Саха сирин Киһи быраабыгар боломуочунайа Сардаана Гурьева бүгүҥҥү брифиҥҥэ байыаннай сулууспалаахтар көрдөһүүлэрин хайдах көрөллөрүн уонна быһааралларын кэпсээтэ.
«Биһиэхэ улуустан ыҥырыллан анал байыаннай дьайыыларга кытта барбыт уол доруобуйатын туһунан ийэтэ суруйбута. Онуоха Саха сиринээҕи гарнизон байыаннай борокуратууратыгар сурук ыыппыппыт. Ол кэннэ байыаһы Запорожьеттан Ростов-на-Дону к. госпиталыгар киллэрбиттэрэ. Онтон Дьокуускай к. балыыһатыгар аҕалбыттара. Манна киниэхэ ирдэнэр эпэрээссийэни оҥордулар. Бэнидиэнньиккэ байыас доруобуйатын сиһилиир докумуон байыаннай чааска барда. Онно олоҕуран кинини сулууспаттан кылгас больдоххо эбэтэр букатын босхолуохтара», – диэн Сардаана Гурьева биир түгэни холобурдаата.
Өссө биир байыаннай сулууспалаах доруобуйатыгар кыһалҕаламмыт. Кини Бехтерев ыарыытынан ыалдьыбыт сибикилээх эбит. Ол туһунан иһитиннэрии кэлбитигэр байыаннай уокурук борокуруоругар суруйбуттар. Ол түмүгэр С. гражданины госпиталга укпуттар. Салгыы кини сулууспалыыр кыахтааҕын эбэтэр кыаҕа суоҕун быһаарыахтара .
Сардаана Гурьева анал байыаннай дьайыылар кыттыылаахтарыттан кирэдьиит каникулун туһунан элбэх көрдөһүү киирэрин эттэ. Манна сүрүн кыһалҕа – байыаннай чаас хамнадыырдара кирэдьиит төлөбүрүн тохтоторго ирдэнэр докумуоннары сулууспалаахтарга бигэргэтэн биэрэллэрэ буолар. Боломуочунай ирдэһиитинэн РФ Оборонаҕа министиэристибэтэ хамандыырдар бары докумуоннары бигэргэтэр эбээһинэстээхтэрэ чопчуланна.
Сонун төрдө: CӨ Бырабыыталыстыбатын уонна Ил Дарханын пресс-сулууспата
