Евгений Чекин өрөспүүбүлүкэ премьер-миниистирин дуоһунаһыттан барда. Бу туһунан Айсен Николаев бүгүҥҥү олохтоох салайыныы Сэбиэтин үөрүүлээх мунньаҕар эттэ.
“Бүгүн мин Евгений Чекинниин кэпсэттим. Кини Саха сиригэр атын миэстэҕэ үлэлиэн баҕарарын туһунан эттэ”, - диэтэ Николаев. Евгений Чекин миниистирдэр кэбиниэттэрин 2016 сыл алтынньытыттан салайбыта.
Саха сирин бырабыыталыстыбатын бэрэссэдээтэлин эбээһинэһин толорооччунан Уһук Илиҥҥэ РФ бэрэсидьиэнин боломуочуйалаах бэрэстэбиитэлин солбуйааччы Владимир Солодов ананна. Кини бэнидиэнньиктэн үлэтигэр тахсыаҕа.
Владимир Солодов 1982 сыллаахха от ыйын 26 күнүгэр Москубаҕа төрөөбүт. 2002 сыллаахха Парижка бэлиитикэ билимин Институтугар үөрэммит. Судаарыстыбаннай сулууспаҕа уонна судаарыстыбаннай салайыы боппуруостарыгар 30-тан тахса ыстатыйа ааптара. 2004 сыллаахха МГУ судаарыстбыаннай салайыы факультетын бүтэрбит. Бу факультекка 2005-2013 сс. ассистенынан, ыстаарсай преподавательынан уонна дассыанынан үлэлээбит.
2007 сылтан ыла бэлиитикэ билимин кандидата. Судаарыстыбаннай салайыы саҥа технологияларын киинин салайбыта.
2013 сылтан ыла “Молодые профессионалы” хайысха быраактыкаларын уонна бырайыактарын Департаменын салайааччыта.
2015 сыл муус устар 6 күнүттэн ыла Уһук Илиҥҥэ РФ Бэрэсидьиэнин боломуочуйалаах бэрэстэбиитэлин солбуйааччытынан анаммыта. Полпредствоҕа Уһук Илин социальнай уонна экэнэмиичэскэй бэлиитикэтин быһаарбыта.
