнэ, Үлэ бэтэрээнэ,
