Итинник ыйытык Дьокуускайдааҕы Гагаринскай уокурукка бырабыыталыстыба отчуотун кэмигэр киирдэ. Чэ, барытын саас-сааһынан кэпсиэххэ.
Отчуот Ю.А. Гагарин аатынан култуура дьиэтигэр буолла. Сүрүн дакылааты СӨ бырабыыталыстыбатын бэрэссэдээтэлэ Кирилл Бычков аахта. Кинини кытта тэрээһиҥҥэ бастакы солбуйааччылара Джулустан Борисов уонна Дмитрий Садовников, зампредтар Ольга Балабкина, Анатолий Семенов, Сергей Местников, Георгий Степанов, миниистирдэр уонна Дьокуускай мээрэ Евгений Григорьев кытыннылар.
Кирилл Бычков, бастатан туран, кэрэ аҥаардары кэлэн иһэр Норуоттар икки ардыларынааҕы дьахталлар күннэринэн эҕэрдэлээтэ. Онтон бырабыыталыстыба былырыыҥҥы үлэтин туһунан кэпсээтэ. Салгыы үлэ хайысхаларын, былааннарын билиһиннэрдэ.
Онтон нэһилиэнньэ ыйытыктарын түһүмэҕэ саҕаланна.
Гагаринскай уокурук олохтоохторо биир-биир микрофоҥҥа кэлэн кыһалҕаларын кэпсээтилэр. Сорохторо улахан хабааннаах буоллулар. Холобур, Өлүөнэ өрүс нөҥүө муоста тутуута хайдах тэтимнээх баран иһэрин туһунан ыйытык киирдэ. Уонна сир баайын хостуур дохуот саатар 40 бырыһыанын өрөспүүбүлүкэҕэ хаалларар туһунан этии киирдэ. Кирилл Бычков муоста тутуутун туһунан сиһилии кэпсээтэ, үлэ билигин даҕаны тигинэччи бара турар диэтэ. Ол эрэн, муоста хаһан тутуллан бүтэрин чопчу эппэтэ. Сир баайын дохуоттарын үллэстии туһунан билигин федеральнай киини кытта саҥа үлэ көрүҥнэрин ырытыһа сылдьабыт диэтэ. Ол гынан баран, урукку «икки күлүүс пириинсибэ» сөргүтүллүбэтин бэлиэтээтэ.
Сорох ыйытык чопчу уокурук олоҕун-дьаһаҕын туһунан буолла. Олорго мээр Евгений Григорьев хоруйдаата. Холобур, олохтоохтор биһиги уокурукпутугар «Мои документы» хонтуората суох, ол иһин ыраах айанныырга күһэллэбит диэтилэр. Онуоха мээр ити туһунан билэбит, «Полёт» маҕаһыын дьиэтин элбэх өҥөлөөх киини арыйарга биэрэр санаалаахпыт диэтэ.
Сергей Хромов куоракка туризмы сайыннарар барыллар тустарынан ыйытта. Кини бэйэтэ үбүлээн Табаҕа тумулун аттыгар туркомплекс тута сылдьар эбит. Онно бүрүкүрээтийэ харгыстарыгар мэһэйдэппит. Ол комплексы түргэнник ситэ тутарга уонна АБДь кыттыылаахтарын онно үлэҕэ ыларга көрдөстө.
Мунньах кыттыылаахтарын устудьуон сэргэхситтэ. Мээртэн ыйытта:
– Читал Ваш отчёт о том, что закрыли много нелегальных точек по продаже алкогольных напитков. А у Вас в заначке есть коньячок?
Евгений Григорьев өр толкуйдуу барбата:
– У меня в кармане лежит абонемент в спортзал. Вас как зовут?
– Дьулустаан.
– Я Вас запомнил, – диэтэ мээр.
Киһитэ да хаалсыбата:
– Это хорошо. Я учусь на политолога, так что в будущем намерен работать в правительстве, в мэрии или в Ил Тумэне. Так что, запомните меня.
– Сначала встретимся в спортзале, – диэн буолла.
Биэнсийэҕэ олорор Мария Габышева биһиги хаһыаппыт туһунан ыйытта:
– Почему с начала этого года самая старая, народная газета «Кыым» перестала поступать в продажу? Слышала, что её теперь печатают в Хабаровске, а не в Якутске. Из-за этого она приходит с опозданием. А кто не подписался, не могут купить при всём желании. Без этой газеты мы не можем жить!
Киниэхэ зампред Анатолий Семёнов хоруйдаата:
– Я в курсе этой ситуации. Держу вопрос на личном контроле. Общаемся с учредителями, главным редактором «Кыыма» и директором типографии имени Гагарина. Мы ежегодно выделяем из бюджета финансовые средства в помощь изданию этой газеты. Это единственная частная газета в республике, которой оказывается такая помощь. Поскольку, подчеркну, газета частная, она имеет право выбирать, где ей печататься. Да, они печатались в Якутске, но сами сравнивали цены и выбрали типографию в Хабаровске. Сейчас ведутся переговоры, надеюсь, они снова начнут печататься в Якутске. Потому что вопрос касается не только стоимости, но и скорости доставки до читателей. Думаю, мы договоримся на взаимоприемлемых условиях, и народная газета снова будет печататься в Якутске и вовремя доходить до читателей.
Хас киирбит ыйытыгы уонна этиини бороткуоллаатылар. Былаас бэрэстэбиитэллэрэ барытын хонтуруолга ыллыбыт, эһиил барытын толору отчуотуохпут диэн мэктиэлээтилэр.
Александр ИЛЬИН-ЕГОРОВ.
