Хоруона хамсыга кэрэ эйгэтин үлэһиттэрин улаханнык харгыстаата.
Мииринэй оройуонун олохтоохторо, бырааһынньык, көр-нар, кэнсиэр, үҥкүү-битии диэнтэн тэйэн олоробут.
Дьэ бу күөнүгэр, «Алмаас» култуура уораҕайын үлэһиттэрэ тугу эрэ саҥаны толкуйдууллар, талааннаах ыччаты кытары утумнаах үлэлэрин быспаттар.
Дьэ ити курдук, «Кустук» норуот ансаамбыла, 17-тэн 25-гэр диэри саастаах эдэр ыччаты сахалыы үҥкүүнү баһылыырга ыҥырар. Маны сэргэ, «Кустук» оччугуй саастаахтарын бөлөҕөр, 7-14 саастаах оҕолору сүүмэрдииллэр.
Санатан эттэххэ, “Алмаас” култуура уораҕайыгар QR-куодтаах уонна прививка сертификаттаах эрэ киллэрэллэр. «Кустук» үҥкүү ансаамбыла – алмаастаах Мииринэй киэн туттуута. Бу ансаамбылы, 1983 сыллаахха Саха Өрөспүүбүлүкэтин култууратын үтүөлээх үлэһитэ Анатолий Филиппов төрүттээбитэ. Норуот ансаамбыла аатын ыларын ситиспитэ. Хомойуох иһин, А.Филиппов, айар үлэтин үгэнигэр сылдьан, ыарахан ыарыыттан суох буолбута. Билигин, “Кустугу”, талааннаах уһуйааччы Елена Семеновна Васильева салайар.
Мииринэйгэ үлэлиир, үөрэнэр саха уолаттара, кыргыттара кытаатан кэрэ эйгэтигэр ылсыһыҥ, үҥкүүгэ бэйэҕит кыаххытын холонуҥ!
Станислав Алексеев. Мииринэй куората. Ааптар хаарытскаҕа түһэриитэ
