Билиҥҥи кэмҥэ көмүс киэргэл маҥан ырбаахы эбэтэр муодунай таҥас курдук, киһи күннээҕи олоҕун тутаах чааһа буолла. Сорох дьон күндү таастаах оҥоһуктары мааныга эрэ кэтиллэр киэргэл курдук ылыналлар. “Антиглянец” диэн Telegram-ханаал уонна АЛРОСА хампаанньа 24 киэргэллээх Diamonds.Daily кэллиэксийэни таһааран, ити өйдөбүлү туора соттулар. Ол эбэтэр бирилийээннээх көмүс киэргэллэри киһи күн да аайы кэтэр кыахтааҕын дакаастаатылар.
Аҥаардас биир оҥоһуктан киһи ювелирнай эйгэ алыптаах, чараас эйгэтигэр умсугуйар. Хас биирдии оҥоһук – ытарҕа, моонньуга иилиллэр киэргэл, биһилэх, ытарҕалаах сыапачыка, намчы сыапачыкаҕа иилиллибит медальон, стейтмент-биһилэх, моно-ытарҕа уонна диадема арааһа хараҕы халтарытар. Ити кэрэни көрөн, муода тохтообот тэтимнээх хамсааһыҥҥа сылдьарын өйдүүгүн. Кэллиэксийэ аксессуардара уһулуччу хаачыстыбаларынан, кэрэхсэбиллээх дизайнарынан уонна ааптар иһирэх толоруутунан атыттартан ойуччу уратылар. Бары оҥоһуктар оруосабай, маҥан уонна араҕас кыһыл көмүстэн оҥоһуллубуттар, араас чочуйуулаах бирилийээннэринэн киэргэтиллибиттэр. Ити барыта ювелирнай оҥоһук уустук ускуустубатын туоһулууллар.
Ханаал ааптардара Наталия Архангельская, Татьяна Столяр уонна Юлия Пош дизайнер быһыытынан үлэлээн, Арассыыйа алта эдэр талааннаах ювелирдарыгар аныгы дэмэкирээтийэлии кэллиэксийэҕэ ылсарга тыл көтөхтүлэр. Kova, Himеre, Caviar Jewellery, Jemae Jewels by Maria Efimova, Jewlia и Rhoe Bermat курдук ювелирнай бренд хампаанньалара бэйэлэрин фирменнэй оҥоһуктарын туруордулар, оттон админнар бэйэлэрин толкуйдарын эттилэр. Ол курдук, Татьяна Столяр “Хороший мальчик” диэн подвесканы, Наталья Архангельская биһилэҕи, моно-ытарҕаны уонна оҕуруо оҥоһукка майгынныыр ытарҕаны, Юлия Пош оруосабай кыһыл көмүстэн сампаан бакаала быһыылаах подвесканы уонна диадеманы көрдөрдүлэр.
“Кэллиэксийэ аата даҕаны бу киэргэллэри киһи күн аайы уларыта сылдьан кэтиэн сөбүн этэр. Биһиги Diamonds.Daily оҥоһуктарын хас биирдии кэрэ аҥаар суумканы, түүпүлэни курдук судургутук атыылаһар кыахтанарын туһугар үлэлиибит. Ити кыбыстыылаах буолбатах, төттөрүтүн, астык!” – дииллэр үс дьүөгэлиилэр.
Алмаас уонна хаар – Саха сирин сирэйэ
Бырайыак үлэтин уонна ити коллаборацияҕа кыттыы туһунан сиһилии билсээри Мария Ефимоваттан ыйыталастыбыт. JEMAE (Jewels by Maria E.) ювелирнай пиирмэ дизайнера Мария Ефимова бэйэтин брендин 2020 сыллаахха тэрийбитэ. JEMAE Jewels трансформер-киэргэллэринэн уонна айылҕа таастаах, лаахтаах биһилэхтэринэн тута болҕомто киинигэр киирбитэ.
– Мария, АЛРОСАны кытта коллаборация бырайыагар хайдах быһыылаахтык кэллиҥ?
– Бу бырайыак ааспыт сыллааҕы ALROSA DIAMONDS кэллиэксийэттэн силистээх-мутуктаах. “Антиглянец” телеграм-ханаал кыргыттара хампаанньа кэллиэксийэтигэр саҥаны киллэрии, кылаассыкаттан кыралаан тэйии наадатын эппиттэрэ уонна бииргэ үлэлэһэн көрөргө ыҥырбыттара. Онон бу сыл сааһыгар АЛРОСА уонна “Антиглянец” кыттыгастаах бырайыактарыгар киирбитим. Кинилэри эрдэттэн билэрим уонна бииргэ үлэлииргэ уопуттааҕым эбии тирэх буолбута. JEMAE Jewels хампаанньа килийиэннэрэ буолан, реклама чааһыгар үлэлии сылдьыбыттаахпыт.
– Diamonds.Daily диэн кэллиэксийэ аата даҕаны бирилийээни күн да аайы кэтиэххэ сөбүн этэр. Эн санааҕар хайдаҕый?
– Күн аайы кэтэргэ ыҥырыы да буолбатар, кэрэ аҥаардар бэйэлэрэ бэйэлэригэр да бэлэх оҥорор кыахтаахтарын итэҕэтэ сатыыбыт. Сыаналаах бирилийээннээх киэргэллэнэр туһуттан кэргэн тахсар ыҥырыыны, төрөөбүт күнү эбэтэр атын бэлиэ түгэни кэтэһэр наадата суох. Ханнык баҕарар кэрэ аҥаар бэйэтэ атыылаһан, күн да аайы кэтиэн сөп.
– Оҥоһукка үлэ төһө бириэмэни ылла? Чуолаан тоҕо маннык оҥоһуктарга ылыстыгыт?
– Бу сыл сааһыттан эскиискэ үлэбитин саҕалаабыппыт. Оттон кэллиэксийэтин ALROSA DIAMONDS кытта оҥорбуппут. Биһиэхэ тэхиниичэскэй өттүнэн хааччыллыылаах, чопчуламмыт дьиэни биэрбиттэрэ. Ол үлэ тэтимин түргэтэтэр, оҥоһук хаачыстыбатыгар сабыдыаллыыр, айар үлэҕэ хааччаҕы арыйар.
Элбэх киһи Саха сирин туһунан өйдөбүлүгэр алмааһы уонна хаары ханыылыыр. Ол да иһин мин ити икки уратыны оҥоһуктарбар туһанным. Алмаас уонна хаар – иккиэн кыырпахтар. Арай оҥоһуулара атын. Бэйэм оҥоһуктарбар ити икки ураты хамсааһыны көрдөрөргө дьулустум. Хаар киһи илиитигэр ууллар. Оттон алмаас киһи көмөтүнэн бирилийээҥҥэ кубулуйар. Мин санаабар, бүгүҥҥү олоххо буолар көстүүгэ ити олус үчүгэй метафора.
– Бренди таһаарыыга олус үчүгэй хамсаныы. Оттон эдэр дизайнердар болҕомтолорун хайдах тардыахха сөбүй?
– Оннук, сөпкө бэлиэтиигин. Биир өттүттэн, бу АЛРОСА курдук бөдөҥ тэрилтэни кытта бииргэ үлэлээһиҥҥэ суолталаах хардыы. Атын өттүттэн, “Антиглянец” ханаалы кытта ситими тутууга эмиэ олус наадалаах. Эйиэхэ үлэлиир кыах бэриллэрин ааһан, эн тускунан сырдатан суруйуохтара. Ол бренди тутууга олус улахан оруоллаах. Биһиги баара эрэ 1,5 саастаах эдэр саҕалааччылар буоллахпыт. Сэтинньи 1 күнүгэр “Антиглянец” бырайыак салайааччыларыттан биирдэстэрэ Наталья Архангельская бу кэллиэксийэҕэ анаан оҥорбут биир оҥоһукпун атыыласта. Бииргэ үлэлииргэ ыҥырбыт киһим бэйэтинэн оҥоһукпун атыылаһарыттан ааптар киһи быһыытынан үөрэбин, астынабын.
Бирилийээнниин – күн аайы
Бу курдук, талааннаах ювелирдар илиилэрин иһиттэн араас кэрэ бэйэлээх оҥоһуктар тахсаллар. Мария дьоһун, эриэккэс, интэриэһинэй, көрдөөх, чэпчэки, дириҥ ис өйдөбүллээх оҥоһуктара хас биирдиилэрэ устуоруйаны кэрэһилииллэр, ону тэҥэ хатыламмат толоруулаахтар. Маннык киэргэллэри киһи дьиэ кэргэн күндү малын курдук харыстаан, оҕолорго, сиэннэргэ тириэрдиэн баҕарар. Дьыала харчытыгар буолбакка, бу оҥоһукка иҥмит дууһа, сүрэх баайыгар сытар.
“Антиглянец” уонна АЛРОСА кыттыгастаах кэллиэксийэлэрин киэргэллэрин alrosadiamond.ru саайка уонна алмаас хампаанньатын бутиктарыгар көрүөххэ сөп.
fkhj
Кэллиэксийэҕэ JEMAE үрүҥ солотуулаах кыһыл көмүстэн оҥоһуллубут үс киэргэл – биһилэх уонна бирилийээннээх ытарҕа, ону тэҥэ хас да кырыылаах хаардыы быһыылаах улахан биһилэх киирэр.
“Антиглянец” уонна АЛРОСА холбоһуктаах үлэлэрэ – бренди оҥорууга толкуйдаах, кэскиллээх хардыы”.
