Бу субуотаҕа, бэс ыйын 7 күнүгэр, Дьокуускайга Өксөкүлээх Өлөксөй аатынан Норуоттар доҕордоһууларын дьиэтигэр, Улуу Кыайыы 80 сылыгар анаммыт Саха сирин кэллиэксийэһиттэрин сыл аайы ыытыллар сийиэһэ буолуоҕа. Ити күн өрөспүүбүлүкэ бары кэриэтэ улуустарыттан кэлбит дьон тус кэллиэксийэлэрин уонна эспэнээттэрин көрдөрүөхтэрэ. Тэрээһин ыалдьыттара кэллиэксийэлэнэр манньыаттартан, значоктартан, сувенирдартан саҕалаан былыргы малга тиийэ араас антиквариаты көрүөхтэрэ.
Сийиэс сарсыарда 10.00 чаастан саҕалаан киэһэ 17.00 чааска диэри үлэлиэҕэ. Киириитэ – босхо.
“Быйыл биһиги Саха сирин кэллиэксийэһиттэрин IX сийиэһин тэрийэбит. Сыл аайы тэрээһиммитигэр, быһа холоон, 150 кэллиэксийэһит кэлэн кыттар. Сорох дьоммут онлайн холбоһор. Кинилэр муспут кэллиэксийэлэрин саалаҕа турар тэлэбиисэрдэргэ көрдөрүөхпүт.
Быйылгы анал быыстапкабытын Аҕа дойду Улуу сэриитигэр Кыайыы 80 уонна Саха сиригэр биллэриллибит Ийэ дойду көмүскээччитин сылларыгар аныыбыт. Үһүс сылбытын сийиэспит сүрүн бэлиэтинэн Саха сиригэр биллэриллибит Сыл бэлиэтин оҥоробут. Ол чэрчитинэн, аҕыйах ахсааннаах анал значогу оҥоробут. Кэллиэксийэһиттэр олус сэргииллэр. Сийиэспит кэннэ, бэл, атын эрэгийиэннэртэн эрийэн көрдүүллэр. Тэрээһиммит сүрүн соруга ол диэххэ сөп – дьону кэллиэксийэлииргэ угуйуу”, – диэн “Саха сирин кэллиэксийэһиттэрэ” РОО бэрэссэдээтэлэ Никифор Иванов кэпсээтэ.
Тэрийээччилэр этэллэринэн, сийиэс официальнай түһүмэҕэр көхтөөх кэллиэксийэһиттэргэ түөскэ анньыллар үрүҥ көмүс бэлиэлэри туттарыахтара. Ол гынан баран, тэрээһиҥҥэ саамай сүрүнэ – сылга биирдэ буолар сийиэс кэмигэр өрөспүүбүлүкэ араас муннугуттан кэлбит атын кэллиэксийэһиттэри кытта алтыһыы. Ким эрэ кэллиэксийэтин, тиэмэлэринэн муспут малларын көрдөрөр, ким эрэ атыылыыр, атастаһар. Аны туран, хас биирдии мал бэйэтэ туспа устуоруйалаах. Ону эмиэ сийиэскэ эрэ кэлэн истиэххэ-билиэххэ сөп. “Кэллиэксийэһиттэр сийиэстэрин сүүстэ истибиттээҕэр биирдэ көрбүт ордук”, – дииллэр тэрийээччилэр.
Сийиэс буолар сирэ: Дьокуускай к., Поярков уу. 4 дьиэтэ, А.Е. Кулаковскай аатынан Норуоттар доҕордоһууларын дьиэтэ.
Сэҥээриилэр
Николаевна Захарова о.д.а.кыттыахтара бэйэлэрин дьоннорун үйэтитэр сыалтан Аҕа дойду Улуу сэриитин кыттыылаахтарын, тыыл, хоту көһөрүүгэ сылдьыбыт ветераннарбыт матырыйаалларынан ,, Музей в чемодане "" илдьиэхпит.