Бүгүн өрөспүүбүлүкэтээҕи медиакиин конференц-саалатыгар СӨ үтүөлээх суруналыыһын, В.В. Никифоров-Күлүмнүүр аатынан судаарыстыбаннай бириэмийэ лауреатын, СӨ култууратын уонна бэчээтин туйгунун, “Кыым” хаһыат сүрүн эрэдээктэрин Иван Гаврильевы чиэстээһин буолла.
Уйбаан Уйбаанабыһы 60 сааһын туолбутунан эҕэрдэлии былаас, СМИ, кинигэ кыһаларын, уопсастыбаннай тэрээһиннэр, билим уонна үөрэх тэрилтэлэрин бэрэстэбиитэллэрэ муһуннулар.
СӨ Ил Дарханын Айсен Николаев аатыттан эҕэрдэ тылларын бырабыыталыстыба бэрэссэдээтэлин солбуйааччы Анатолий Семенов тиэртэ. Кини кэнниттэн истиҥ эҕэрдэлэрин уонна алгыстарын СӨ култуураҕа уонна духуобунай сайдыыга миниистирэ Афанасий Ноев, СӨ инновацияҕа, сыыппара сайдыытыгар уонна инфокоммуникация технологиятын миниистирин бастакы солбуйааччыта Дмитрий Васильев, СӨ тыатын хаһаайыстыбатын уонна ас-үөл бэлиитикэтин миниистирин солбуйааччы Николай Афанасьев, СӨ суруналыыстарын сойууһун бэрэссэдээтэлэ Олег Марков, «Айар» кинигэ кыһатын генеральнай дириэктэрэ Август Егоров уонна да атыттар тиэртилэр.
Тыл эппит дьон бары Иван Гаврильев ийэ тылы, төрүт култуураны барҕардарга, сахалыы хаһыаттары сайыннарарга баараҕай кылаатын аҕыннылар. Ону таһынан саха омугар сүүнэ суолталаах уопсастыбаннай үлэтин тоһоҕолоон бэлиэтээтилэр. Бары Уйбаан Уйбаанабыс үлэни-хамнаһы тэрийээччи быһыытынан уһулуччу талааннааҕын уонна киһи киэнэ килбиэннээҕэ буоларын чорботон эттилэр.
Бэлэх-туһах эгэлгэтин таһынан, Уйбаан Уйбаанабыс бүгүн түөһүгэр түөрт мэтээл иилиннэ – «Ийэ тыл уонна төрүт култуура сайдыытыгар кылаатын иһин», «За вклад в развитие профсоюза работников культуры Якутии», «За вклад в развитие национального книгоиздания» уонна СӨ экология, айылҕаны туһаныы уонна ойуур хаһаайыстыбатын министиэристибэтиттэн «Зелёное перо» диэн аат мэтээлин.
Тэрээһини СӨ Судаарыстыбаннай опера уонна балет тыйаатырын солиһа Александр Емельянов уонна СӨ судаарыстыбаннай эстрада тыйаатырын солистката Анастасия Готовцева ылбаҕай ырыаларынан киэргэттилэр.
“Кыым” хаһыаты түстээбит, «Ил Түмэн» кыһа генеральнай дириэктэрэ уонна сүрүн эрэдээктэрэ Мария Христофорова түмүктүүр иһирэх тыллары эттэ уонна Уйбаан Уйбаанабыска кини мэтириэттээх аарыма чороону туттарда. Ол кэнниттэн ыалдьыттары барыларын сандалыга ыҥырда.
Истиҥ эҕэрдэлэргэ, алгыс тылларыгар кыттыһабыт!
