Өрөспүүбүлүкэҕэ социальнай сулууспа ыытар үлэтэ-хамнаһа дьон-сэргэ хараҕын далыгар сылдьар саамай эппиэттээх үлэлэртэн биирдэстэрэ буолар. Аҕам саастаах кырдьаҕастар, инбэлииттэр, көрүүтэ-истиитэ суох хаалбыт кырачааннар... Күннэтэ кинилэр олохторун чэпчэтээри, кыһалҕаларын тэҥҥэ үллэстэн, бу эйгэ үлэһиттэрэ төһөлөөх сүүрэллэрэ-көтөллөрө, үлэлииллэрэ-хамсыыллара буолуой?! Ону, кырдьыга баара, үгүспүт билбэппит. Дьэ, онон социальнай эйгэ “ис куукунатын” билээри, суруналыыстар пресс-туурга сырыттыбыт. Ол туһунан сиһилии...
Ааспыт нэдиэлэ саҕаланыытыгар, СӨ Үлэҕэ уонна социальнай сайдыыга министиэристибэтин көҕүлээһининэн (миниистир Е.В. Волкова) Дьокуускай куоракка баар социальнай хайысхалаах 7 эбийиэккэ сырыттыбыт. Хас биирдии тэрилтэ төлөпүөнүн нүөмэрин, элэктэриэн почтатын уонна саайтын сурукка киллэрдибит. Тускутугар туһаныҥ!
Өрөспүүбүлүкэтээҕи социальнай хааччыйыы кэлим киинэ
(Төл.: 8(4112) 40-20-65, э/почта: Этот адрес электронной почты защищён от спам-ботов. У вас должен быть включен JavaScript для просмотра., саайт: https://rkcso14.ru
Сырыыбыт Пушкин уулуссатын 31/1 нүөмэрдээх дьиэтигэр үлэлии олорор Өрөспүүбүлүкэтээҕи социальнай хааччыйыы кэлим кииниттэн (дир. Н.Н. Пахомова) саҕаланар. Наталья Николаевна саастаах дьоҥҥо уонна инбэлииттэргэ туһуламмыт судаарыстыбаннай бырагыраамалар тустарынан билиһиннэрдэ. Кииҥҥэ 14 отделение, 6 эбийиэк олох уустук түгэннэригэр түбэспит дьоҥҥо анаан үлэлииллэр.
“Эрчим” күнүскү отделениеҕа уонна тэриллибитэ 10-тан тахса сыл буолбут “Үһүс көлүөнэ оскуолаҕа” аҕам саастаах дьон сылдьаллар. “Эрчим” күннээҕи стационарга сылга 16 төгүл киирии (заезд) буолар. Биир кэмҥэ 20 киһи сылдьар. Онон сыл устата 320-тэн тахса киһи хабыллар. Хас биирдии киһи 30 өҥө көрүҥүн туһанар. Ол курдук, муусука, үҥкүү, үлэ, оонньуу тэрэпиийэлэрэ, о.д.а. дьарыктар бааллар. Сыл аайы саҥаттан саҥа өҥө көрүҥүн киллэрэллэр. Олортон биирдэстэрэ – “Незабудка” бырайыак. Бу – түөһэйбит (деменция) дьоҥҥо анаммыт уопсастыбаннас болҕомтотун тардар бырайыак. “Незабудка” сибэкки – Альцгеймер ыарыылаахтар им бэлиэлэрэ (символ). Манна кэлбит дьон успуорт-аралдьытар кулуупка сылдьаллар, арт-тэрэпиийэнэн, хоһоон айыытынан дьарыктаналлар. Отделение иһинэн тэхиниичэскэй тэриллэри биэрэр прокат үлэлиир. Мантан кэлээскэни, ходуногу, баттык тайаҕы уларсыахха сөп.
Кырдьаҕастар уонна инбэлииттэр интэринээт-дьиэлэрэ
(Төл.: 8 (411) 244-81-11, саайт: https://club217244984.orgs.biz/)
Салгыы Якутская уулусса 8-с дьиэтигэр баар В.П. Решетников аатынан кырдьаҕастар уонна инбэлииттэр интэринээт-дьиэлэригэр кэлэбит. Бу тэрилтэ икки аадырыһынан (Якутская уул., 8-гар, Бекетов уул., 6-гар) үлэлиир. Биһигини дириэктэр Надежда Шомоева көрсөр. Анал тэрилгэ илиибитин даҕайан, тэмпэрэтиирэбитин мээрэйдэнэбит, мааска, бахила кэтэбит. Бастакы этээстэн экскурсиябыт саҕаланар. Кэлээскэнэн анньына сылдьааччылары сэргэ, сэһэргэһэ олорор олохтоохтору кэрийэ көрөбүт. Сэргэх сирэйдээхтэр, таҥас-сап да мааны.
Надежда Владимировна тэрилтэтин олохтоохторун, үлэтин-хамнаһын туһунан сирэйэ сырдаан, манньыйан туран кэпсиир. Кини быйыл бу дуоһунаска саҥа ананан үлэтин саҕалаабыт. Тылыттан-өһүттэн иһиттэххэ, чахчы даҕаны, үлэлиэх-хамсыах, социальнай эйгэ үлэтигэр улахан уопуттаах үлэһит буолара биллэр.
“Интэринээппитигэр 310 олохтоох баар. Орто саас – 61, саамай эдэрбит – 20, кырдьаҕаспыт – 102 саастаах. Эдэр дьонуттан саҕалаан сытар, кыаммат ыарыһахтар, кэлээскэҕэ олорооччуларга тиийэ бааллар. Дьоммут илиилэригэр сүрдээх талааннаахтар: арааһы бары оҥороллор, баайаллар, уруһуйдууллар.
Манна уопсай уочарат быһыытынан киирэллэр. Олорор сирдэринэн социальнай харысхал управлениетыгар уонна министиэристибэ хамыыһыйатыгар сайабылыанньа суруйаллар. Бары улуустартан кэлэллэр. Ыарахан “ментальнай” ыарыылаахтар эмиэ бааллар. Билигин 6 “недееспособнай” туруктаах ыарыһахтаахпыт.
Быйыл Өрөспүүбүлүкэ күнүн иннинэ, муус устар 26 күнүгэр, Ил Дархан кыттыылаах 1-кы №-дээх куорпуска сыһыары 200 миэстэлээх эбии тутуу кыһыл көмүс сыбаайата түспүтэ, тутуу 2027 сылга түмүктэниэхтээх. Инникитин элбэх профиллаах тэрилтэ буолуохтаах. Онон эрэнэ кэтэһэбит.
Иистэнэр киэҥ-куоҥ сыахха киирэбит.
Лена Лебедева, иистэнэр сыах үлэһитэ: “Олохтоохтору кытта иис дьарыгар үлэлэһэбин. 6 дьахтар, бириэмэ булан киирэн дьарыктаналлар. Аахсыйа тэрийэн, бэйэбит тигэн, оонньуурдары оҥорбуппут. Олохтоохтор ким тугу сакаастыырынан, таҥастарын тигэн биэрэбит”.
Александра Даянова: “Интэринээккэ 2016 сылтан олоробун, наһаа үчүгэй. Бэйэм Муома Улахан Чыыстайыттан сылдьабын. Манна кэлэн, улахан тапталбын көрсөн, бииргэ олорбуппут быйыл 9-с сыла буолар”.
“Старость в радость”
Интэринээт иһинэн үлэлиир “Милосердие” отделение 2023 сыл түмүгүнэн аҕам саастаах уонна инбэлииттэргэ Үтүөнү оҥорор пуонда быһаарыытынан, Арассыыйаҕа бастыҥ үлэлээҕинэн ааттаммыт. Көрүдүөр устун “Тепло и уют”, “Любовь и поддержка”, “Добрые дела – плоды” ыйаммыт баннердары көрөн, чахчы даҕаны, истиҥ сыһыан, эйгэ баар эбит диэн сыаналыыгын. Бу отделениеҕа төрүт кыаммат, сытар ыарыһахтар, үчүгэй көрүү-истии түмүгэр кэлээскэҕэ олорон, бэйэ бодотун тардынар кыахтаммыттар. Отделение иһинэн 8 киһи киирэн аһыыр остолобуойун көрөбүт. Ып-ыраас, дизайна даҕаны бэркэ табыллыбыт. Үгүстэрэ кыаммат, сытар буолан, хосторугар аһыыллар эбит. Биир балаатаны өҥөс гынан, оронугар олорор баабыска кыракый остуолга сиэркилэ иннигэр баттаҕын оҥосто олорорун таба көрөбүн. Балааталар тас өттүлэрэ, кырасыабай бэйэлээх сибэкки ойуулаах сабыылаахтар – олох дьиэтээҕи эйгэ.
Дьарыктанар саалаларыгар “Это мы не проходили, это нам не задавали” ырыа матыыбыгар уйдаран, олохтоохтор остуол тула олорон, кыра оҕо оонньуурдарын сааһылыыллар, уруһуйдууллар. Ону-маны ырыҥалыыр кыахтара суох, мэйиилэрэ кэһиллиилээх дьон буолалларын көрөн сэрэйэҕин. Дьиэлэригэр курдук эйгэни ис сүрэхтэриттэн кыһаллан, тэрийэн үлэлэтэр үлэһиттэргэ махтал буоллун.
Елена Ильина “Милосердие” отделение сэбиэдиссэйэ: “Манна уһун үйэлээх 4 киһи баар. 102, 101, 98 уонна 92 саастаах кырдьаҕастар, олорбуттара 10-тан тахса сыл буолла”.
“Берегиня” дьиэ кэргэҥҥэ иитиини өйүүр киин
(Төл.: 8(4112)42-23-59, 8(4112) 42-23-52, э/почта: Этот адрес электронной почты защищён от спам-ботов. У вас должен быть включен JavaScript для просмотра., cаайт: mintrud.sakha.gov.r, аадырыстара: 202-с мкр, 19/1)
202-с түөлбэҕэ баар “Берегиня” дьиэ кэргэҥҥэ иитиигэ өрөспүүбүлүкэтээҕи киин (дир. А.Н. Дьяконова) былырыын баччаларга үлэтин саҕалаабыт. Быһаччы эттэххэ, дьиэ кэргэҥҥэ көмөнү оҥорор Киин. Биһиги сылдьарбытыгар “биир түннүк” хайысханан төрөппүттэр консултаассыйаҕа киирэн олороллоро. Маны тэҥэ дьиэ кэргэн араас социальнай-реабилитационнай көмөнү ылар. Тренажёрнай саала, туустаах хос, сенсорнай кэбиниэт, оҕо оонньуур хосторо бааллар. Манна ыарахан балаһыанньаҕа түбэспит ыаллары кытта эрэ буолбакка, дьиэ кэргэн бары чилиэннэрин кытта үлэни ыыталлар. Киин мэтэдьиичэскэй отделын сэбиэдиссэйэ Наталья Алексеева иһитиннэрбитинэн, сүрүннээн, социальнай, юридическай уонна мэдиссиинэ өттүнэн кыһалҕалаах ыаллар кэлэллэр эбит.
Ааспыт 2024 сылга 862 дьиэ кэргэн хабыллыбыт. Ол иһигэр 600 ыал олох уустук балаһыанньатыгар түбэспиттэр.
Лена Соломонова, дириэктэри солбуйааччы:
– Биһиги Кииммитигэр ханнык баҕарар дьиэ кэргэн кэлиэн сөп. Сүрүннээн кэлэллэр – үлэ ыйыталаһан, оҕону иитэ ылыан баҕалаах дьон, социальнай хантараак түһэрсэн үлэлиэн баҕарааччылар, босуобуйаны ыйыталаһааччылар. Биһиги социальнай харысхал управлениетын, эпиэкэ дэпэртээмэнин, үлэлээх буолуу киинин кытары ыкса үлэлэһэбит. Онон дьиэ кэргэн биһиэхэ кэлэн кыһалҕатын быһаартарарыгар кыах үөскүүр. Оҕо иитэн, “приёмнай ыал” буолуон баҕалаах дьиэ кэргэн биһиэхэ манна үөрэҕи ааһар, ол кэнниттэн эпиэкэ дэпэртээмэнигэр тиийэн, оҕону иитэ ыларга бастакы хардыыны оҥорор. Көрүүтэ-истиитэ суох хаалбыт оҕолор биһиэхэ кэлэллэр. Уопсайынан, биһиги үлэбит сыала-соруга оҕо дьиэ кэргэннээх буолуохтааҕар туһуланар.
Дьиэ кэргэҥҥэ оҕону иитиигэ көмөлөһөр өрөспүүбүлүкэтээҕи киин
(Төл.: 8(4112)405-630, э/почта: Этот адрес электронной почты защищён от спам-ботов. У вас должен быть включен JavaScript для просмотра.), саайт: http://yktfamilycenter.ru/)
СӨ “Дьиэ кэргэҥҥэ оҕону иитиигэ көмөлөһөр өрөспүүбүлүкэтээҕи киин” (дир. Э.В. Кондратьев) үлэлии олорор Пётр Алексеев уул., 79/1 дьиэтигэр кэлэбит. Ааспыт сылга тэриллибиттэрэ 100 сылларын туолбуттар. Айылҕа ортотугар турар буолан, салгына ырааһа, тыаһа-ууһа суоҕа, хата, чөкө дойду. Көрүүтэ-истиитэ суох хаалбыт оҕону 24 чаас устата хаһан баҕарар аҕалыахтарын сөп эбит. Даҕатан эттэххэ, манна 7 сааһыгар диэри кырачааннар киирэллэр. Онон кыра саастаах оҕолор сылдьар буоланнар, мэнээк сүүрэ сылдьаллара көстүбэт. Барыта – биирдиилээн үлэ. Үлэһиттэр оҕолору сиэтэ сылдьан анал процедураларга, дьарыктарга сырытыннараллар. Биир кэбиниэккэ киирбиппит аҕыйах ыйдаах кырачаан дьигиһийэн хамсатар, ийэ иһигэр сытар курдук турукка киирэр сымнаҕас тэрилгэ астына сытарын таптыы көрөбүн.
Киин дьиэтэ-уота киэҥэ, сырдыга үчүгэйэ сүрдээх. Хамсык ыарыы кэмигэр Эдуард Владимирович өрөспүүбүлүкэҕэ аан бастакынан туустаах хоһу арыйан үлэлэппит. Онно кырачааннар улахан киһи арыалдьыттаах астына аҕай олороллор.
Бүтэһик 5 сылга Кииҥҥэ 430 оҕо киирбититтэн 369 оҕо дьиэ кэргэҥҥэ төннөрүллүбүт. Бу – үчүгэй көрдөрүү. Эдуард Владимирович ыытар үлэлэрин үтүө түмүгүнэн киэн тутталларын үөрэ-көтө кэпсиир.
Дьиэ анал мэдиссиинэ уонна педагогика блоктарынан арахсар. Оҕо доруобуйатын чөлүгэр түһэриигэ, тупсарыыга эмтиир илбийии, физкультура, физио, гидротерапия кэбиниэттэрэ бааллар. Физиотерапия кэбиниэтэ аныгы тэриллэринэн толору (ингаляция, электролечение, светолечение). Маны сэргэ гидромассаж, бассыайын бааллар. Успуорт тэриллэринэн толору хааччыллыбыт улахан успуорт саалатыгар икки анал идэлээх үлэһит кырачааннары биирдиилээн дьарыктыы сылдьалларыгар түбэһэбит.
Туйаара Босикова, отделение сэбиэдиссэйэ:
– Тэрилтэбитигэр тулаайах, төрөппүт бырааптара быһыллыбыт ийэлээх-аҕалаах уонна кутталлаах балаһыанньаҕа хаалбыт оҕолор кэлэллэр. Маннык тэрилтэ өрөспүүбүлүкэҕэ соҕотох. Аан бастаан кэлээт, 7 хонукка харантыыҥҥа киирэллэр. Онно анаалыс ылаллар, педагог-психолог диагностика оҥорор. Бу кэм устата төрөппүт докумуоннарын хомуйсан, оҕотун төттөрү ылыан сөп. Оттон ким да биллибэтэҕинэ, оҕо салгыы дьиэ кэргэҥҥэ иитэр бөлөххө барар. Биһиэхэ маннык 5 бөлөх баар. Бииргэ төрөөбүт оҕолор биир бөлөххө сылдьаллар. Сорох төрөппүттэр сүүрэн-көтөн оҕолорун түргэнник ылаллар, сорох ылбат.
Инбэлииттэр доруобуйаларын чөлүгэр түһэрэр киин
(Төл.: 8(4112) 34-71-12, э/почта: Этот адрес электронной почты защищён от спам-ботов. У вас должен быть включен JavaScript для просмотра., саайт: www.ykt-rsockri.ru)
Ю.П. Степанов аатынан Инбэлииттэр доруобуйаларын бары өттүнэн чөлүгэр түһэрэр өрөспүүбүлүкэтээҕи социальнай-чэбдигирдэр киин Дьокуускай куорат Рихард Зорге уулуссатыгар баар. Тэрилтэ дириэктэрэ Асида Алексеева, бу тэрилтэҕэ үлэлээбитэ ырааппыт. Үлэһиттэр да, сытааччылар да олус ытыктыыллар.
Манна киһи толору буолан биэрдэ. Эбиэт кэмигэр түбэспит буоламмыт, улахан остолобуой – толору киһи. Анал куукунаҕа ыарахан ыарыы кэнниттэн кыайан хамсаабат буолбут дьоҥҥо анаан анал быһаҕынан, иһитинэн-хомуоһунан хайдах туһанарга үөрэтэллэрин көрдөрдүлэр. Олоххо интэриэстэрин сүтэрбит ыарыһахтарга бастатан туран уйулҕа идэлээхтэрэ көмөлөһөллөр, сүбэ-ама биэрэллэр, чугас дьонугар инбэлиит киһини инникитин хайдах көрөргө-истэргэ үөрэтэллэр.
Киин 149 миэстэлээх, ол иһигэр 125 – инбэлииттэргэ, 20 – АБДь кыттыылаахтарыгар уонна кинилэр дьиэ кэргэннэригэр, 4 куойка харахтарынан инбэлиит дьоҥҥо уонна кинилэри арыаллааччыларга ананар. АБДь саҕаланыаҕыттан – 882, ол иһигэр 450 байыаннайдарга, бэтэрээннэргэ уонна 432 дьиэ кэргэн чилиэнигэр көмө оҥоһуллубут. Манна даҕатан эттэххэ, АБДЬ кыттыылаахтара суукка хайа баҕарар кэмигэр манна киириэхтэрин сөп.
Маны тэҥэ байыастар араас кыһалҕаларыгар – наҕараада, төлөбүр, араас докумуоннары хомуйууга – үлэни эмиэ ыыталлар. Кинилэр “Защитники Отечества” пуонданы кытта ыкса үлэлэһэллэр.
Доруобуйаны чөлүгэр түһэрии араас хайысханан ыытыллар. Ол курдук, эминэн тэрэпиийэ, физиотерапия, механотерапия, кинезотерапия, чэбдигирдэр физкультура, массаас, мануальнай тэрэпиийэ о.д.а.
Маргарита Николаева, Уус Алдан Бороҕонуттан сылдьар 2-с курууппалаах инбэлиит:
– Бу дьиэни билбитим 10 сыл буолла. 2011 сылтан кэлэбин. Сүрдээх үчүгэй кэлэктиип. Туһалаах процедуралары биэрэллэр. Ол инсуллаабыт киһиэхэ сүрдээх наадалаах. Сытарга, эмтэнэргэ усулуобуйа барыта баар. Кыһамньылаах үлэһиттэр. 10 сыл сылдьарым тухары барыта биир үлэһиттэр, каадыр уурайбатын кэриэтэ. Онтон астынабын. Кэлэктиип олус түмсүүлээх. Салайааччылара Асида Июньевна өҥөтө улахан.
Бэйэм геморрагическай инсульт кэнниттэн сытар ыарыһах киирбитим. Туругум мөлтөөрү гынна да, бу дьиэбин булабын. Манна кэллэхпинэ, доруобуйабын чөлүгэр түһэрэллэр. Онон бу Киин үлэһиттэригэр уонна дириэктэр А.И. Алексееваҕа улаханнык махтанабын
Инсуллаабыт ыарыһахтары чаастатык сытыаран, эмтииллэрэ буоллар, өссө үчүгэй буолуо этэ. Икки сылга биирдэ эмтэниэхтээххит дииллэр эрээри, инсуллаабыт киһи сыл аҥаара буола-буола “реабилитация” ааһыахтаах. Мин билэрбинэн, инсуллаабыт элбэх дьон дьиэлэригэр сытаахтыыллар. Онон бу кыһалҕа быһаарыллара уонна норуокка наадалаах маннык дьиэлэр элбииллэрэ буоллар диэн баҕа санаалаахпын.
Доруобуйаларыгар хааччахтаах оҕолору реабилитациялыыр өрөспүүбүлүкэтээҕи киин
(Төл: 8(4112) 31-80-05, э/почта: Этот адрес электронной почты защищён от спам-ботов. У вас должен быть включен JavaScript для просмотра., саайт: https://ррцдети.рф
Сэргэлээхтиир шоссе 10-с килэмиэтирин 47-с дьиэтигэр Доруобуйаларыгар хааччахтаах оҕолору реабилитациялыыр өрөспүүбүлүкэтээҕи киин (дир. З.С. Максимова) 2018 сылтан 12 000 кв.м иэннээх кырасыабай бэйэлээх 2 этээстээх дьиэҕэ үлэлиир.
Манна кэлбит хас биирдии оҕоҕо биир кэлим диагностика бырагыраамата оҥоһуллар. Ол курдук, күн устата оҕо 5–6 процедураҕа 21 хонук устата сылдьар. Кэлбит оҕоҕо, олорор сиринэн быраас-педиатр биэрбит выпискатыгар олоҕуран, чаас аҥаара кэм устата “маршрут” оҥоһуллар.
Кииҥҥэ 6 успуорт саалата, оонньуур хостор, Монтессори мэтиэдьикэнэн оҕолору сайыннарыы, массаас, логопед дьарыктара бааллар. Саамай чыпчаал, сөҕүмэр көстүүлээх, эйгэлээх сиринэн гидромассажтаах бассыайын уонна фонтан буолаллар. Оҕолор барахсаттар астына сөтүөлүүллэрин сэрэйэҕин эрэ. Бассыайын уута 26–28 кыраадыска тиийэ сылаас. Онтон ДЦП-лаах оҕо сылдьарыгар уу сылааһын 33 кыраадыска тиийэ сылыталлар.
Зинаида Максимова, киин дириэктэрэ:
– Өрөспүүбүлүкэ улуустарыттан сылга 3500 оҕо төрөппүттэрин кытта кэлэн бараллар, тоҕо диэтэххэ, оҕону чөлүгэр түһэриигэ төрөппүт оруола улахан. Төрөппүт туох баар дьарыктарга тэҥҥэ сылдьыһар. Быйылгы сылтан инбэлиит эрэ оҕолору ылар буоллубут. Арай 3–4 ыйдарыттан 3 саастарыгар диэри кырачааннары “эрдэтээҕи көмө” быһыытынан ылабыт. 21 хонуктаах киириигэ (заезд) 202 оҕо, ону таһынан мэдиссиинэ булгуччулаах страховкатынан (ОМС) 20–30 оҕо кэлэр. 144 куойка миэстэлээх стационардаахпыт.
Манна социальнай реабилитация диэни өйдүөххэ наада. Бу – үөрэтии да, эмтээһин да буолбатах, оҕо олоххо хайдах усулуобуйаҕа сөп түбэһэрэ, социальнай олоххо-дьаһахха, дьиэҕэ-уокка сылдьарга, бэйэни көрүнэргэ, аһыырга-сииргэ, таҥнарга-саптарга үөрэниитэ буолар.
Улуустан кэлээччилэр олохтоох социальнай харысхал управление “квотатынан” кэлэллэр. Төрөппүт оҕотун кытта манна стационарга (уопсай) 21 хонукка олороллор. Куоракка көҥүл кэлэр-барар усулуобуйалара олохтонор. Барыта – босхо. Оттон күнүскү стационарга куораттан сылдьааччы оҕо биирдэ аһыыр, төрөппүт аһаабат.
Онон оҕо доруобай буолуутугар туһуламмыт сүдү дыбарыаска сылдьан, олус астынныбыт. Чахчы даҕаны, оҕо, кэнчээри кэскил туһугар судаарыстыба аҕалыы кыһамньытын уурарыгар итэҕэйдибит.
Өрөспүүбүлүкэтээҕи техникум-интэринээккэ
Сырыыбыт М.Н. Донской аатынан инбэлииттэр өрөспүүбүлүкэтээҕи техникум-интэринээттэригэр (дир. М.Н. Сивцева) түмүктэннэ. Манна доруобуйаларынан хааччахтаах ыччаттар үөрэнэн, араас идэни баһылыыллар. Ол курдук, иистэнньэҥ, парикмахер, кондитер, о.д.а. идэлэргэ үөрэтэллэр. Быйылгы үөрэх дьылыгар 2 саҥа бырагыраама – кыраапыкалыы дизайн уонна тэхиниичэскэй өйөбүл эпэрээтэрэ аһыллыбыт. Маны сэргэ саҥа идэлэр – социальнай үлэһит уонна “документооборот и архивоведение” диэн идэлэргэ устудьуоннары ылыахтара.
М.Н. Сивцева, дириэктэр:
– 9-с кылаас кэнниттэн инбэлиит уонна доруобуйаларынан хааччахтаах оҕолору үөрэххэ ылабыт. Сыл ахсын 10 бырагырааманан араас идэҕэ үөрэтэбит. Докумуоннары тутуу “Госуслуги” нөҥүө бэс ыйын 20 күнүттэн саҕаланар. Сыл аайы былаан быһыытынан 110 устудьуону ылабыт. Үөрэнэ киирбит устудьуоннар бары уопсай дьиэнэн хааччыллаллар, күҥҥэ биэстэ босхо аһыыллар. Мэдиссиинэ үлэһиттэрэ оҕолор доруобуйаларын кэтээн көрөллөр.
Евгений Гаврильев, устудьуон, 24 саастаах:
– Хаандыгаттан сылдьабын. Оһолго түбэһэн, 3 сыл кэриҥэ сыппытым. Манна кондитер идэтигэр үөрэнэ сылдьабын. Миэхэ, кэлээскэҕэ олорор киһиэхэ, манна үөрэнэрбэр, олорорбор табыгастаах усулуобуйа барыта баар. Күҥҥэ биэстэ аһаталлар. Бу күннэргэ быраактыкабытын туттараары сылдьабыт. Дьиҥинэн, программист үөрэҕэр үөрэнэр былааннааҕым. Ааспыт сылга суох этэ. Инбэлиит ыччаттары манна үөрэнэ кэлиҥ диэн ыҥырыам этэ.
Техникум успуорка отделын салайааччыта, СӨ үтүөлээх тириэньэрэ Пётр Давыдов адаптивнай успуортан иитиллэн тахсыбыт Арассыыйа таһымнаах успуорт үтүөлээх маастардара Владимир Балынец, Сергей Николаев, Василий Стрекаловскай уонна Алена Дмитриева ааттарын киэн тутта ааттаталыыр.
Владимир Балынец Сергей Николаев Василий Стрекаловскай уонна Алена Дмитриева иитиллэн тахсыбыт успуорт саалата
Дьэ, бу курдук СӨ Үлэҕэ уонна социальнай сайдыыга министиэристибэтин көҕүлээһининэн дьоһуннаах тэрээһин, сырыы буолла. Хаһан да сылдьыбатах тэрилтэлэрбитинэн сылдьан, илэ көрөн-истэн, тугу билбиппин сурукка тистим. Өссө интэриэһинэй, дьиҥнээх каадырдары биидьийэҕэ устубуппун аллара баар куар кодка төлөпүөҥҥүтүн даҕайан көрүҥ-истиҥ. Сүүстэ истибиттээҕэр биирдэ көрбүт ордук, күндү ааҕааччыларбыт!
Пресс-туурга сылдьан көрдө-иһиттэ Саргылаана БАГЫНАНОВА.
