F бөлөххө түмүктүүр киирсиилэр бүгүн Казаҥҥа уонна Екатеринбурга буолуохтара. Казаҥҥа -- Германия уонна Соҕуруу Кэриэйэ, Екатеринбурга Мексика уонна Швеция хамаандалара күөн көрсүөхтэрэ.
F бөлөххө балаһыанньа байыаннай. Биир да хамаанда плей-оффка тахсар кыаҕы ыла да, сүтэрэ да илик. Мексикалар 6 очукуолаахтар (араастаһыы 3:1), ньиэмэстэр уонна шведтэр 3-түү (2:2), Соҕуруу Кэриэйэ хамаандатыгар билиҥҥитэ суох (1:3). Үс хамаанда үһүөн 3-түү эбэтэр 6-лыы очукуону ыллахтарына, боруотаҕа киирбит мээчик уопсай ахсаанынан кыайыылааҕы быһаарыахтара.
Мексикалар шведтэри кытта тэҥ-тэҥҥэ оонньоотохторуна да, бастыыр кыахтаахтар. Ол эрээри кинилэр биир эрэ да мээчиги аһардахтарына, онтон ньиэмэстэр очукуоларын сүтэрбэтэхтэринэ, үһүс миэстэҕэ түһэр кыахтаахтар. Германия хамаандатыгар икки эбэтэр иккиттэн элбэх ахсаанынан кыайыы наада. Онтон шведтэр мексикалары кыайбатахтарына уонна ньиэмэстэрдээҕэр аҕыйах мээчиги киллэрдэхтэринэ, тэҥнэһии да сөп гынар.
2014 с. чөмпүйүөннэр “Казань-Аренаҕа” Соҕуруу Кэриэйэни кытта көрсүөхтэрэ. Йоахим Лев хамаандата кыракый да сыыһаны оҥорор бырааба суох. Шведтэри кытта оонньуу 94-с мүнүүтэтигэр диэри быһыы-майгы сытыы этэ. Хата ону Тони Кроос бүтэһик түгэҥҥэ киллэрбит мээчигэ хамаандатын быыһаабыта. Онон ньиэмэстэр плей-оффка бастакы миэстэттэн тахсар кыахтаахтар, ол бэйэлэриттэн тутулуктаах.
Киирсиилэр бүгүн киэһэ 11.00. саҕаланаллар.
