Лоп курдук Өрөспүүбүлүкэ күнүгэр, муус устар 27 чыыһылатыгар, TAG Арт-резиденция дьиэтигэр Роман МАРКОВ «IL ɔju: BIS» (ИЛ ойуу БИС) диэн анал быыстапката саҕаланна. Экспозицияҕа 2020-2022 сыллааҕы уруһуйдара турдулар. Хас биирдии уруһуй тус-туспа ис хоһоонноох, дириҥ философиялаах буолан, мустубут дьону ураты туспа эйгэҕэ угуйда. Маны тэҥэ, саха быһахтарын оҥорор «Dobunknives» диэн тэрилтэ талааннаах үлэһиттэрин кытары кыттыһан оҥорбут былыргы боотур куйаҕа турара, дьон сэҥээриитин тарта. Быыстапкаҕа кэлбит дьон ол куйаҕы кытары хаартыскаҕа түһүөхтэрин, тутан-хабан көрүөхтэрин сөп.
Быыстапка ааптара Роман Марков маҥнай хаһыат, сурунаал иллюстраторыттан саҕалаан, “Мыымах. Кремень государственности” уонна “Тыгын Дархан” курдук улахан киинэлэр бырайыактарыгар үлэлэспит биллэр эдэр худуоһунньук. Худуоһунньук бэйэтэ билинэринэн, бу киинэлэргэ үлэлэспитин кэннэ, устунан Саха сиригэр христианизацияны тарҕатыы иннинээҕи кэми улам-улам сэҥээрэн, үөрэтэн-чинчийэн, ол үйэтээҕи олоҕу-дьаһаҕы, дьону-сэргэни хараҕар хайдах уобарастаан көрөрүн, уруһуйун нөҥүө киэҥ эйгэҕэ көрдөрөр.
Күннэй Тимофеева: - Роман Марков үлэтэ тематынан олус күүстээх: олох-дьаһах, биис-уус... Маны таһынан, аны күүстээх эйгэ – ойууннааһын-удаҕаннааһын, кыргыс-сэрии кэмнэрин уобарастааһын... Бу курдук уустук эйгэни кини өҥүн-дьүһүнүн кыайан бэркэ хартыына гынан таһаарбыта эдэр дьон, биһигини сөхтөрдө. Онон, инниктин бу курдук сайда-үүнэ уонна талаанын көрөдөрө турарыгар!
Анастасия Борисова: - Быыстапка уруһуйдара киһи хараҕар тута быраҕыллаллар. Мин көрөрбүнэн, ордук тымныы хараҥа өҥ баһыйар. Ол өҥнөрүн олус сөпкө таба тайанан холбоон уруһуйдаабыта, көрөөччүнү абылыыр, угуйар. Хартыыналар эдэртэн саҕалаан эмэнигэр тиийэ дьоҥҥо сыһыаннаах. Бу балхааннаах, түргэн-тарҕан олоххо сылдьан дириҥ уонна кистэлэҥнээх эйгэҕэ тиийэн хаалар курдук санаммытым. Дирбиэн-дарбаан, уустук кэмнэргэ киһини бөҕөргөтөргө дылы гынар. Онон, кэлэн көрөргүтүгэ уонна эдэр худуоһунньугу өйдүүллэригэр ыҥырыам этэ.
Бу быыстапка ыам ыйын 18 күнүгэр диэри буолуоҕа. Кэлэн көрүҥ, сэргэҕэлээҥ, Роман Марков уруһуйдарын нөҥүө түҥ былыргы кэмҥэ айанныахха!
Үлэлиир кэмэ: оптуорунньук – баскыһыанньа – 10.00 ч. - 20:00 ч. диэри. Бэнидиэнньик – өрөбүл.
Аадырыһа: TAG Арт-резиденция, Кальвица уул. 14/1а, 1 этээс.
Киириитэ: 200 солк., устудьуоннарга уонна оскуола оҕолоругар - 150 солк.
